Onde Bible koka kokimanyiya dia wɛ ndjayaoka dimɛna etena kayaɛndjayɛ onongo?
Okadimwelo washa Bible
Eelo. Bible koka tokimanyiya dia ndɔshana la lomba tshɛ la tokanyi ta ndjaɛndja onongo. (Osambo 32:1-5) Naka takasale dui dimɔtshi dia kɔlɔ ko takayatshumoya l’otema ɔtɔi, kete Nzambi ayotodimanyiya ndo ayotokimanyiya diaha ndjaɛndja onongo. (Osambo 86:5) Bible mɛnyaka dia tokanyi ta ndjaɛndja ongo koka monga dimɛna lo tena dimɔtshi, nɛ dia tɔ koka tokimanyiya dia sho ntshika nsala kɛnɛ kele kɔlɔ ndo aha kikalolɛ nto. (Osambo 51:17; Tokedi 14:9) Kɛsɔ nangaka mbuta dia Bible tondjangɛka diaha ndjaɛndja onongo amboleka, ondo polo ndo ndjotokonya diaha monga l’elongamelo ndo ndjoyaɛna diele oko sho bu la nɛmɔ lo washo wa Nzambi. Naka sho ndjaoka ngasɔ, dui sɔ koka ndjotokonya dia monga la “lonyangu l’efula”—2 Kɔrɛtɔ 2:7.
Kakɔna kakoka tokonya dia ndjaɛndja onongo?
Ekɔ awui efula wakoka tokonya dia ndjaɛndja onongo. Sho koka ndjaɛndja onongo etena kambotonyangiya onto ɔmɔtshi lokaso ngandji ndo etena keso hatosadi kɛnɛ kakatahombi nsala. Lo tena dimɔtshi, sho koka ndjaɛndja onongo etena kele sho ndooko l’ɔkɔkɔ wa nsala dui sɔ. Ɛnyɛlɔ, naka sho nyanga dia nsala akambo lo yoho ya kokele ndo etena kele hatokotshisha oyango ɔsɔ, sho koka ndjoyaɛndja onongo. Diakɔ diele, Bible tokeketshaka dia sho monga la wɛdimo.—Ondaki 7:16.
Ngande wakokaso ndɔshana la tokanyi ta ndjaɛndja onongo?
Lo dihole dia nshisha elongamelo kana ndjaɛndja onongo, nsala kɛnɛ kakokayɛ nsala dia nɔngɔsɔla akambo. Ngande?
Etawɔ wandja ayɛ. Lɔmba Jehowa * Nzambi dia kodimanyiya. (Osambo 38:18; Luka 11:4) Onga l’eshikikelo dia Nzambi ayokohokamɛ naka wɛ ndjatshumoya l’otema ɔtɔi ndo nsala la wolo diaha kalolɛ munga kakɔ nto. (2 Ɛkɔndɔ 33:13; Osambo 34:18) Otshikitanyi l’ana w’anto, Jehowa mɛnaka kɛnɛ kele l’etei k’otema w’onto. Etena kɛna Nzambi welo wadjaso dia ntshika dia nsala kɛnɛ kele kɔlɔ, “nde ekɔ la kɔlamelo ndo ɔlɔlɔ nde ayotodimanyiya.”—1 Joani 1:9; Tokedi 28:13.
Koko, naka wɛ akasalɛ onto ɔmɔtshi dui dimɔtshi dia kɔlɔ, wɛ pombaka mbetawɔ munga kayɛ ndo nɔmba onto akɔ edimanyielo l’otema ɔtɔi. Dui sɔ bu ɔtɔmbɔ l’esɔ! Dui sɔ nɔmbaka dia monga la dihonga ndo l’okitshakitsha. Koko naka wɛ nɔmba edimanyielo ka l’otema ɔtɔi, kɛsɔ ayonga l’etombelo w’amɛna lo akambo ahende w’ohomba anɛ: Wɛ ayoyaoka dimɛna ndo wɛ ayonga la wɔladi wa l’etei k’otema.—Mateo 3:8; 5:23, 24.
