Naka tekɔ l’ɛngɔ ka nɛmɔ oko luudu kana mutuka, kete ɛngɔ kɛsɔ nɔmbaka tɔ kokamamɛ dimɛna. Woho akɔ wamɛ mbahomaso nkokɛ dimɛna diɔtɔnganelo diasaso la Nzambi. Ngande wakokayɛ ntetemala nama lɔngɛnyi lele lam’asayɛ la Jahowa oma l’ɔkɔngɔ wa batisimu kayɛ?

Lo sawo nɛ

•  Tetemala mbeka Ɔtɛkɛta wa Nzambi

•  Tetemala nɔmba Jehowa

•  Tetemala mbutɛ anto akina awui wendana la dietawɔ diayɛ

•  Tetemala mbɔtɔ lo nsangaya y’Akristo

 Divɛsa di’ohomba: ‘Nyotetemale ntɔ elowa lo elimu w’ɛlɔlɔ tshɛ ndo mpama lo ewo k’oshika ka Nzambi.’​—Kɔlɔsayi 1:10.

 Kɛnɛ kalembetshiya dui sɔ: Oma l’ɔkɔngɔ wa batisimu, wɛ pombaka ntetemala mbadia Bible ndo kanaka yimba la akambo wekayɛ.​—Osambo 25:4; 119:97.

 Kɛnɛ kakokayɛ nongamɛ: Lo ntena dimɔtshi, mbeyaka monga ko wɛ bu la nsaki ka mbeka. L’ekomelo wɛ koka ndjota di’ɔnɛ “mbeka bu losha la yɛ.”

 Kɛnɛ kakokayɛ nsala: Eka lo yoho ya lotshimola awui wakɔngɛnyangɛnya. Onga la ekongelo kayɛ hita ka wekelo w’onto ndamɛ, ekongelo kahatonge wotsho le yɛ. Oyango ayɛ ekɔ wa mfudia ngandji kokayɛ Jehowa. Yoho ya wekelo shɔ mbelaka wahɔ ndo mbishaka ɔngɛnɔngɛnɔ.​—Osambo 16:11.

 Dako: Dia nkondja wahɔ w’efula oma lo wekelo ayɛ, nsala dia wekelo ayɛ monga lo dihole dia ki ndo lɛnɛ ele ndooko ɛngɔ kakoka kofukutanya.

 Onde wɛ ekɔ l’ohomba w’ekimanyelo kekina?

•   Adia:

   “Ngande wakoka Bible kimanyiyami?​—Etenyi 2: Etɛ wadielo wa Bible dui di’ɔngɛnɔngɛnɔ”

   “Ngande wakokami ndeka mbidja yimba lo dikambo dimɔtshi?”

•   Enda:

   Kɛnɛ kata asekayɛ​—Wadielo wa Bible

•   Telesharjɛ:

   “Ekongelo ka wadielo wa Bible”

 Divɛsa di’ohomba: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka.”​—Filipɛ 4:6.

 Kɛnɛ kalembetshiya dui sɔ: Sho koka ndjasukanya la Nzambi lo weho ehende: Wɛ mbohokamɛka etena kadiayɛ Ɔtɛkɛta ande; wɛ sawolaka la nde etena kɔlɔmbayɛ. Lo alɔmbɛlɔ ayɛ, wɛ koka nɔmba dia Nzambi kokimanyiya ndo mbosha losaka l’ɔtɛ wa ɛtshɔkɔ wakayakondja.

 Kɛnɛ kakokayɛ nongamɛ: Lo ntena dimɔtshi, , wɛ mbeyaka ndjotatɛ kalolɛ alɔmbɛlɔ akɔ waamɛ. Wɛ mbeyaka ndjotatɛ monga la taamu dia kana Jehowa ekɔ lo mboka alɔmbɛlɔ ayɛ ndo kana nde kombolaka mbahokamɛ.​—Osambo 10:1.

 Kɛnɛ kakokayɛ nsala: L’edja ka lushi, kana yimba lo akambo wakokayɛ nɔmba. Naka dihole dieyɛ hakosha diaaso dia wɛ nsala dɔmbɛlɔ dia l’otema ɔtɔi ndo di’otale, lama tokanyi takɔ lo wɔɔngɔ ayɛ dia wɛ ndjosala dɔmbɛlɔ wonya okina. Laadiko di’akambo ayɛ hita, lɔmbaka nto dikambo di’ehomba w’anto akina.​—Filipɛ 2:4.

 Dako: Naka alɔmbɛlɔ ayɛ waya bu w’oma k’ɛse otema, kete lɔmba Jehowa dia nde kokimanyiya lo kɛnɛ kendana la dui sɔ. Nde nangaka mboka awui tshɛ wendana la yɛ, mbidja ndo alɔmbɛlɔ ayɛ.​—1 Joani 5:14.

