Tshɛkɛta “Dako dioleki dimɛna” hayotanema lo Bible. Koko, anto efula kambaka la tshɛkɛta nyɛ dia ntɛkɛta dikambo dia ɔlɛmbɛ wendana la lɔkɛwɔ waketsha Yeso. Lo Dako diande dia lo dikona dia lokumu, Yeso akate ate: “Akambo tshɛ walanganyu anto nyosalɛ, nyu la wɔ pombaka mbasalɛwɔ.” (Mateo 7:12; Luka 6:31) Dako dioleki dimɛna akalembetshiyama nto yoho nyɛ: “Salɛ anto akina woho walangayɛ vɔ kosalɛ.”​—Encyclopedia of Philosophy.

•  Naa oyango wa dako dielamɛ ɔnɛ Dako dioleki dimɛna?

•  Lande na kele Dako dioleki dimɛna ohomba?

•  Onde dako dioleki dimɛna mendanaka tsho paka la kɛnɛ kakokaso nongola oma le anto akina?

•  Ngande wakokayɛ nkamba la Dako dioleki dimɛna?

 Dako dioleki dimɛna tokeketshaka dia salɛ anto akina akambo woho walangaso vɔ tosalɛ. Ɛnyɛlɔ, anto efula ngɛnangɛnaka etena kasalɛ anto akina awui wa la dilɛmiɛlɔ, la ɔlɔlɔ tshɛ ndo la ngandji. Laasɔ, mbokɛmaka dia sho pombaka ‘woho akɔ waamɛ’ otsha le anto akina.​—Luka 6:31.

 Dako dioleki dimɛna mendanaka l’akambo tshɛ wa lo lɔsɛnɔ. Ɛnyɛlɔ, diɔ kokaka . . .

•   Nkeketsha awala.​—Ɛfɛsɔ 5:28, 33.

•   Nɔmbɔla awui etena kodiawɔ anawɔ.​—Ɛfɛsɔ 6:4.

•   Nkimanyiya angɛnyi, asukanyi ndo wanɛ wakamba kaamɛ dia monga la diɔtɔnganelo dia dimɛna.​—Tokedi 3:27, 28; Kɔlɔsayi 3:13.

 Dako dioleki dimɛna ekɔ tɔndɔ diakɔ diamɛ diatanaso lo etenyi koleki woke ka kɛnɛ kelamɛ ɔnɛ Daka di’Edjedja. Ɔlɛmbɛ wa Yeso wendana la lɔkɛwɔ “kalembetshiya Ɛlɛmbɛ [mbuta ate abuku atanu w’etatelo wa lo Bible] la Amvutshi [mbuta ate abuku wa prɔfɛsiya].” (Mateo 7:12) L’ɛtɛkɛta ekina, Dako dioleki dimɛna kɛnɛmɔlaka mɛtɛ kɛmɔtshi k’ohomba ka lo Daka di’Edjedja, mɛtɛ kakɔ ko: Nanga wonyaso onto.​—Rɔmɔ 13:8-10.

 Ndooko. Dako dioleki dimɛna ndekaka mendana la tshelo ya mbisha. Etena kakasha Yeso Dako dioleki dimɛna, nde akatɛkɛtaka dia woho wahombaso salɛ aha tsho anto tshɛ akambo, koko ndo woho wahombaso salɛ atunyi aso akambo. (Luka 6:27-31, 35) Laasɔ Dako dioleki dimɛna keketshaka anto dia salɛ anto tshɛ ɔlɔlɔ.

1.  1. Sɛdingola akambo. Dja wanɛ wokodingi yimba. Ɛnyɛlɔ, wɛ mbeyaka mɛna onto ɔmɔtshi atɛmbɛ diangɔ, wɛ mbeyaka mboka di’osukanyi ayɛ ɔmɔtshi ambokimamɛ lo lopitadi kana mɛna di’onto ɔmɔtshi lakamba la yɛ ambɔkɔmɔ. Naka wɛ ‘menda ndo wahɔ w’anto akina,’ kete wɛ ayotana waaso wa mbatɛ kana mbasalɛ dui dimɔtshi diayowakimanyiya.​—Filipɛ 2:4.

2.  2. Yadja lo dihole di’anto akina. Ohɔsa dia wɛ mbele l’akambo wele l’onto okina. Ngande wayoyaoka? (Rɔmɔ 12:15) Naka wɛ nyanga dia mbeya woho wayaoka anto akina, kete wɛ ayotshutshuyama dia mbaakimanyiya.

3.  3. Tongake awui wolo. Eya di’anto ntshikitana. Kɛnɛ kalanga anto akina dia anto mbasalɛ mbeyaka monga ko aha tɔ mbalangayɛ vɔ kosalɛ. Laasɔ, lo awui efula wakokayɛ nsala, sɔna kɛnɛ kayowoleka ngɛnangɛna.​—1 Kɔrɛtɔ 10:24.