Mikayɛlɛ lelamɛ oma le ɛtɛmwɛlɔ ɛmɔtshi ɔnɛ “Mikayɛlɛ w’osanto,” ekɔ lokombo lakawasha Yeso la ntondo ndo l’ɔkɔngɔ wa lɔsɛnɔ lande lanɛ la nkɛtɛ. a Mikayɛlɛ akasusana odo waki Mɔsɛ nde la Satana ndo nde akakimanyiya ondjelo ɔmɔtshi dia tewoya Danyɛlɛ losango laki Nzambi. (Danyɛlɛ 10:13, 21; Judɛ 9) Mikayɛlɛ akasɛnɛ lo yoho yɔtɔnɛ la kitshimudi ya lokombo lande lalembetshiya ɔnɛ “Ele oko Nzambi?”​—lo mamɛ lowandji laki Nzambi ndo lo ndɔshana l’atɔnyi waki Nzambi.​—Danyɛlɛ 12:1; Ɛnyɛlɔ 12:7.

 Tɔsɛdingole lande na kasungana Yeso mbelamɛ ɔnɛ Mikayɛlɛ arkandjelo.

•   Mikayɛlɛ mbele “arkandjelo.” (Judɛ 9) Titrɛ ka “arkandjelo,” kitshimudi ɔnɛ “owandji w’andjelo,” tanemaka paka l’avɛsa ahende wa lo Bible. Lo ahole akɔ ahende, tshɛkɛta shɔ yekɔ l’ɔtɔi dia mɛnya dia paka ondjelo ɔtɔi oto mbele la titrɛ kɛsɔ. Divɛsa dimɔtshi l’atei w’avɛsa asɔ mbutaka dia Nkumadiɔndjo Yeso lakolwama “ayoholɔ oma l’olongo ndo ayoda ombeka wa didjango, la dui dia arkandjelo.” (1 Tɛsalɔnika 4:​16) Yeso aki la “dui dia arkandjelo” nɛ dia nde mbele Mikayɛlɛ arkandjelo.

•   Mikayɛlɛ mbalɔmbɔla alembe w’andjelo. “Mikayɛlɛ l’andjelo ande wakalɔ la dragɔ,” mbuta ate Satana. (Ɛnyɛlɔ 12:7) Mikayɛlɛ ekɔ la lowandji l’efula l’olongo nɛ dia nde mbelamɛka ɔnɛ “ɔmɔtshi la l’atei w’ewandji woleki tshɛ” ndo ɔnɛ “owandji wa woke.” (Danyɛlɛ 10:13, 21; 12:1) Titrɛ shɔ mendanaka la Mikayɛlɛ oko wende “kɔmanda ndo owandji w’andjelo,” oko wadita Daka di’oyoyo diaki David E. Aune.

   Bible tɛkɛtaka paka dia lokombo lokina ɔtɔi laki onto ɔmɔtshi laki la lowandji laadiko di’alembe w’andjelo. Diɔ tɛkɛtaka di’etena “kayoshɔma Nkumadiɔndjɔ Yeso oma l’olongo la andjelo ande wa wolo lo loombe la dja, etena kayondɔsɔmboya.” (2 Tɛsalɔnika 1:​7, 8; Mateo 16:27) Yeso “akatshu l’olongo. Andjelo, ewandji ndo akanga wa nkudu wakayala l’ɛse kande.” (1 Petero 3:​21, 22) Mbokɛmaka dia Nzambi takandakoke nkitsha ekonyonyɛ Yeso la Mikayɛlɛ laadiko di’andjelo w’ekila oko kɔmanda kawɔ. Sho koka mbuta dia nkombo hiende shɔ, Yeso ndo Mikayɛlɛ, nembetshiyaka paka onto ɔtɔi.

•   Mikayɛlɛ “ayemala” lo “etena ka sui” dia woho wahatayalaka ndooko lushi. (Danyɛlɛ 12:1) Lo dibuku dia Danyɛlɛ, etelo k’ɔnɛ “memala” vɔ nkamba la tɔ mbala efula dia ntɛkɛta dikambo dia nkumekanga kambemala dia nsala dui dimɔtshi dia laande. (Danyɛlɛ 11:​2-4, 21) Yeso Kristo, lelamɛ “Dui dia Nzambi,” ayɔsa yɛdikɔ ya laande oko “nkumekanga ka nkumi ya dikanga” dia ndanya atunyi tshɛ waki Nzambi ndo nkokɛ ekambi waki Nzambi. (Ɛnyɛlɔ 19:11-​16) Nde ayosala dui sɔ lo “mfɔnu ka woke kayoyala woho wahataylaka oma k’etatelo k’andja.”​—Mateo 24:21, 42.