Waa na watshɔ l’olongo?
Okadimwelo washa Bible
Nzambi akasɔnɛ djui ya tshitshsɛ y’anto wele oma l’ɔkɔngɔ wa nyɔi kawɔ, vɔ wayolwama dia tɔsɛna l’olongo. (1 Petero 1:3, 4) Naka wambɔsɔnama, vɔ pombaka ntetemala nama mbetawɔ kawɔ ndo lɔkɛwɔ lawɔ la pudipudi diaha vɔ ndohandja difuto diawɔ di’otsha l’olongo.— Ɛfɛsɔ 5:5; Filipɛ 3:12-14.
Wanɛ wayotshɔ l’olongo ayowotosala lɛkɔ?
Vɔ wayotolɛ kaamɛ la Yeso oko nkumi ya dikanga ndo ɛlɔmbɛdi l’edja k’ɛnɔnyi kinunu. (Ɛnyɛlɔ 5:9, 10; 20:6) Vɔ wayotokenga “olongo w’oyoyo,” kana lowandji la l’olongo layolɛ “nkɛtɛ k’oyoyo,” mbut’ate anto. Ɛnɔmbodi wa l’olongo ɛsɔ wayosha lonya lo nɔngɔsɔla akambo dia akanga wa losembwe nsɛna lo yoho yakalɔngɔsɔla Nzambi oma lo etatelo.—Isaya 65:17; 2 Petero 3:13.
Anto angana wayolɔ otsha l’olongo?
Bible mɛnyaka dia anto 144 000 mbayolɔ dia tɔsɛna l’olongo. (Ɛnyɛlɔ 7:4) Lo ɛnɛlɔ kele lo Ɛnyɛlɔ 14:1-3, ɔpɔstɔlɔ Joani akɛnyi “Ɔna Ɔkɔkɔ emadi lo Dikona dia Siɔna nde l’anto 144 000.” Lo ɛnɛlɔ kɛsɔ, “Ɔna Ɔkɔkɔ” ekɔ Yeso ɔnɛ lakolwama. (Joani 1:29; 1 Petero 1:19) “Dikona dia Siɔna” nembetshiyaka dihole dia kɛnɛmɔ diele la Yeso nde la anto 144 000 wayolɛ la nde l’olongo.—Osambo 2:6; Hɛbɛru 12:22.
Wanɛ “wakelamɛ ndo wakasɔnama” dia mbolɛ kaamɛ la Kristo lo Diolelo mbelamɛka “leemba la tshitshɛ l’ɛkɔkɔ.” (Ɛnyɛlɔ 17:14; Luka 12:32) Kɛsɔ mɛnyaka dia lo mbaɛdiaka la lofulo l’ɛkɔkɔ ekina waki Yeso, vɔ wayonga yema tshitshɛ.—Joani 10:16.
Kɛnɛ kafɔnya anto lo dikambo dia wanɛ wayotshɔ l’olongo
Kanyi ya kashi: Anto tshɛ w’ɛlɔlɔ wayotshɔ l’olongo.
Kɛnɛ kele mɛtɛ: Nzambi mbishaka daka di’ɔnɛ anto w’ɛlɔlɔ wayonga la lɔsɛnɔ la pondjo pondjo lanɛ la nkɛtɛ.—Osambo 37:11, 29, 34.
Yeso akate ate: “Ndooko onto lakadɛ l’olongo.” (Joani 3:13) Diakɔ diele, nde akɛnya di’anto w’ɛlɔlɔ wakavu la ntondo kande, ɛnyɛlɔ Abrahama, Mɔsɛ, ndo Davidɛ kotshɔ l’olongo. (Etsha 2:29, 34) Koko, vɔ waki la elongamelo dia wayolɔ dia nsɛna lanɛ la nkɛtɛ.—Jɔbɔ 14:13-15.
Eolwelo ka lɔsɛnɔ la l’olongo mbelamɛka ɔnɛ “eolwelo ka ntondo.” (Ɛnyɛlɔ 20:6) Kɛsɔ mɛnyaka dia eolwelo kahende kayonga. Tɔ kayonga eolwelo ka lɔsɛnɔ la la nkɛtɛ.
Bible mbetshaka dia l’ɛlɔmbwɛlɔ ka Diolelo dia Nzambi, “nyɔi hatoyala nto.” (Ɛnyɛlɔ 21:3, 4) Daka sɔ diayokotshama la nkɛtɛ nɛ dia nyɔi hongaka l’olongo.
Kanyi ya kashi: Onto tshɛ sɔnaka dia kana nde ayolanga nsɛna l’olongo kana la nkɛtɛ.