Kana yimba la avɛsa wa lo Bible wa ntɛkɛta dia edimanyielo ka Nzambi. Ɛnyɛlɔ, tɔsɛdingole 1 Joani 3:19, 20. Bible mbutaka lo divɛsa diakɔ ɔnɛ: “Etema aso taanyaka.” Diakɔ diele, sho koka monga awui wolo le so amboleka ndo sho koka ndjɔfɔnya dia hatosungana dia Nzambi tooka ngandji. Koko divɛsa diakɔ mbutaka nto dia “Nzambi ndeka etema aso woke.” Lo ngande? Nde mbeyaka dui tshɛ diendana la so ndo nde mbeyaka dimɛna dimɛna tokanyi taso ndo wɛɔdu aso. Nde mbeyaka dia takootɔ anto wele bu kokele, diakɔ diele sho kotwamaka dia nsala kɛnɛ kele kɔlɔ. * (Osambo 51:5) Nde hatone pondjo wanɛ wayakiyanya l’otema ɔtɔi l’ɔtɛ wa monga yawɔ.—Osambo 32:5.
Aha ntetemala nkanyiya lo dikambo dia munga ya lo nshi yakete. Bible kekɔ l’ɛkɔndɔ efula w’apami la wamato wakasale kɛnɛ kele kɔlɔ, koko l’ɔkɔngɔ wakayotshikitanyaka oma lo yoho yawɔ ya lɔsɛnɔ. Ɛnyɛlɔ, Saolo k’ose Taraso, lakayokomaka ɔpɔstɔlɔ Pɔɔlɔ. Etena kakinde Ofarisɛ, l’esehe tshɛ nde akahɛnyahɛnyaka ambeki wa Yeso. (Etsha 8:3; 9:1, 2, 11) Koko l’ɔkɔngɔ, etena kakandayeyaka dia nde ekɔ lo ndɔshana la Nzambi ndo la Mɛsiya kana Kristo, nde akayatshumoya ndo akatshikitanya yoho yande ya lɔsɛnɔ ndo akayokomaka Okristo washa ɛnyɛlɔ k’ɔlɔlɔ. Eelo, Pɔɔlɔ aki la lonyangu l’efula lo menda kɛnɛ kakandasale, koko nde kombika washo lo munga yande ya lo nshi yakete. Nde aki l’eshikikelo dia Nzambi akawodimanyiya. Pɔɔlɔ akayokomaka osambisha wele l’ohetoheto ndo nde koshisha elongamelo ka lɔsɛnɔ la pondjo.—Filipɛ 3:13, 14.
Avɛsa wa lo Bible lo dikambo dia tokanyi ta ndjaɛndja onongo ndo di’edimanyielo
Osambo 51:17: “Otema wambatɛ ndo wambatshatshema, Nzambi le, wɛ hatotona.”
Kɛnɛ kalembetshiya dui sɔ: Naka wɛ akasale pɛkato ndo akayatshumoya l’otema ɔtɔi l’ɔtɛ wakayanyangiya Nzambi, nde hatokotona ndo nde ayokodimanyiya.
Tokedi 28:13: “Ɔnɛ lashɛ kɔlɔ yande hatolowana, koko ɔnɛ lashola ndo latshika kɔlɔ yande ayokama kɛtshi.”
Kɛnɛ kalembetshiya dui sɔ: Naka sho mbetawɔ pɛkato yaso ndo ntshikitanya yoho yaso ya lɔsɛnɔ, kete nde ayotodimanyiya.
Jɛrɛmiya 31:34: “Dimi layowadimanyiya munga kawɔ ndo hantohɔ pɛkato yawɔ nto.”
Kɛnɛ kalembetshiya dui sɔ: Etena katodimanyiya Nzambi, nde hohɔ munga yaso nto. Nde dimanyiyaka l’otema ɔtɔi.
^ Jehowa mbele lokombo la mɛtɛ laki Nzambi.—Etombelo 6:3.
^ Kanyi ya nsala kɔlɔ yakatahowɔ ekɔ etombelo w’oma lo kɔlɔ kakasale pami ka ntondo, Adama. Nde la wadɛnde Eva wakasalɛ Nzambi kɔlɔ ndo wakashisha eongelo k’anto wa kokele kakahombe anawɔ ndjokondja.—Etatelo 3:17-19; Rɔmɔ 5:12.
