Lo ndjela ɛkɔnya ɛmɔtshi wakasalema, pursa 80 y’ana wahatakotsha ɛnɔnyi dikumi l’enanɛi nɔmbaka, koko kahende ɔtɔi ka l’atei awɔ mbasala dui sɔ lushi tshɛ. Amɔtshi l’atei awɔ ndjambolaka ɔnɛ: “Onde dɔmbɛlɔ ekɔ dui diakimanyiya dia mbɔdja wɔɔngɔ, koko diɔ diekɔ dui dimɔtshi di’ohomba efula?”

•  Dɔmbɛlɔ kɛdikɛdi na?

•  Onde Nzambi mpokamɛka alɔmbɛlɔ?

•  Awui akina wakokami nɔmba?

•  Kɛnɛ kata asekayɛ

 Nɔmba kɛdikɛdi nsawola l’Otungi wa diangɔ tshɛ. Ohokanyiya kɛnɛ kakoka dui sɔ nembetshiya! Jehowa ndeka anto la fwa l’awui tshɛ. Koko, nde “bu etale oma le ɔmɔmɔ la l’atei aso.” (Etsha 17:27) Bible mbishaka leeta lɔnɛ la diambo efula ɔnɛ: “Nyoyasukanya la Nzambi, ko nde ayoyasukanya la nyu.”​—Jakɔba 4:8.

 Ngande wakokayɛ ndjasukanya la Nzambi?

•   Yoho mɔtshi ele lo tshimbo ya dɔmbɛlɔ, yoho shɔ mbasawolayɛ la Nzambi

•   Yoho kina ele lo mbeka Bible, lo nsala ngasɔ wɛ ‘sawolaka’ la Nzambi.

 Sawo sɔ (dɔmbɛlɔ la wekelo wa Bible) ayokokimanyiya dia nkeketsha lɔngɛnyi lasayɛ la Nzambi.

 “Nsawola la Jehowa, mbuta ate nsawola la Nkum’Olongo, ekɔ diɛsɛ dimɔtshi dioleki woke diakoka anto monga la wɔ.”​—Jeremy.

 “Etena katɛmi Jehowa nsaki yami y’oma k’ɛse otema l’alɔmbɛlɔ ami, dimi ndjaokaka suke suke la nde.”​—Miranda.

 Oyadi wɛ ekɔ la mbetawɔ le Nzambi, ndo kaanga wɛ mbɔlɔmbaka, koka monga wolo le yɛ dia mbetawɔ dia nde pokamɛka mɛtɛ alɔmbɛlɔ ayɛ. Koko Bible mbutaka dia Jehowa ‘pokamɛka dɔmbɛlɔ.’ (Osambo 65:2) Tɔ kokeketshaka nto dia ‘nkitsha ekiyanu ayɛ tshɛ le nde.’ Lande na? ‘Nɛ dia nde ndjakiyanyaka dikambo diayɛ.’ (1 Petero 5:7).

 Naa kanyi yayɛ? Onde wɛ mbɔsaka etena ka sawolaka mbala la mbala l’angɛnyi ayɛ w’eshika? Wɛ koka nsala woho akɔ wamɛ la Nzambi. Lɔmbakande mbala la mbala, ndo etena kasalayɛ dui sɔ, kambaka la lokombo lande, Jehowa. (Osambo 86:5-7; 88:9) Bible kotɛka dia wɛ ‘ntetemala nɔmba.’​—1 Tɛsalɔnika 5:17.

 “Dɔmbɛlɔ diekɔ sawo dia lam’asami la Shɔmi lele l’olongo, ndo lo sawo sɔ, dimi koka mbotɛ kɛnɛ tshɛ kele lami l’otema.”​—Moises

 “Etena kasawolami la Jehowa, dimi mbotɛka kɛnɛ kele l’ɛse otema ami, oko watomotɛka mama kana ɔngɛnyi ami w’oshika.”​—Karen

 Bible mbutaka ɔnɛ: “Lo oseka dikambo tshɛ, . . . nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka.”​—Filipɛ 4:6.

 Onde dui nembetshiyaka dia wɛ kokaka mbotɛ ekakatanu ayɛ? Eelo! Bible shikikɛka ɔnɛ: “Kitsha wotsho ayɛ le Jehowa, ko nde ayokosukɛ.”​—Osambo 55:22.

 Lo mɛtɛ, etena kalɔmbayɛ Nzambi, tokomɛke tsho lo mbotɛ ekakatanu ayɛ. Osekaseka ɔmɔ mbutaka ate: “Lɔngɛnyi laso hatonga dimɛna naka layɔtɛkɛtaka la Jehowa paka etena kemi l’ohomba w’ekimanyielo kande. Di fɔnyaka dia dimi pombaka ntondo mbosha losaka, ndo awui wa mbosha losaka pombaka monga efula.”

 Naa kanyi yayɛ? Naa awui wa lo lɔsɛnɔ layɛ wahombayɛ mbisha Jehowa losaka? Onde wɛ koka nkanyiya awui asato wakokayɛ mbosha losaka ɛlɔ?

 “Ɛnyɛlɔ kɛmɔtshi ka tshitshɛ tɔ kɛnɛ: nsɛdingola dɛmbɔlɛmbɔ dimɔtshi di’olangala l’ɔngɛnɔngɛnɔ tshɛ koka totshutshuya dia nɔmba Jehowa dia mbosha losaka.”​—Anita.

 “Kana yimba lo ɛngɔ kɛmɔtshi kendana la etongelo kakambiya kana lo divɛsa dimɔtshi diakakonanda mɛtɛ, ndo sha Jehowa losaka lo dikambo sɔ.”​—Brian.