•  Lande na kayasha ambutshi dia mbeya awui w’anawɔ?

•  Kɛnɛ kakokayɛ nsala

•  Kɛnɛ kata asekayɛ

 Ambutshi ayɛ mbutaka dia vɔ ndjakiyanyaka lo dikambo diayɛ. Koko le yɛ, wɛ mbɔsaka dia wekɔ lo ndjatambiya l’akambo ayɛ hita. Ɛnyɛlɔ:

•   Ɔlɔngɔlɔngɔ ɔmɔtshi welɛwɔ Erin mbutaka ate: “Papa mbɔsaka telefɔnɛ kami, nɔmbakami mot de passe ndo nde mendaka wa mesajɛ ami. Naka dimi ntona, nde fɔnyaka diele oko lekɔ lo mbishɛ ɛngɔ kɛmɔtshi.”

•   Denise, leke kodikotshaka ɛnɔnyi otsha lo 20 l’ɛmɔtshi, akohɔ woho wakendaka mama kande telefɔnɛ kande dia mbeya anto angana wakasawudi la nde. Nde mbutaka ɔnɛ: “Nde akendaka numɛlo ka telefɔnɛ tshɛ ko tamimbolaka dia numɛlo kɛnɛ kekɔ kaki onto akɔna, akanyasawodi l’onto akɔ.”

•   Ɔlɔngɔlɔngɔ ɔmɔtshi welɛwɔ Kayla mbutaka dia nyango akadia awui ande amɔtshi hita wakandafunde lo kalupɛ yande. Nde mbutaka ate: “Kalupɛ shɔ yaki l’akambo efula wɛnya woho wayaokami, mbidja ndo akambo akina wakendanaka la mama! L’ɔkɔngɔ wa laasɔ, lakayotshikaka mfunda akambo ami hita lo kalupɛ shɔ.”

 Lo tshena pe: Ambutshi ayɛ wekɔ l’ɔkɛndɛ wa kokokɛ ndo wɛ hakoke nsala dui diakoka ndjɛnya diele oko vɔ hawokotsha ɔkɛndɛ awɔ dimɛna. Onde lo ntena dimɔtshi vɔ ndjotambaka elelo? Ondo ngasɔ. Koko dui dia dimɛna ele, ekɔ akambo amɔtshi wakokayɛ nsala diaha wɛ mɛna dia wekɔ lo mbɔtɔ l’akambo ayɛ hita.

 Diholɛka ambutshi ayɛ otema. Bible tokeketshaka dia “monga la losembwe lo akambo tshɛ.” (Hɛbɛru 13:18) Nsala la wolo dia wɛ nsala woho akɔ waamɛ la ambutshi ayɛ. Naka wɛ mongaka la losembwe ndo mbadiholɛka otema, kete vɔ hawotoleka mbɔtɔ l’akambo ayɛ hita.

 Ambola wa nkana la wɔ yimba: Kakɔna kasalayɛ kakoka mbakonya dia vɔ ndjaɛkɛ le yɛ? Onde wɛ kalolaka la ngelo l’ɔkɔngɔ wa wonya wakawakondjangɛ? Onde wɛ halange vɔ mbeya awui wendena l’angɛnyi ayɛ? Onde wɛ halange vɔ mbeya akambo watoyosalaka?

  “Lamboshihodia dia dimi pombaka mbɔtɔnɛ l’ambutshi ami. Dimi pombaka mbadiholɛka otema l’akambo tshɛ wahomana lami lo lɔsɛnɔ. Lambɛna dia dimi pombaka mbatɛka kɛnɛ tshɛ kalangawɔ mbeya ndo etombelo wayonga la dui sɔ ele vɔ wayoyaɛkɛ le mi ndo hawotɔtɔka l’akambo ami hita.”​—Delia.

 Onga la solo dia lotutsha. Bible mbutaka ɔnɛ: “Nyotetemale mɛnya woho w’anto wenyu.” (2 Kɔrɛtɔ 13:5) Mbɔsaka yema y’etena dia ambutshi ayɛ ndjoyaɛkɛ le yɛ lo akambo wasalayɛ, koko welo ɛsɔ tshɛ bu anyanya.

 Dimbola dia nkana la diɔ yimba: Kɛnɛ kakokayɛ mbeya ele ndo ambutshi ayɛ mbaki ɛlɔngɔlɔngɔ l’etena kɛmɔtshi. Onde wɛ hɔshi dia kɛnɛ kasalawɔ kɛsɔ kekɔ la shɛngiya lo lɔsɛnɔ layɛ?

 “Dimi mbeyaka dia ambutshi wekɔ lo mbohɔ munga yakawasale yewɔ hawolange dia anawɔ ndjoyisala.”​—Daniel.

 Yadja lo dihole diawɔ. Hemba dia wɛ mɛna akambo lo yoho yawaɛna ambutshi ayɛ. Bible mbutaka dia womoto l’oshika “sɛdingolaka elimu w’ase luudu lande” ndo ambutshi w’apami w’eshika mbodiaka ana awɔ “lo ohokwelo ndo lo ɛlɔmbwɛlɔ ka Jehowa.” (Tokedi 31:27; Ɛfɛsɔ 6:4, nɔtɛ ka l’ɛse ka dikatshi) Dia nkotsha ɔkɛndɛ ɔsɔ bu dui dia wɔdu: Ambutshi pombaka ndjela awui wendana la lɔsɛnɔ layɛ.

 Dimbola dia nkana la diɔ yimba: Ohɔsa dia wɛ mbele ombutshi leya akambo wakoka nkomɛ ɛlɔngɔlɔngɔ, onde wɛ ayetawɔ ntshika ɔnayɛ dia nde nsala tshɛ kalangande aha la nde kombola?

  “Etena keyɛ ɔlɔngɔlɔngɔ, wɛ koka mɛna dia ambutshi ayɛ wekɔ lo kodja lo ‘shasa.’ Kakianɛ etena kayami opalanga, lambɛna lande na kahomba ambutshi nsala dui sɔ. Dui sɔ mɛnyaka dia vɔ mbokaka anawɔ ngandji.”​—James.