Bible tɛkɛtaka dia ndjasangana asango paka mbala ɔtɔi, lo Akambo w’ase Lɛwi 19:28, divɛsa diata ɔnɛ: “Tanyoyakɔtshakɔtshake mpota.” Nzambi akasha wodja w’Isariyɛlɛ didjango nɛ, lo mbawanganya l’anto wakaadinge wakasangaka alemba awɔ la nkombo ndo sɛmbɔlɛ ya tozambizambi tawɔ. (Eohwelo k’Ɛlɛmbɛ 14:2) Kaanga mbele Akristo bu l’ɛse k’Ɛlɛmbɛ wakawasha wodja w’Isariyɛlɛ, tɔndɔ diele l’ɔlɛmbɛ ɔsɔ sunganaka dia mbidja yimba lɔkɔ.

Onde Okristo pombaka ndjasanga lo demba?

 Avɛsa wayela anɛ mbeyaka kokimanyiya dia nkana yimba lo dikambo sɔ:

•   “Wamato pombaka ndjalɛnga . . . la wɛdimo.” (1 Timothy 2:9, New American Bible) Tɔndɔ sɔ mendanaka la wamato ndo l’apami. Sho pombaka nɛmiya nsaki y’anto akina ndo aha nkotola yambalo y’anto oya le so tshanana.

•   Anto amɔtshi nangaka mɛnya ewɔ ndo ndjayangɛ dipanda, ndo akina ndjasangaka l’alemba dia mɛnya ɔnɛ vɔ mbadikanga. Koko, Bible keketshaka Akristo ɔnɛ: “[Nyolambole] alemba anyu oko olambo wasɛna, w’ekila ndo wetawɔma le Nzambi, olimu w’ekila kaamɛ la akoka anyu w’ekanelo ka yimba.” (Rɔmɔ 12:1) Kamba la “ekanelo [kayɛ] ka yimba” dia nsɛdingola lande na kalangayɛ ndjasanga lo demba. Naka l’ɔtɛ w’ɔnɛ wɛ nangaka ndjela modɛ kɛmɔtshi kana mɛnya dia wɛ ekɔ l’olui kapanda, kete ohɔ dia kanyi yayɛ mbeyaka ndjotshikitana lushi lɔmɔtshi, koko sango dia lo demba diayɛ, diɔ diayotshikala pondjo. Nsɛdingola eyango ayɛ koka kokimanyiya dia mbɔsa yɛdikɔ ya lomba.​—Tokedi 4:7.

•   “Asangwelo wa kanga etete konyaka mɛtɛ lo otondoyelo, koko wanɛ tshɛ wasala akambo la esasesase wayonga wola ndooko onyake.” (Tokedi 21:5) Mbala efula, anto mbɔsaka yɛdikɔ ya ndjasanga asango l’esasesase, koko yɔ koka monga l’etombelo wayotshikala edja lo diɔtɔnganelo diasase l’anto ndo monga la shɛngiya l’awui w’olimu. Ndjasanga demba nɔmbaka falanga efula ndo mbishaka kandji efula dia minya sango oma lo demba. Eyangelo mɛnyaka dia minya asango lo demba oya okanda wa falanga efula, nɛ dia lemba la woke la wanɛ wakayasange lo demba, ndjokombolaka minya asango akɔ.