Onde Nzambi akakambe la ohilwelo dia ntonga weho wa diangɔ diasɛna?
Okadimwelo washa Bible
Ndooko. Bible mbutaka hwe dia Nzambi akatonge anto ndo «weho» wa waa nyama ndo w’esongo. a (Etatelo 1:12, 21, 25, 27; Ɛnyɛlɔ 4:11) Tɔ mbutaka dia nkumbo k’anto k’otondo ndja oma le Adama la Eva, ambutshi aso wa ntondo. (Etatelo 3:20; 4:1) Ɔkɔndɔ wa lo Bible hawosukɛ wetshelo w’ɔnɛ Nzambi akakambe la ohilwelo dia ntonga weho wa diangɔ diasɛna, wetshelo welɛwɔ mbala mɔtshi ɔnɛ ohilwelo. Oma lɔkɔ, ndooko dui dia lo Bible dianya ɔnɛ koka monga woho ɔmɔtshi w’etongelo kokaka ndjahiloya, oko wadiɛnya ase siansɛ. b
Onde Nzambi akakambe la ohilwelo?
“Anto wetawɔ dia Nzambi akakambe la ohilwelo dia ntonga diangɔ diele la lɔsɛnɔ mongaka la tokanyi totshikitanyi dia nembetshiya dui sɔ.” Lo ndjela Encyclopædia Britannica, etelo kɛsɔ mbelaka kanyi y’ɔnɛ “Nzambi kambaka paka la diangɔ diambongaka l’andja dia nsala diangɔ dikina.”
Wanɛ wetsha wetshelo w’ohilwelo mbetshaka nto awui wayela anɛ :
Diangɔ tshɛ diele la lɔsɛnɔ ndja oma le wa tshɛtshɛso wanɛ waki la lɔsɛnɔ deko aha nɛ.
Nyoho mɔtshi ya lɔsɛnɔ kokaka ntondja yoho kina ya lɔsɛnɔ.
Ondo Nzambi mbalasala woho w’akambo salema yoho yewɔ lo salema.
Onde wetshelo w’ohilwelo mbɔtɔnɛka la wetshelo wa lo Bible?
Wanɛ wetsha wetshelo w’ohilwelo mbutaka dia ɔkɔndɔ wendana la etongelo, wele lo Etatelo bu tshɛ mɛtɛ. Etena kele Yeso akɛnya di’ɔkɔndɔ wa lo Etatelo ekɔ wa mɛtɛ. (Etatelo 1:26, 27; 2:18-24; Mateo 19:4-6) Bible mbutaka dia la ntondo ka nde ndja lanɛ la nkɛtɛ, Yeso akasɛnaka l’olongo ndo nde akasha lonya l’otongelo wa ‘diangɔ dikina tshɛ.’ (Joani 1:3) Oma lɔkɔ, kanyi y’ɔnɛ Nzambi akakambe la ohilwelo dia ntonga weho wa diangɔ diasɛna hɔtɔnɛ kaanga yema la wetshelo wa lo Bible.
Ko kayotota dia dikoka diele la esongo ndo la waa nyama dia ndjaekesanyiya?
Bible hashikikɛ polo lo yɛdikɔ yakɔna yakoka yoho mɔtshi ya lɔsɛnɔ mpilɔ. Koko tɔ hanya woho wakoka weho ɛmɔtshi wa diangɔ diasɛna ndjatshikitanya ndo woho wakoka weho ɛmɔtshi w’esongo wakatonge Nzambi ndjaototoya kana ndjaekesanyiya la weho ɛmɔtshi w’ahole w’eyoyo. Kaanga mbɔsa anto amɔtshi dia tshelo shɔ yekɔ ohilwelo, teye dia diangɔ hadiotondja yoho y’oyoyo y’ɛngɔ kasɛna.
a Lo ɔtɛkɛta wa ntondo, tshɛkɛta «weho» lo avɛsa anɛ nembetshiyaka awui efula oleki elembetshiyelo washa ase siansɛ. Mbala efula, etena katɛkɛta ase siansɛ di’ohilwelo wa woho ɔmɔtshi w’ɛngɔ kasɛna, vɔ nangaka ntɛkɛtaka dia woho watshikitana ɛngɔ kakɔ paka oko watɛkɛta ɔkɔndɔ wa lo Etatelo.
b This concept is sometimes referred to as microevolution.
Enda ndo lo...
WETSHELO W’OHOMBA WA LO BIBLE
Onde andja wakatongama?
Mbala efula anto hawoshihodia ɛkɔndɔ wa lo Bible ndo efula tonaka ndo mbutaka dia ɛkɔndɔ ɛsɔ wekɔ toshimu t’anyanya. Ko onde kɛnɛ kata Bible kekɔ mɛtɛ?
AMBOLA WALEKA ANTO NDJAOKA
Onde wɛ mbetawɔka dia diangɔ tshɛ diakatongama lo nshi shamalo yele la wenya akumi ahende l’ɛnɛi?
Onde wɛ mbeyaka dia wetshelo ɛmɔtshi wetsha anto lo kɛnɛ kendana la etongelo hɔtɔnɛ la kɛnɛ ketsha Bible?
AWUI WENDANA LA SO
Lɔmba dia onto ɔmɔtshi ndjokenda
Nyɔkɛtshanya dimbola dimɔtshi di’oma lo Bible, kana nyɔkɛtshanya awui efula wendana la Ɛmɛnyi wa Jehowa.