Ndooko, ɛtɛmwɛlɔ tshɛ bu woho ɔtɔi. Bible mbishaka bɛnyɛlɔ efula di’ɛtɛmwɛlɔ wahangɛnyangɛnya Nzambi. Sho koka nkahanya ɛtɛmwɛlɔ lo elui ehende wa weke.

Olui wa 1: Ɛtɛmwɛlɔ watɛmɔla nzambi ya kashi

 Bible mɛnyaka di’ɔtɛmwɛlɔ wa nzambi ya kashi dia wekɔ “anyanya,” ndo oko “diangɔ di’anyanya, diele bu ohomba ndo diaha la wahɔ.” (Jɛrɛmiya 10:3-5; 16:19, 20) Jehowa a akadjangɛ wodja w’Isariyɛlɛ ate: “Toyalake la nzambi nkina laadiko diami.” (Etombelo 20:3, 23; 23:24) Ndo “Jehowa akomalɛ[ka] ase Isariyɛlɛ” mbala tshɛ kakatɛmɔlaka ase Isariyɛlɛ nzambi nkina.​—Walelo 25:3; Akambo w’ase Lɛwi 20:2; Embadi 2:13, 14.

 Ngasɔ mbɔsa nzambi nshi tshɛ ɔtɛmwɛlɔ wa “wanɛ welamɛ nzambi.” (1 Kɔrɛtɔ 8:5, 8; Ngalatiya 4:8) Nde mbidjangɛka anto walanga mbɔtɛmɔla diaha mbekesanɛ l’ase ɛtɛmwɛlɔ wa kashi. “Nyomɔ lale anto asɔ ndo nyangane la wɔ etale.” (2 Kɔrɛtɔ 6:14-17, Parole de Vie) Onde Nzambi otosha didjango sɔ otondongaka ɛtɛmwɛlɔ tshɛ wekɔ woho ɔtɔi ndo konyaka le nde?

Olui wa 2: Ɛtɛmwɛlɔ watɛmɔla Nzambi ka mɛtɛ lo yoho yahandetawɔ

 Mbala mɔtshi, ase Isariyɛlɛ wakatɛmɔlaka Nzambi lo mamba waetawɔ ndo ditshelo di’oma l’ɔtɛmwɛlɔ wa nzambi ya kashi. Koko Jehowa akatonaka woho wakalangaka nsɔhanya ɔtɛmwɛlɔ wa mɛtɛ la wa kashi. (Etombelo 32:8; Eohwelo k’Ɛlɛmbɛ 12:2-4) Yeso akaanya ewandji w’ɛtɛmwɛlɔ wa dungi pende wa lo nshi yande l’ɔtɛ wa yoho yakawatɛmɔlaka Nzambi. Kaanga mbakawayaɛnyaka oko anto wamamema Nzambi, vɔ ‘wakanyaka yimba lo awui woleki ohomba wa lo Ɛlɛmbɛ, mbuta ate losembwe, kɛtshhi ndo kɔlamelo.’​—Mateo 23:23.

 Popo nd’ɛlɔ, paka ɔtɛmwɛlɔ wayaɛkɛ l’akambo wa mɛtɛ mbalɔmbɔla anto otsha le Nzambi. Akambo wa mɛtɛ asɔ tanemaka lo Bible. (Joani 4:24; 17:17; 2 Timɔte 3:16, 17) Ɛtɛmwɛlɔ wele wetshelo awɔ ndɔshanaka la Bible manganyaka anto la Nzambi. Wetshelo efula wafɔnya anto di’oma lo Bible mboyewɔ (ɛnyɛlɔ, wetshelo wa Losato l’osanto, wetshelo w’ɔnɛ anima havu ndo w’asui wa pondjo) ndja oma l’ɔtɛmwɛlɔ wa nzambi ya kashi. Ɔtɛmwɛlɔ wetsha awui asɔ ‘bu ohomba’ nɛ dia vɔ wambɔhɛnya wadjango waki Nzambi la awui w’ashidi​—Makɔ 7:7, 8.

 Nzambi petshaka lɔkɛwɔ la dungi pende lele l’ɛtɛmwɛlɔ. (Tito 1:16) Dia nkimanyiya dia ndjasukanya la Nzambi, ɔtɛmwɛlɔ pombaka monga la shɛngiya lo nsɛnɔ yawɔ nshi tshɛ, koko aha ndjashaka paka l’awui wa kutimɛ. Ɛnyɛlɔ, Bible ɔnɛ: “Naka onto mbɔsaka dia nde ekɔ lo ntɛmɔla Nzambi koko hombe onyɔ ande, nde ekɔ lo ndjakesa l’otema ande, ndo ɔtɛmwɛlɔ ande wekɔ anyanya. Ɔtɛmwɛlɔ wele pudipudi ndo waha la vadi lo washo wa Nzambi Shɛso vɔ ɔnɛ: Nkimanyiya ana wa tshike la wadi waki edo lo asui awɔ ndo ndjalama diaha monga la vadi ya l’andja ɔnɛ.” (Jakɔba 1:26, 27) Ekadimwelo k’andja w’oyoyo kambaka la etelo k’ɔnɛ “ɔtɛmwɛlɔ wa pudipudi,” dia ntɛkɛta di’ɔtɛmwɛlɔ wele bula dungi pende.