Bible tokeketshaka dia sho nkahɛ anto akina la lolango ndo nsala dui sɔ la ɛkɔkɔ w’eshika. Tɔ mɛnyaka dia kɛsɔ mongaka la wahɔ aha paka le ɔnɛ lakahɛwɔ, koko ndo le ɔnɛ lakaha. (Tokedi 11:25; Luka 6:​38) Yeso akate ate: “Ɔngɛnɔngɛnɔ waya lo mbisha ndeka wa nongola.”​—Etsha 20:35.

•  Etena kakɔna kangɛnangɛna Nzambi la lokaho laso?

•  Etena kakɔna kahangɛnangɛna Nzambi la lokaho laso?

•  Avɛsa wa Bible wendana la lokaho

 Lokaho la la lolango lekɔ la wahɔ efula. Bible mbutaka ɔnɛ: “Onto l’onto akimɔ oko wakanda shikɛ l’otema ande, aha la etema ehende kana lotshutshuya, nɛ dia Nzambi nangaka onto lakimɔ l’ɔngɛnɔngɛnɔ.”​—2 Kɔrɛtɔ 9:7, nɔtɛ ka l’ɛse ka dikatshi.

 Lokaho ekɔ etenyi kɛmɔtshi ka “ɔtɛmwɛlɔ wele pudipudi” wetawɔma le Nzambi. (Jakɔba 1:​27, nɔtɛ ka l’ɛse ka dikatshi) Onto lakaha la lolango dia nkimanyiya wanɛ wele lo dihombo ekɔ lo nsala kɛnɛ kangɛnyangɛnya Nzambi ndo nde ekɔ oko onto lansɔndja Nzambi. (Tokedi 19:17) Bible mbetshaka dia Nzambi ndamɛ ayofuta kanga lokaho.​—Luka 14:12-​14.

 Etena kakaha onto dia nyanga wayɔ ande hita. Ɛnyɛlɔ:

•   Dia mambiyaanto.​—Mateo 6:2.

•   Dia nkondja wahɔ.​—Luka 14:12-14.

•   Dia nsomba panda.​—Osambo 49:6, 7.

 Naka lɔ lekɔ lo nkeketsha kana nsukɛ kɛnɛ katona Nzambi. Ɛnyɛlɔ, hatonga dimɛna mbisha onto ɔmɔtshi akuta dia nde nkɛnya tɔkɛnyɔ ta falanga, dia nde nsomba didjoyadjoya kana mbidjɔ wanu. (1 Kɔrɛtɔ 6:​9, 10; 2 Kɔrɛtɔ 7:1) Woho akɔ wamɛ mbele, hatonga dimɛna nkahɛ onto lele l’akoka wa ndjakotshiyɛ ehomba ande, koko ekɔ lo ntona dia nsala dui sɔ.​—2 Tɛsalɔnika 3:​10.

 Naka tekɔ lo nkahɛ anto akina efula, koko hatokotsha ehomba wa nkumbo kaso. Bible mbetshaka dia ewandji wa nkumbo pombaka nkotsha ehomba w’ase nkumbo yawɔ. (1 Timɔte 5:8) Hatonga dui dia dimɛna dia owandji wa nkumbo mbishaka anto akina diangɔ efula ko kalɛ ase nkumbo kande. Woho akɔ wamɛ mbele, Yeso akahɛmɔla wanɛ wakatonaka dia nkimanyiya ambutshi awɔ waya epalanga lo mbuta ɔnɛ kɛnɛ tshɛ kaki lawɔ kaki “woshasha wambokimɔma le Nzambi.”​—Makɔ 7:​9-​13.