 Onde wɛ ekɔ l’ohomba w’ekimanyelo kekina?

•   Adia:

   “Lande na kahombami nɔmba?”

•   Telesharjɛ:

   “Comment améliorer tes prières”

 Divɛsa di’ohomba: “Oyalamake ndo odjake yimba lo wetshelo ayɛ. . . . Lo nsala ngasɔ, wɛ ayoyashimbɛ ndo ayoshimbɛ wanɛ wakohokamɛ.”​—1 Timɔte 4:16.

 Kɛnɛ kalembetshiya dui sɔ: Etena katɛyɛ anto akina awui wendana la dietawɔ diayɛ, wɛ nkeketshaka mbetawɔ kayɛ wɛ lawɔ. Etombelo wayonga la dui sɔ ele, wɛ ayoshimbɛ nsɛnɔ ya wanɛ wakohokamɛ kaamɛ ndo lɔsɛnɔ layɛ hita.

 Kɛnɛ kakokayɛ nongamɛ: Lo ntena dimɔtshi, wɛ koka mpomba dihonga dia mbutɛ anto akina awui wendana la dietawɔ diayɛ. Wɛ koka mboka wɔma wa nsala dui sɔ, djekoleko la kalasa.

 Kɛnɛ kakokayɛ nsala: Dja welo dia minya tokanyi ta kɔlɔ, ɛnyɛlɔ, wɔma. Sɛdingola tɛdikɔ tayɛ. Ɔpɔstɔlɔ Pɔɔlɔ akafunde ate: “Naka lekɔ lo nsambisha lokumu l’ɔlɔlɔ, dimi ndooko la ɔkɔkɔ wa ndjafuna, nɛ dia ɔsɔ ekɔ ɔkɛndɛ wakamalongola.”​—1 Kɔrɛtɔ 9:16, 17.

 Dako: La lotshungɔ l’ambutshi ayɛ, yanga onto ɔmɔtshi lakoka kolowanya ndo lakoka monga ɛnyɛlɔ k’ɔlɔlɔ le yɛ l’olimu wesambishelo.​—Tokedi 27:17.

 Wɛ ekɔ l’ohomba w’ekimanyelo kekina?

•   Adia:

   “Lande na kemi la wɔma dia mamɛ mbetawɔ kami la kalasa?”

 Divɛsa di’ohomba: “Nyɛsɔ todjanake yimba dia tshutshuyana lo ngandji ndo lo etsha w’ɛlɔlɔ, tatotshikake sanganaka kaamɛ.”​—Hɛbɛru 10:24, 25.

 Kɛnɛ kalembetshiya dui sɔ: Ntondotondo, sho tshɔka lo nsanganya dia tɔtɛmɔla Jehowa. Koko sho kondjaka nto wahɔ oma lo awui akina ahende. Dui dia ntondo, wɛ kondjaka ekeketshelo oma le anangɛyɛ la akadiyɛyɛ. Dui dia hende, wɛ mbaakeketshaka etena kɔtɔyɛ nsanganya yakɔ ndo kashayɛ kɔmatɛrɛ.​—Rɔmɔ 1:11, 12.

 Kɛnɛ kakokayɛ nongamɛ: Lo ntena dimɔtshi, wɛ koka ntatɛ nkanyiya akambo akina etena keyɛ lo nsanganya, kɛsɔ koka mbekola yimba yayɛ oma l’ akambo w’ohomba wetshama lo nsanganya. Kana wɛ koka ntshika mbɔtɔ nsanganya tshɛ. Wɛ mbeyaka ndeka mbidja yambalo yayɛ tshɛ l’awui akina, ɛnyɛlɔ awui wa la kalasa ndo wɛ koka mpomba etena ka mbɔtɔ nsanganya.

 Kɛnɛ kakokayɛ nsala: Kaanga mbele wɛ hotshika nsala awui wa la kalasa, wɛ koka ntondoya dia mbɔtɔka nsanganya mbala la mbala, ndo ndjadjɛ oyango wa nkondja wahɔ woleki oma lo nsanganya yakɔ. Emɛka lonya dia mbisha ekadimwelo lo nsanganya. Oma l’ɔkɔngɔ wa losanganya, tɛ anto amɔtshi woho wakayangɛnyingɛnyi la kɔmatɛrɛ yawɔ.

 Dako: Yalɔngɔsɔlaka la ntondo ka ntshɔ lo nsanganya. Telesharjɛ aplikasiɔ wa JW Library®, ndo kamba l’ekongelo ka “Meetings” dia menda awui akɔna wayɔsɛdingɔma lo losanganya tshɛ.

 Onde wɛ ekɔ l’ohomba w’ekimanyelo kekina?

•   Adia:

   “Lande na ntshɔ lo nsanganya y’Akristo?”