Onde Nzambi ekɔ dihole tshɛ, ndo wonya tshɛ?
Okadimwelo washa Bible
Nzambi koka mɛna ɛngɔ tshɛ ndo nsala kɛnɛ tshɛ kalangande. (Tokedi 15:3; Hɛbɛru 4:13) Koko, Bible hetsha dia Nzambi ekɔ dihole tshɛ, mbuta ate nde ndjalaka dihole tshɛ, ndo lo diangɔ tshɛ. Koko tɔ nembetshiyaka ɔnɛ Nzambi ekɔ onto la mɛtɛ, ndo ladjasɛ lo dihole dia shikaa.
Woho wele Nzambi: Nzambi ekɔ nyuma. (Joani 4:24) Anto hawokoke mbɛɛna. (Joani 1:18) Etena katɛkɛtawɔ dia Nzambi lo waɛnɛlɔ wa lo Bible, nde ekɔ lo mɛnyama lo dihole dimɔ shikaa, koko aha oko onto lele dihole tshɛ.—Isaya 6:1, 2; Ɛnyɛlɔ 4:2, 3, 8.
Dihole diadjasɛ Nzambi: Nzambi mbidjasɛka l’andja wa lo nyuma wotshikitanyi l’andja wɛnama. L’andja wa lo nyuma ɔsɔ, Nzambi ekɔ ‘l’olongo lɛnɛ adjasɛnde.’ (1 Nkumi ya dikanga 8:30) Bible tɛkɛtaka dia lo diaaso dimɔtshi, ditongami dia lo nyuma “[wak]ɔtɔ dia temala la ntondo ka Jehowa,” * kɛsɔ mɛnyaka dia Nzambi mbidjasɛka lo dihole dimɔtshi dia shikaa.—Jɔbɔ 1:6.
Naka Nzambi bu wonya tshɛ, onde nde koka ndjakiyanya dikambo diami?
Eelo. Nzambi ndjakiyanyaka efula dikambo d’anto. Kaanga mbadjasɛnde l’andja wa lo nyuma, Nzambi mbeyaka wanɛ wele la nkɛtɛ walanga mɛtɛ mbɔngɛnyangɛnya ndo nde mbakimanyiyaka. (1 Nkumi ya dikanga 8:39; 2 Ɛkɔndɔ 16:9) Tende woho wɛnya Jehowa dia nde ndjakiyanyaka dikambo dia wanɛ wɔtɛmɔla l’otema ɔtɔi:
Etena kalɔmbayɛ: Jehowa mbokaka alɔmbɛlɔ ayɛ wonya walɔmbayɛ.—2 Ɛkɔndɔ 18:31.
Etena kamboyɔkɔmɔ: “Jehowa ekɔ suke la wanɛ wele l’etema wambatɛ, nde shimbɛka wanɛ wele la lɔkɔnyɔ lo yimba.”—Osambo 34:18.
Etena keyɛ l’ohomba w’ɛlɔmbwɛlɔ: Jehowa ‘ayokosha shɛnɔdi ndo ayokɛnya mboka’ lo tshimbo y’Ɔtɛkɛta ande, Bible.—Osambo 32:8.
Tokanyi ta kɔlɔ tele l’anto lo kɛnɛ kendana la monga dihole tshɛ
Kanyi ya kɔlɔ: Nzambi ekɔ dihole tshɛ l’andja.
Kɛnɛ kele mɛtɛ: Nzambi bu la nkɛtɛ kana dihole dikina l’andja wɛnama. (1 Nkumi ya dikanga 8:27) Ekɔ mɛtɛ dia tɔɔtɔ ndo diangɔ dikina diakatongama “[di]ekɔ lo nsanya lotombo la Nzambi.” (Osambo 19:1) Ɔnkɔnɛ, Nzambi hakoke mbidjasɛ l’etongelo kande oko wele okitshi wa mukubu hakoke mbidjasɛ lo dibaya diande. Dibaya diokitami mukubu koka lo yoho mɔtshi tetsha akambo efula wendana la osadi adiɔ. Woho akɔ waamɛ mbele, andja wɛnama tetshaka awui efula lo kɛnɛ kendana la “waonga ande wahɛnama” waki Otungi wele oko wolo, lomba, ndo ngandji.—Rɔmɔ 1:20.
Kanyi ya kɔlɔ: Nzambi pombaka monga dihole tshɛ l’oyango wa nde mbeya akambo tshɛ ndo dia nde monga kanga-wolo-tshɛ.
Kɛnɛ kele mɛtɛ: Nyuma k’ekila ka Nzambi, kana wolo ande wakamba olimu ekɔ wolo wa Nzambi wɛnama lo kɛnɛ kasalande. L’ekimanyielo ka nyuma kande k’ekila, Nzambi koka mɛna ndo nsala dui tshɛ, dihole tshɛ ndo wonya tshɛ aha la nde monga lɛkɔ.—Osambo 139:7.
Kanyi ya kɔlɔ: Osambo 139:8 mbetshaka dia Nzambi ekɔ dihole tshɛ lo mbuta ɔnɛ: “Naka dimi mbidɛ l’olongo, wɛ ayonga lɛkɔ, ndo naka dimi nsala mbeto kami lo Diombo, wɛ ayonga lɛkɔ.”
Kɛnɛ kele mɛtɛ: Divɛsa nɛ hatɛkɛta dikambo dia dihole diodjashi Nzambi. Ɛtɛkɛta wa lɔlɛnga ɛsɔ tetshaka dia ndooko dihole diele etale diahakoke Nzambi tokimanyiya.
^ Jehowa mbele lokombo la Nzambi oko wɛnyamidiɔ lo Bible.
Enda ndo lo...
WETSHELO W’OHOMBA WA LO BIBLE
Onde Nzambi ekɔ onto la mɛtɛ?
Sɛdingola tolembetelo tɛnya dia monga la mbetawɔ le Nzambi ekɔ dui dia dimɛna.
EKADIMWELO LO AMBOLA W’OMA LO BIBLE
Nyuma k’ekila kɛdikɛdi na?
Bible kekɔ l’ɔkɔkɔ w’oshika wa mbelɛ nyuma k’ekila ɔnɛ “anya” wa Nzambi
AWUI WENDANA LA SO
Lɔmba dia onto ɔmɔtshi ndjokenda
Nyɔkɛtshanya dimbola dimɔtshi di’oma lo Bible, kana nyɔkɛtshanya awui efula wendana la Ɛmɛnyi wa Jehowa.