Ndooko, okama aso wa Nkɛtɛ ɔnɛ halanyemaki pondjo, halongoyamaki pondjo kana pɛnyama. Bible tetshaka dia Nzambi akatonge nkɛtɛ di’anto mbidjasɛka lɔkɔ pondjo pondjo.

•   “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.”​—Osambo 37:29.

•   “[Nzambi] akashikikɛ nkɛtɛ lo atshina ayɔ; yɔ hayomɔki oma lo dihole diayɔ pondjo pondjo.”​—Osambo 104:5.

•   “Nkɛtɛ tshikalaka pondjo.”​—Ondaki 1:4.

•   “Ɔnɛ lakasale nkɛtɛ, Otungi ayɔ lakayishikikɛ nge, Laki kondjitonga otongatonga, koko akayikenge dia anto mbidjasɛka lɔkɔ:”​—Isaya 45:18.

 Nzambi hatetawɔ di’anto ndanya nkɛtɛ tshɛ lo tshɛ lo ndanya hiɛlɛlɛ, oma l’ata kana oma lo toho tokina. Koko nde ‘ayolanya wanɛ walanya nkɛtɛ.’ (Ɛnyɛlɔ 11:18) Ngande wayondosala dui sɔ?

 Nzambi ayɔhɛnya mandji y’ana w’anto la Diolelo dia l’olongo dia kokele nɛ dia mandji y’anto hawongi l’akoka wa nkokɛ nkɛtɛ. (Danyɛlɛ 2:44; Mateo 6:9, 10) Diolelo sɔ diayɔlɔmbwama oma le Ɔnaki Nzambi, Yeso Kristo. (Isaya 9:6, 7) Etena kakinde lanɛ la nkɛtɛ, Yeso aki la wolo laadiko wa diangɔ dia wolo diakatongama. (Makɔ 4:35-41) Oko Nkumekanga ka Diolelo diaki Nzambi, Yeso ayonga la lowandji laadiko dia nkɛtɛ ndo dia diangɔ dia lɔkɔ. Nde ayonyomɔlɔngɔsɔla awui wa la nkɛtɛ, ko nkonya awui woho wakiwɔ l’ekambɔ k’Ɛdɛna.​—Mateo 19:28; Luka 23:43.

 Ndooko, tɔ hetsha ngasɔ. Kanyi ya kɔlɔ shɔ ndjaka mbala efula oma lo woho wahashihodia anto kɛnɛ kata 2 Petero 3:7 ɔnɛ: ‘Olongo ndo nkɛtɛ kakianɛ wambolamema dia tshumbama la dja.’ Tɔsɛdingola awui ahende w’ohomba wakoka tokimanyiya dia nshihodia kitshimudi y’ɛtɛkɛta ɛsɔ:

1.   Bible kambaka la tshɛkɛta “olongo,” “nkɛtɛ,” ndo “dja” dia nembetshiya awui efula. Ɛnyɛlɔ, Etatelo 11:1 mbutaka ɔnɛ: “Nkɛtɛ k’otondo kakatɛkɛtaka ɔtɛkɛta ɔtɔi.” Lanɛ, “nkɛtɛ” nembetshiyaka tshunda di’anto.

2.   Avɛsa wodingi 2 Petero 3:7 mɛnyaka kitshimudi y’olongo, ya nkɛtɛ ndo ya dja yɔtɛkɛtami lo divɛsa nɛ. Divɛsa 5 ndo dia 6 mbɛdikaka dui sɔ la Mvula k’elola ka lo nshi ya Nɔa. Lo diaaso sɔ, andja w’edjedja wakalanyema, koko okama aso wa nkɛtɛ kondanyema. Koko Mvula k’elola kakalanya tshunda di’anto wa kɔlɔ kana “nkɛtɛ.” (Etatelo 6:11) Tɔ kakalanya nto woho ɔmɔtshi wa “olongo,” mbuta ate anto wakalɔmbɔlaka tshunda di’anto wa la nkɛtɛ. Anto wa kɔlɔ wakalanyema, koko aha okama aso wa nkɛtɛ. Nɔa la nkumbo kande wakake l’elanyelo k’andja ndo nkɛtɛ l’ɔkɔngɔ wa mvula k’elola.​—Etatelo 8:15-18.

 Woho akɔna waamɛ mbele ashi wa Mvula k’elola, elanyelo, kana “dja” yɔtɛkɛtami lo 2 Peter 3:7 yayokomiya andja w’anto wa kɔlɔ, koko aha okama aso wa Nkɛtɛ. Nzambi ndakaka “olongo w’oyoyo la nkɛtɛ k’oyoyo” lɛnɛ “ayongaka losembwe.” (2 Petero 3:13) “Nkɛtɛ k’oyoyo,” kana tshunda di’oyoyo di’anto, diayɔlɔmbwama oam le “olongo w’oyoyo,” kana ɛlɔmbwɛlɔ k’oyoyo, mbuta ate Diolelo diaki Nzambi. L’ɛlɔmbwɛlɔ ka Diolelo sɔ, nkɛtɛ kayokoma paradiso ka wɔladi.​—Ɛnyɛlɔ 21:1-4.