Diolelo diaki Nzambi diekɔ lowandji la mɛtɛ lakashikikɛma oma lo Jehowa Nzambi. “Diulelu dia [Nzambi]” mbelamɛka nto “diulelu dia l’ulungu” lo Bible lam’ele diɔ diekɔ lo nɔmbɔla oma l’olongo. (Makɔ 1:14, 15; Mateo 4:17, Bible k’Ekila) Diɔ fɔnaka la mandji y’ana w’anto l’awui efula, koko diɔ mbaleka l’oseka dui tshɛ.

•   Ɛnɔmbɔdi. Nzambi akasɔnɛ Yeso Kristo oko Nkumekanga ka Diolelo ndo akawosha lowandji l’efula oleki lahakoke ɛnɔmbɔdi w’ana w’anto monga la lɔ. (Mateo 28:18) Yeso kambaka la lowandji lande paka lo yoho ya dimɛna, oko wakandɛnya dia nde ekɔ ɔnɔmbɔdi wakoka mbɛkɛ otema ndo wokana kɛtshi. (Mateo 4:23; Makɔ 1:40, 41; 6:31-34; Luka 7:11-17) L’ɛlɔmbwɛlɔ ka Nzambi, Yeso akasɔnɛ anto w’oma lo wedja tshɛ “wayolɛ nkɛtɛ oko nkumi ya dikanga” kaamɛ la nde oma l’olongo.​—Ɛnyɛlɔ 5:9, 10.

•   Edja ka ngande. Otshikitanyi la mandji y’ana w’anto yalɔmbɔla ko mimɔ, Diolelo diaki Nzambi diayonga Diolelo “diahalanyemaki pondjo.”​—Danyɛlɛ 2:44.

•   Ambolami. Onto tshɛ lasala lolango la Nzambi kokaka monga ombolami wa Diolelo dia Nzambi, aha la tɛkɛnɛndɛ ta monga anto waki kapanda kana monga anto wotwe dihole ɔtɔi.​—Etsha 10:34, 35.

•   Ɛlɛmbɛ. Ɛlɛmbɛ (kana wadjango) wa Diolelo diaki Nzambi mendanaka l’awui efula oleki nshimba tsho lɔkɛwɔ la kɔlɔ. Vɔ kɛnɛmɔlaka lɔkɛwɔ l’ambolami adiɔ. Ɛnyɛlɔ, Bible mbutaka ɔnɛ: “‘Langa Jehowa Nzambi kayɛ la otema ayɛ tshɛ ndo la anima ayɛ tshɛ ndo la yimba yayɛ tshɛ.’ Ɔsɔ mbele ɔlɛmbɛ woleki woke ndo wa ntondo. Wa 2 wafɔna la wɔ, vɔ ɔnɛ: ‘Langa wonyayɛ onto oko wayalangayɛ.’” (Mateo 22:37-39) Ngandji ka Nzambi ndo k’anto akina mbatshutshuya ambolami wa Diolelo dia nsala akambo lo wahɔ w’anto akina.

•   Wetshelo. Paka l’etena kakɔ kaamɛ kadja Diolelo diaki Nzambi ɛlɛmbɛ wa laadiko le ambolami adiɔ, diɔ diekɔ lo mbetsha nto anto ande woho wa nkamba l’ɛlɛmbɛ akɔ.​—Isaya 48:17, 18.

•   Ɔkɛndɛ. Diolelo diaki Nzambi hadiɔngɔnya ɛnɔmbɔdi adiɔ oma lo diangɔ di’ambolami adiɔ. Lo dihole dia nsala ngasɔ, diɔ kotshaka lolango laki Nzambi, mbidja ndo daka diata dia wanɛ wawoka ngandji wayɔsɛna pondjo pondjo lo paradiso ka la nkɛtɛ.​—Isaya 35:1, 5, 6; Mateo 6:10; Ɛnyɛlɔ 21:1-4.