Batisimu kɛdikɛdi na?
Okadimwelo washa Bible
Batiza kɛdikɛdi dindja onto la tshondo l’ashi ko mbotondja. * Kɛsɔ mɛnyaka ɔkɔkɔ wakabatizama Yeso l’ɔkɛdi wa dingunda. (Mateo 3:13, 16) Woho akɔ waamɛ mbakalɔmbɛ ɔlɛnga w’ose Etiɔpiya dia nde batizama lam’akawakome lo “dihole diaki ashi.”—Etsha 8:36-40.
Kitshimudi ya batisimu
Bible mbɛdikaka batisimu la okundelo. (Rɔmɔ 6:4; Kɔlɔsayi 2:12) Batisimu ka l’ashi ekɔ didjidji di’onto lambovɔ lo akambo wa lɔsɛnɔ lande la ntondo ndo ambotatɛ lɔsɛnɔ l’oyoyo oko Okristo wamboyakimɔ le Nzambi. Batisimu ndo wanya watɔla otsha lɔkɔ ekɔ yɛdikɔ yaki Nzambi yakimanyiya onto dia monga la nkum’otema ka pudipudi kohikami lo mbetawɔ kele la nde l’olambo wa Yeso Kristo. (1 Petero 3:21) Diakɔ diele, Yeso aketsha di’ambeki ande pombaka batizama.—Mateo 28:19, 20.
Onde batisimu ka l’ashi minyaka pɛkato?
Ndooko. Bible mbetshaka dia sho koka mbɛdiama oma lo pɛkato paka la dikila diaki Yeso diakatshulɔma. (Rɔmɔ 5:8, 9; 1 Joani 1:7) Dia sho nkondja wahɔ oma l’olambo wa Yeso, sho pombaka monga la mbetawɔ le Yeso, ntshikitanya yoho ya lɔsɛnɔ laso ko liɔtɔnganyiya la wetshelo waki Yeso, ndo batizama.—Etsha 2:38; 3:19.
Batisimu k’ana kɛdikɛdi na?
“Batisimu k’ana” hatanema lo Bible. Ɔsɔ ekɔ ditshelo dia salema lo ɛtɛmwɛlɔ ɛmɔtshi lɛnɛ abatizawɔ ana. (vɔ mbatɛka tɔpɔpɔ t’ashi l’ɔtɛ kana mbalɔya ɔtɛ) ndo mbashaka nkombo.
Onde Bible mbetshaka batisimu k’ana?
Ndooko, Bible hetsha dikambo sɔ. Batisimu k’Akristo ekɔ dia wanɛ wamboshila mbola ndo wakoka nshihodia ndo monga la mbetawɔ lo “lokumu l’ɔlɔlɔ la Diolelo dia Nzambi.” (Etsha 8:12) Kɛsɔ mbidjaka ndo mboka ɔtɛkɛta wa Nzambi, mbowetawɔ, ndo ndjatshumoya, akambo wele ɔn’ashashi hakoke mbasala.—Etsha 2:22, 38, 41.
Ndo nto, Bible mɛnyaka dia Nzambi mbɔsaka ana w’akɛnda w’Akristo oko ekila kana pudipudi lo washo ande, l’ɔtɛ wa kɔlamelo y’ambutshi awɔ. (1 Kɔrɛtɔ 7:14) Naka Nzambi mbetawɔka batisimu k’ana wakɛnda, kete vɔ totowonga l’ohomba wa kidiama oma lo mbetawɔ k’ambutshi awɔ. *
Tokanyi ta kɔlɔ tele l’anto lo dikambo dia batisimu k’Akristo
Kanyi ya kɔlɔ: Mbɔlɔya kana mbitɛ onto tɔpɔpɔ t’ashi ekɔ woho ɔtɔi la dindja onto la tshondo l’ashi.
Kɛnɛ kele mɛtɛ: Lo batisimu yɔtɛkɛtami lo Bible, wanɛ tshɛ wakayilongola wakadindjama la tshondo l’ashi. Ɛnyɛlɔ, lam’akabatiza Filipɛ, ɔlɛnga w’ose Etiɔpiya, vɔ “wakaholɔ l’ashi” dia batisimu. Oma laasɔ, vɔ ‘wakawatombe oma l’ashi.’—Etsha 8:36-39. *
Kanyi ya kɔlɔ: Bible mɛnyaka dia lam’akabatizamaka ase nkumbo k’otondo, ndo ana mbakabatizamaka. Ɛnyɛlɔ, tɔ mbutaka lo dikambo di’olami wa lokanu la la Filipɛ ɔnɛ: “Nde la nkumbo kande k’otondo wakabatizama.”—Etsha 16:31-34.
Kɛnɛ kele mɛtɛ: Ɔkɔndɔ wa olami wa lokanu mɛnyaka dia wanɛ wakabatizama wakashihodia “ɔtɛkɛta wa Jehowa” ndo dia vɔ “wakangɛnangɛna efula.” (Etsha 16:32, 34) Ɔsɔ ekɔ tolembetelo tatokonya dia mbuta diaha ɔna tshɛ la lo nkumbo k’olami wa lokanu mbakabatizama, nɛ dia vɔ kokoka nshihodia ɔtɛkɛta wa Jehowa.
Kanyi ya kɔlɔ: Yeso aketsha batisimu k’ana lam’akandate dia Diolelo diekɔ di’anto wele oko ana.—Mateo 19:13-15; Makɔ 10:13-16.
Kɛnɛ kele mɛtɛ: Yeso kɔtɛkɛta dikambo dia batisimu etena kakandate ɛtɛkɛta ɛnɛ. Koko, nde akɛnya dia wanɛ wayonga l’akoka wa mbɔtɔ lo Diolelo dia Nzambi pombaka monga oko ana, lo monga l’okitshakitsha ndo mbetawɔ mbetshama.—Mateo 18:4; Luka 18:16, 17.
^ Tshɛkɛta ya lo Grɛkɛ yokadimɔmi ɔnɛ “batisimu” ndja oma lo tshɛkɛta yalembetshiyaka “dindja lo.” Enda dibuku Theological Dictionary of the New Testament, Volume I, lɛkɛ 529.
^ Lo ndjela dibuku dimɔtshi (The International Standard Bible Encyclopedia), “ndooko dihole diatawɔ lo Daka di’oyoyo dia batisimu k’ana.” Diɔ mbutaka nto dia tshelo shɔ yakaye oma lo “kanyi ya kashi ndo nɛmɔ dia tshambandeko diakawashaka batisimu,” kanyi y’ɔnɛ batisimu tɔamɛ myinyaka pɛkato.—Volume 1, Odingɔ wa 416-417.
^ L’ɔtɛ wa dui wata ɔnɛ: “Batisimu (lo Bible),” Dibuku dimɔtshi (New Catholic Encyclopedia) mbutaka ɔnɛ: “Ekɔ mɛtɛ dia l’Ɔtɛmwɛlɔ wa ntondo wakabatizaka anto lo mbadindja l’ashi.”—Volume 2, lɛkɛ 59.
Enda ndo lo...
EKADIMWELO LO AMBOLA W’OMA LO BIBLE
Onde ɛtɛmwɛlɔ tshɛ wekɔ woho ɔtɔi? Onde vɔ tshɛ konyaka le Nzambi?
Awui ahende wɔtɛkɛtami lo Bible mbishaka okadimwelo.
