“Lakahembe mbadia Bible, koko lakoke wɔma menda woke wetɔ!”​—Briana, 15.

 Onde wɛ amboyaokaka ngasɔ? Sawo nɛ koka kokeketsha!

•  Lande na mbadia Bible?

•  Ngande wahombami mbadia Bible?

•  Kɛnɛ kata asekayɛ

 Onde kanyi ya mbadia Bible hayoleke kɔngɛnyangɛnya? Naka eelo, sho koka kooka. Wɛ mbeyaka nkanyiya lo woho wele Bible dibuku diele la ndjɛkɛ ndekana kinunu ndo tɔ fundama l’alɛta wa totshitshɛ ndo tɔ bu l’esato. Ndo televiziɔ la tovidɛo tileka dimɛna!

 Ko ohokanyiya dui nɛ: Ohɔsa dia wɛ amboshola shɛtɛshɛtɛ mɔtshi yele la diangɔ di’oshinga wolo. Shi wɛ ayolanga mɛtɛ mbeya kɛnɛ kele lɔkɔ?

 Bible koka mbɛdikama la shɛtɛshɛtɛ shɔ yele la diangɔ di’oshinga wolo. Tɔ kekɔ la lomba l’oshinga wolo layokokimanyiya dia:

•   Mbɔsa tɛdikɔ t’amɛna

•   Mbokana l’ambutshi ayɛ

•   Ntana angɛnyi w’eshika

•   Gérer ton stress.

 Lande na kakoka dibuku di’edjedja dia ngasɔ monga ohomba le yɛ ɛlɔ kɛnɛ? Ekɔ nɛ dia “Afundelo tshɛ wakasambiyama oma le Nzambi.” (2 Timɔte 3:16) Dui sɔ nembetshiyaka di’alako wa lo Bible ndja oma lo kiɔkɔ yoleki tshɛ dimɛna.

 Yoho ya ntondo ya mbadia Bible ele kiada oma k’etatelo polo l’ekomelo. Dui sɔ diayokosha kanyi ya tshɛ ya losango lele lɔkɔ. Ekɔ toho efula ta mbadia Bible. Tɔsɛdingole bɛnyɛlɔ dihende:

•    Wɛ koka mbadia abuku 66 wakenga Bible lo ndjela woho wɔlɔngamiwɔ, mbuta ate oma lo Etatelo polo l’Ɛnyɛlɔ.

•    Wɛ koka mbadia Bible lo ndjela woho wakayasalemaka akambo wɔtɛkɛtami lɔkɔ.

 Dako: Lo kɛnɛ kendana la lɔsɛnɔ laki Yeso la lanɛ la nkɛtɛ, Apandisɛ A7 wa lo Ekadimwelo k’andja w’oyoyo mɛnyaka woho wɔlɔngami akambo lo ndjela woho wakawayasalemaka.

 Yoho ya hende ya hende ya mbadia ele nsɔna ɔkɔndɔ ɔmɔtshi watɛkɛta dia woho woho w’okakatanu wele la yɛ. Ɛnyɛlɔ:

•   Onde wɛ nangaka ntana angɛnyi wakokayɛ mbɛkɛ otema le wɔ? Adia ɔkɔndɔ wa Jɔnatana nde la Davidɛ. (1 Samuɛlɛ, tshapita 18-20) Oma laasɔ, nkamba la dihole diofundjiwɔ ɔnɛ: “Woho wa mbɔtɔ lɔngɛnyi l’anto wa kɔlamelo?” dia wɛ nkondja wetshelo w’eshika oma l’ɔkɔndɔ ɔsɔ.

•   Onde wɛ nangaka nshika tanga dimɛna lo ehemba? Adia ɔkɔndɔ wa Yɔsɛfu ndo nshola woho wakandashike tanga la ntondo k’ohemba. (Etatelo, tshapita 39) Oma laasɔ, nkamba l’etenyi kata ɔnɛ: “Woho wa nshika tanga la ntondo k’ohemba. . . . Yɔsɛfu​— Etenyi 1” ndo “Wakomamatanyɛ awui wa kashi! Yɔsɛfu​— Etenyi 2” dia wɛ nkondja wetshelo w’eshika oma l’ɔkɔndɔ.

•   Onde wɛ nangaka mbeya woho wakoka dɔmbɛlɔ kokimanyiya? Adia ɔkɔndɔ waki Nɛhɛmiya (Nɛhɛmiya, tshapita 2). Oma laasɔ, nkamba la etenyi kata ɔnɛ: “Nzambi akakadimola dɔmbɛlɔ diande” dia wɛ nkondja wetshelo w’eshika oma l’ɔkɔndɔ.

 Dako: Etena kadiayɛ Bible, onga lo dihole dia ki dia wɛ mbeya ndjasha lo kɛnɛ kadiayɛ.

 Yoho ya sato ya mbadia Bible ele mbɔsa ɔkɔndɔ kana osambo ɔmɔtshi, ko mbowadia, oma laasɔ, ko wɛ nkana yimba lo woho wendana awui akɔ la yɛ. Oma l’ɔkɔngɔ wa mbadia awui akɔ, yaoka ambola anɛ:

•    Lande na kakalange Jehowa di’awui anɛ tanema lo Bible?

•    Kakɔna kambetsha awui anɛ lo kɛnɛ kendana la lonto laki Nzambi ndo lo toho tande ta nsala akambo?

•    Ngande wakokami nkamba l’awui akɔ lo lɔsɛnɔ lami?

 Dako: Yadjɛ oyango ɔmɔtshi! Funda datɛ dialangayɛ ntatɛ la wadielo wa Bible lo nkamba la ekongelo katanema l’Ɛtɛrnɛtɛ.