Lo Bible, tshɛkɛta “eolwelo” ndja oma lo tshɛkɛta ya lo Grɛkɛ a·naʹsta·sis, yalembetshiya “memɔ” kana “memala nto.” Onto lambolwama ekɔ onto lambowemula oma lo ndjɔ ya nyɔi dia nde monga la woho wa lɔsɛnɔ laki lande ntondo.​—1 Kɔrɛtɔ 15:12, 13.

 Kaanga mbele tshɛkɛta “eolwelo” bu l’Afundelo wa lo Hɛbɛru, welamɛ mbala efula ɔnɛ Daka di’Edjedja, wetshelo wendana la dikambo sɔ wekɔ lɔkɔ. Oma lo tshimbo y’omvutshi Hɔseya, Nzambi akalake ate: “Dimi layowatshungola oma lo wolo wa Diombo; Dimi layowatondja oma lo nyɔi.”​—Hɔsea 13:14; Jɔbɔ 14:13-​15; Isaya 26:19; Danyɛlɛ 12:​2, 13.

 Lende ayolwama anto? Anto amɔtshi wayolwama dia tolɛ oko nkumi ya dikanga kaamɛ la Kristo. (2 Kɔrɛtɔ 5:1; Ɛnyɛlɔ 5:​9, 10) Bible kielɛka ɔnɛ “eolwelo ka ntondo” mɛnyaka dia eolwelo kekina kayonga. (Ɛnyɛlɔ 20:6; Filipɛ 3:​11) Eolwelo kekina kɛsɔ kekɔ dikambo dia wanɛ wayɔsɛna la nkɛtɛ, ndo efula k’anto wayolwama dia ndjɔsɛna la nkɛtɛ.​—Osambo 37:29.

 Ngande wayolwama anto? Nzambi ambosha Yeso wolo wa mbolola wanɛ wakavu. (Joani 11:25) Yeso ayolola “wanɛ tshɛ wele lo waombo wolwama,” onto l’onto la waonga ande, lonto lande ndo la tokanyi tande. (Joani 5:​28, 29) Wanɛ wolwama otsha l’olongo wayolongola demba dia lo nyuma, koko wanɛ wayolwama dia nsɛna lanɛ la nkɛtɛ wayonga la demba dia l’emunyi dia kokele.​—Isaya 33:24; 35:​5, 6; 1 Kɔrɛtɔ 15:42-​44, 50.

 Waa na wayolwama? Bible mbutaka dia “eolwelo k’anto w’ɛlɔlɔ ndo k’anto wa kɔlɔ kayoyala.” (Etsha 24:15) Anto w’ɛlɔlɔ ekɔ anto wele la kɔlamelo ɛnyɛlɔ oko Nɔa, Sara ndo Abrahama. (Etatelo 6:9; Hɛbɛru 11:11; Jakɔba 2:​21) Anto wa kɔlɔ ekɔ wanɛ waki kokitanyiya ɛlɛmbɛ wa Nzambi, nɛ dia vɔ kokondja diaaso dia mbeka ndo dia nkitanyiya ɛlɛmbɛ akɔ.

 Koko wanɛ waki akanga wa kɔlɔ efula woho ɔnɛ wele hawokoke ntshikitanya lɔkɛwɔ lawɔ hawotolwama. Etena kavɔ anto asɔ, vɔ ndanyemaka lo pondjo aha la monga la elongamelo ka mbolwama.​—Mateo 23:33; Hɛbɛru 10:26, 27.

 Etena kakɔna kayosalema eolwelo? Bible kakatatshi dia eolwelo k’otsha l’olongo kayosalema lo woongelo wa Kristo wakatatɛ lo 1914. (1 Kɔrɛtɔ 15:21-​23) Eolwelo kendana la wanɛ wayɔsɛna lanɛ la nkɛtɛ kayonga lo Ɛlɔmbwɛlɔ k’ɛnɔnyi kinunu kaki Yeso Kristo, etena kayokadimwama nkɛtɛ paradiso.​—Luka 23:43; Ɛnyɛlɔ 20:​6, 12, 13.

