Diolelo diaki Nzambi diekɔ l’otema ayɛ?
Okadimwelo washa Bible
Ndooko, Diolelo diaki Nzambi bu dui diendana la eongelo k’etema w’Akristo. * Bible mɛnyaka dihole diedɔ shikaa lo dielɛ ɔnɛ “Diolelo dia l’olongo.” (Mateo 4:17) Tɔsɛdingole woho wɛnya Bible dia diɔ diekɔ lowandji la mɛtɛ lolɛ oma l’olongo.
Diolelo dia Nzambi diekɔ la wanɛ wayolɛ, diɔ diekɔ l’ambolami, diekɔ la ɛlɛmbɛ, ndo diɔ mbayosala dia lolango la Nzambi salema l’olongo ndo la nkɛtɛ.—Mateo 6:10; Ɛnyɛlɔ 5:10.
Lowandji lkana Diolelo diaki Nzambi diayolɛ “anto, wedja ndo elui w’ɛtɛkɛta” tshɛ wa la nkɛtɛ. (Danyɛlɛ 7:13, 14) Lowandji la diolelo sɔ ndja oma le Nzambi ndamɛ, koko aha oma le anto.—Osambo 2:4-6; Isaya 9:7.
Yeso akatɛ apɔstɔlɔ ande wa kɔlamelo ɔnɛ vɔ wayotonga kaamɛ la nde lo Dolelo dia l’olongo ndo “mbidjasɛ lo kiti ya lowandji.”—Luka 22:28, 30.
Diolelo diekɔ l’atunyi ndo diɔ diayowalanya.—Osambo 2:1, 2, 8, 9; 110:1, 2; 1 Kɔrɛtɔ 15:25, 26.
Bible hetsha dia Diolelo diaki Nzambi diekɔ l’otema w’onto ndo ɔnɛ lɔkɔ mbolɛdiɔ. Koko Bible mɛnyaka dia “ɔtɛkɛta wa Diolelo,” mbuta ate “lokumu l’ɔlɔlɔ lɔnɛ la Diolelo” kokaka ndo pombaka minanda etema aso.—Mateo 13:19; 24:14.
Kakɔna kalembetshiya ɛtɛkɛta w’ɔnɛ “Diolelo dia Nzambi diekɔ l’atei anyu”?
Anto amɔtshi wakɔtɔ l’okandokando oma l’ɔkɔngɔ wa vɔ mbadia Luka 17:21 lo Bible mɔtshi. Ɛnyɛlɔ, Bible k’Ekila mbutaka ɔnɛ: “Diulelu dia [Nzambi] dieko l’etema anyu.” Dia sho nshihodia divɛsa diakɔ dimɛna, sho pombaka nsɛdingola avɛsa akina wodingi divɛsa sɔ.
Diolelo dia Nzambi komonga l’etema wa wanɛ waki la lonyu ndo wakalɔshaka Yeso
Yeso akatɛkɛtaka l’Afarisɛ, olui w’ewandji w’ɔtɛmwɛlɔ wakawɔlɔshaka ndo wakadjaka sheke mbodiaka. (Mateo 12:14; Luka 17:20) Onde Diolelo dia Nzambi diakakoke mɛtɛ monga l’etema awɔ wa lonyu ɛsɔ? Yeso akawatɛ ate: “L’etei nyekɔ akanga wa dungi pende ndo amɔnyɔdi w’ɛlɛmbɛ.”—Mateo 23:27, 28.
Dikadimwelo dikina dia Bible diakakadimola dimɛna ɛtɛkɛta watanaso lo Luka 17:21 ɔnɛ: “Dyɔ dyeekɔ l’atei waakinyu.” (Dyookaneelo dy’Oyooyo) “Diolelo dia Nzambi diekɔ lale nyu.” (Ekadimwelo k’andja w’oyoyo, nɔtɛ ka l’ɛse ka dikatshi) Diolelo dia Nzambi diaki “lale” Afarisɛ kana “l’atei” awɔ, nɛ dia Yeso ɔnɛ lakasɔnama oma le Nzambi dia mbolɛ oko Nkumekanga aki la ntondo kawɔ.—Luka 1:32, 33.
^ Efula k’ɛtɛmwɛlɔ w’Akristo mbetshaka dia Diolelo diaki Nzambi diekɔ l’etei k’onto kana l’otema ande. Ɛnyɛlɔ, l’États-Unis, tshunda di’ɔtɛmwɛlɔ dielɛwɔ Convention baptise du Sud wakate dia Diolelo diaki Nzambi diekɔ “lowandji laki Nzambi lele l’otema ndo lo lɔsɛnɔ l’onto l’onto.” Dibuku Jésus de Nazareth diakafunde Papa l’Ɔrɔma Benoît XVI diakate dia “Diolelo dia Nzambi ndjaka l’otema w’onto lele la dilɛmiɛlɔ.”
Enda ndo lo...
ESSENTIAL BIBLE TEACHINGS
Diolelo diaki Nzambi kɛdikɛdi na?
Lam’akandakambaka olimu ande lanɛ la nkɛtɛ, Yeso aketsha awui wendana la Diolelo diaki Nzambi oleki awui akina tshɛ. Aya ɛnɔnyi nkama walɔmba anto dia Diolelo sɔ ndja.
TSHOTO Y'ETANGELO
Ele Nkumekanga ka Diolelo diaki Nzambi?
Afundji wa Bible efula wakafunde kiambokambo tshɛ yakakoke tokimanyiya dia mbeya Ɔnɛ lakahombe ndjonga Nkumekanga ka Diolelo diaki Nzambi. L’ɔkɔndɔ w’otondo w’ana w’anto, paka onto ɔtɔi mbakotsha awui walɔmbama dia monga owandji wa dimɛna.
