Ntena dimɔtshi, mpembola diembwanelo mbeyaka monga la wahɔ. Tɔsɛdingole kɛnɛ kakakomɛ Jill. Nde mbutaka ate: “L’etatelo, ɔna pami lakembwanaka la mi akalangaka wonya tshɛ mbeya kɛnɛ kasalami, lende emi, dimi l’onto lele kaamɛ, ndo dui sɔ diakangɛnyangɛnyaka. Koko takayokomaka l’etena ka nde hayolanga dimi mbetsha wenya l’onto okina, paka nde. Nde akayonga ndo la kandjema naka letsha wenya kaamɛ la nkumbo kami, djekoleko papa. Lam’akamayohembolaka diembwanelo diaso, lakayaoke oko wamombaholɛ wotsho ɔmɔtshi oma l’ahɛka.”

 Sarah akahomana la dikambo dia woho akɔ waamɛ. Nde akatatɛ mɛna dia John, ɔna pami lakembwanaka la nde dia tshuki, aki ɔsɔkanyi, awui wolo ndo ɔsɛndji. Sarah mbohɔka ate: “Lushi lɔmɔtshi, nde akayokomaka wenya esato l’ɔkɔngɔ! Mama akadihola lokuke. Aha la nde menda kaanga menda, nde akate ate: “Totshu, tekɔ l’ɔkɔngɔ.” Nde kombuta at e “dimi lekɔ l’ɔkɔngɔ,” koko ate “tekɔ l’ɔkɔngɔ.” Nde akahombe nɔmba edimanyielo kana mbuta lande na kambondoyokoma l’ɔkɔngɔ. Ndo djekoleko, nde akahombe nɛmiya mama kami!”

 Lo mɛtɛ, aha naka onto ambosala kɔlɔ mbala ɔtɔi, kete laasɔ ɔnɛ pombaka mpembola diembwanelo. (Osambo 130:3) Koko lam’akɛnyi Sarah dia lɔsɛndji ekɔ etenyi kɛmɔtshi ka lonto laki John, nde akɛnyi ɔlɔlɔ mpembola diembwanelo diawɔ.

 Ko ayoyosala, naka l’ɛnyɛlɔ ka Jill nde la Sarah, wɛ ambɛna di’onto lembwana la yɛ dikambo dia tshuki hatoyonga olonganyi wa dimɛna le yɛ? Tonyake yimba lo dikambo sɔ! Kaanga mbele ɔsɔ bu dui dia wɔdu, mbeyaka ndeka ɔlɔlɔ mpembola diembwanelo dianyu. Tokedi 22:3 mbutaka ɔnɛ: “Kaanga yewo atɛnaka waale, ko nde atoyashɛka.”

 Lo mɛtɛ, mpembola diembwanelo bu dui dia wɔdu. Koko diwala diekɔ dimama dia pondjo. Ndeka dimɛna nsoya yema tshitshɛ ɛlɔ, lo dihole dia ndjonga la lonyangu lɔsɛnɔ l’otondo!