 Lande na kele dietawɔ diendana la eolwelo kekɔ ɔlɔlɔ? Bible kekɔ l’ɛkɔndɔ w’anto divwa wakolwama, lo eolwelo tshɛ, anto amɔtshi wakɛnyi dikambo diakɔ la washo. (1 Nkumi ya dikanga 17:17-​24; 2 Nkumi ya dikanga 4:​32-​37; 13:20, 21; Luka 7:​11-​17; 8:​40-​56; Joani 11:38-​44; Etsha 9:​36-​42; Etsha 20:​7-​12; 1 Kɔrɛtɔ 15:​3-6) Eolwelo ka Lazaro aki eolwelo ka diambo, nɛ dia Yeso akawolola nshi nyɛi l’ɔkɔngɔ wa nyɔi kande ndo nde akasale dui sɔ la ntondo ka lemba la woke l’anto. (Joani 11:39, 42) Kaanga wanɛ wakalɔshaka Yeso kokoka mbidja taamu lo dikambo sɔ. Kɛnɛ kakawasale aki nyanga dia ndjaka Yeso nde la Lazaro.​—Joani 11:47, 53; 12:​9-​11.

 Bible mɛnyaka dia Nzambi dia Nzambi ekɔ l’akoka ndo la nsaki ka mbolola anto. Nde mbohɔka kiambokambo tshɛ yendana l’onto layondolola oma tshimbo ya wolo ande w’efula. (Jɔbɔ 37:23; Mateo 10:30; Luka 20:37, 38) Nzambi ekɔ l’akoka wa mbolola wanɛ wakavu, ndo nde nangaka nsala dui sɔ! Lo kɛnɛ kendana la eolwelo ka lo nshi yayaye, Bible mbutaka lo dikambo dia Nzambi ɔnɛ: “Wɛ ayolomɔlomɔ dikambo dia olimu w’anya ayɛ.”​—Jɔbɔ 14:15.

Tokanyi ta kashi tele l’anto lo dikambo dia eolwelo

 Kashi: Eolwelo ekɔ osanganyelo w’anima la demba.

 Mɛtɛ: Bible mbutaka dia anima ekɔ tshondo y’onto, koko aha etenyi kande kɛmɔtshi katetemala nsɛna l’ɔkɔngɔ wa nyɔi. (Etatelo 2:7, nɔtɛ; Ɛzɛkiyɛlɛ 18:4) Onto lambolwama bu osanganyelo w’anima la demba, koko nde ambonyomotongama oko anima wasɛna.

 Kashi: Anto amɔtshi wayolwama wayodiakema mbala kakɔ ɔtɔi.

 Mɛtɛ: Bible mbutaka dia “wanɛ wakasalaka akambo wa kɔlɔ” wayolɔ lo “eolwelo ka kilombo.” (Joani 5:​29) Koko kilombo kɛsɔ kayendana la kɛnɛ kayowosala oma l’ɔkɔngɔ wa vɔ mbolɔ, koko aha l’ɔtɛ wa kɛnɛ kakawasale ntondo. Yeso akate ate: “Edo wayoka dui dia Ɔna Nzambi ndo wanɛ wakadje yimba wayonga la lɔsɛnɔ.” (Joani 5:​25) Wanɛ ‘wadja yimba’ kana wakitanyiya akambo wekawɔ l’ɔkɔngɔ wa vɔ mbolwama, nkombo yawɔ yayofundama lo “dibuku dia lɔsɛnɔ.”​—Ɛnyɛlɔ 20:12, 13.

 Kashi: Etena kolwama onto, onto nongolaka paka woho wa demba diaki la nde la ntondo ka nde mvɔ.

 Mɛtɛ: L’ɔkɔngɔ wa nyɔi, demba di’onto pɔndaka.​—Ondaki 3:​19, 20.