Kɛnɛ kele mɛtɛ: Nzambi ndamɛ mbasɔna Akristo wayolongola “difuto dia leeta l’otsha la diko,” mbut’ate elongamelo ka lɔsɛnɔ l’otsha l’olongo. (Filipɛ 3:14) Aha lo ndjela nsaki kana lolango lande mbasɔnama onto.—Mateo 20:20-23.
Kanyi ya kashi: Elongamelo ka nsɛna la nkɛtɛ bu la nɛmɔ, tɔ mbishamaka paka le wanɛ wahasungana ntshɔ l’olongo.
Kɛnɛ kele mɛtɛ: Nzambi mbelɛka wanɛ wayonga la lɔsɛnɔ la nkɛtɛ ɔnɛ “anto ami,” “ɛsɔnami ami,” ndo ɔnɛ wanɛ “wakatshɔkwama oma le Jehowa.” (Isaya 65:21-23) Vɔ wayokondja diaaso dia nkotsha sangwelo diaki Nzambi lo dikambo di’anto mbuta ate monga la lɔsɛnɔ la pondjo ndo la kokele lo paradiso ka la nkɛtɛ.—Etatelo 1:28; Osambo 115:16; Isaya 45:18.
Kanyi ya kashi: Lofulo l’anto 144 000 latanema lo mukanda wa Ɛnyɛlɔ lekɔ lofulo la didjidji, koko aha la mɛtɛ mɛtɛ.
Kɛnɛ kele mɛtɛ: Kanga mbele mukanda wa Ɛnyɛlɔ wekɔ la toshifidi ta didjidji, tɔmɔtshi ta l’atei atɔ tekɔ lo yoho ya mɛtɛ mɛtɛ. Ɛnyɛlɔ vɔ shilaka “nkombo 12 ya apɔstɔlɔ 12 wa Ɔna Ɔkɔkɔ.” (Ɛnyɛlɔ 21:14) Tɔsɛdingole tolembetelo tɛnya dia lofulo la 144 000 lekɔ lofulo la mɛtɛ mɛtɛ.
Ɛnyɛlɔ 7:4 mbutaka “lofulo la wanɛ wakadjama djembetelo [kana wanɛ wambetawɔma dia tɔsɛna l’olongo], anto 144 000.” Koko lo ndjela avɛsa wayela, vɔ tɛkɛtaka nto dikambo dia olui wa hende wotshikiyanyi la wa ntondo lo mbuta ɔnɛ: “Olui a woke w’anto wele ndooko onto lakoka mbadia.” Anto wa lo “olui a woke” vɔ lawɔ panda kawɔ ndja oma le Nzambi. (Ɛnyɛlɔ 7:9, 10) Naka lofulo la 144 000 laki la didjidji, kete bu ohomba nshila nto lofulo la woke laheyama mbadia ndo bu ohomba mbɛdika elui akɔ ehende lo kɛnɛ kendana la lofulo. *
Ndo nto, Bible mbutaka lo dikambo di’anto 144 000 dia “vɔ wakasombama oma l’atei w’anto oko ɛlɔnga.” (Ɛnyɛlɔ 14:4) Etelo k’ɔnɛ “ɛlɔnga” mɛnyaka yema y’anto tshitshɛ wakasɔnama. Tɔ kambemaka lo dikambo dia wanɛ wayolɛ anto wele lofulo lawɔ heyama mbedika lanɛ la nkɛtɛ, kamɛ la Kristo.—Ɛnyɛlɔ 5:10.
^ Lo kɛnɛ kendana la lofulo la 144 000 lɔtɛkɛtami lo Ɛnyɛlɔ 7:4, prɔfɛsɛrɛ Robert L. Thomas akafunde ate: “Lɔ lekɔ lofulo la shikaa lotshikitanyi la lofulo laheyama shikaa la lo Ɛnyɛlɔ 7:9. Naka lofulo lakɔ mbɔsama lo woho wa didjidji, kete ndooko lofulo la lo dibuku sɔ lahomba mbɔsama yo woho wa mɛtɛ mɛtɛ.”—Revelation 1-7: An Exegetical Commentary, lɛkɛ 474.
Enda ndo lo...
ESSENTIAL BIBLE TEACHINGS
Diolelo diaki Nzambi kɛdikɛdi na?
Lam’akandakambaka olimu ande lanɛ la nkɛtɛ, Yeso aketsha awui wendana la Diolelo diaki Nzambi oleki awui akina tshɛ. Aya ɛnɔnyi nkama walɔmba anto dia Diolelo sɔ ndja.
