Eelo, nɛ dia Nzambi nangaka dia anto mbɔtɛmɔla kaamɛ. Bible mbutaka ɔnɛ: “Ndo nyɛsɔ todjanake yimba dia tshutshuyana lo ngandji ndo lo etsha w’ɛlɔlɔ, tatotshikake sanganaka kaamɛ.”​—Hɛbɛru 10:24, 25.

 Yeso akate dia ambeki ande wayohomba monga olui wokongɛmi dimɛna etena kakandawatɛ ate: “Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.” (Joani 13:35) Yoho ya ntondo yɛnyawɔ ngandji kɛsɔ ele, ambeki wa Kristo sanganaka kaamɛ l’asekawɔ ambetawudi. Vɔ wakakongɛma lo tshumanelo dia sanganaka mbala la mbala dia ntɛmɔla. (1 Kɔrɛtɔ 16:19) Lo tshɛ kawɔ, vɔ wekɔ lo kenga nkumbo k’onto l’ɔnango ka l’andja w’otondo.​—1 Petero 2:​17.

Nɔmbamaka akambo efula, koko aha tsho monga l’ɔtɛmwɛlɔ ɔmɔtshi

 Bible mɛnyaka di’anto pombaka nsangana kaamɛ dia ntɛmɔla Nzambi, koko tɔ hate dia onto koka ngɛnyangɛnya Nzambi lo monga tsho l’ɔtɛmwɛlɔ ɔmɔtshi. Dia onto ngɛnyangɛnya Nzambi, ɔtɛmwɛlɔ ande pombaka monga la shɛngiya lo lɔsɛnɔ la nde la lushi la lushi. Ɛnyɛlɔ, Bible mbutaka ɔnɛ: “Ɔtɛmwɛlɔ wele pudipudi ndo waha la vadi lo washo wa Nzambi Shɛso vɔ ɔnɛ: Nkimanyiya ana wa tshike la wadi waki edo lo asui awɔ ndo ndjalama diaha monga la vadi ya l’andja ɔnɛ.”​—Jakɔba 1:​27.