Bible hakambe l’etelo k’ɔnɛ “ntondja diemi” dia nembetshiya otondjelo waha la lolango w’ɔna lambotatɛ kengama l’otema. Koko, avɛsa wa Bible efula mɛnyaka woho wɔsa Nzambi lɔsɛnɔ l’onto, mbidja ndo ɔna lele atotɔ.

 Lɔsɛnɔ lekɔ woshasha w’oma le Nzambi. (Etatelo 9:6; Osambo 36:9) Nde mbɔsaka lɔsɛnɔ tshɛ dia lɔ lekɔ la nɛmɔ, mbidja ndo lɔsɛnɔ l’ɔna lele l’otema. Diakɔ diele, naka onto ambodiaka la lolango ɔna lele l’otema, kete nde ambodiaka onto.

 Ɛlɛmbɛ wakasha Nzambi ase Isariyɛlɛ mbutaka ɔnɛ: “Naka apami walɔ ta ko ɔmɔtshi ambosakanya womoto lele la diemi ko ɔna ambotomba osondjo, koko ndooko onto lokadi waale, kete nde pombaka mfuta kɛnɛ kayɔlɔmba omi aki womoto akɔ, ndo nde pombaka kifuta lo tshimbo ya toshushi. Ko naka onto ambokala waale, kete wɛ pombaka nsɔmbɔya lɔsɛnɔ lo lɔsɛnɔ.”​—Etombelo 21:22, 23. a

•  Etena kakɔna katatɛ lɔsɛnɔ l’onto?

•  Onde Nzambi koka dimanyiya onto lambotondjaka diemi?

•  Onde ekɔ kɔlɔ ntondja diemi naka lɔsɛnɔ la mama kana l’ɔna lekɔ lo waale?

 Kam’onga womoto la diemi, lo washo wa Nzambi lɔsɛnɔ l’onto lambotatɛ. L’ɔtɛkɛta ande Bible, Nzambi mɛnyaka dia nde mbɔsaka ɔna lele atotɔ dia nde ekɔ onto. Tɔsɛdingole bɛnyɛlɔ dimɔtshi diɛnya dia le Nzambi otshikitanu bu lam’asa lɔsɛnɔ l’ɔna lele l’otema la ɔnɛ lamboshila mbotɔ.

•   Nkumekanga Davidɛ akatshutshuyama la nyuma k’ekila dia mbutɛ Nzambi ate: “Washo ayɛ wakamɛnyi kaanga lam’akimi eholoko.” (Osambo 139:16) Nzambi akatatɛ mbɔsa Davidɛ oko onto kaanga la ntondo ka nde mbotɔ.

•   Ndo to, Nzambi akeyeka dia nde ayonga la sangwelo dimɔtshi dia laande lo kɛnɛ kendana la onvutshi Jɛrɛmiya la ntondo ka Jɛrɛmiya mbotɔ. Nzambi akawotɛ ate: “Dimi lakakeye la ntondo ka dimi kokenga lo otema, ndo dimi lakakokidia la tondo ka wɛ mbotɔ. Dimi lakaketɛ onvutshi wa wedja.”​—Jɛrɛmiya 1:5.

•   Ofundji wa mukanda wa Luka wa lo Bible, laki onganga, akakambe la tshɛkɛta yakɔ yamɛ dia ntɛkɛta dikambo di’ɔna lele l’otema ndo di’ɔna leke kambotɔ.​—Luka 1:41; 2:12, 16.

 Nzambi koka dimanyiya wanɛ wambotondjaka diemi. Naka vɔ mbetawɔ dia mbɔsa lɔsɛnɔ oko waliɔsa Nzambi, kete nkum’otema kawɔ hɔhɛnyahɛnyama. “Jehowa ekɔ lokana kɛtshi ndo lokana kandji . . . Oko wanganyi ehotwelo la edjelo ka wonya etale, ngasɔ mbakandanganya kɔlɔ yaso etale la so.” b (Osambo 103:8-12) Jehowa ayodimanyiwa wanɛ tshɛ wambokadimola otema oma lo pɛkato yawɔ, mbidja ndo otondjelo wa diemi.​—Osambo 86:5.

 Kɛnɛ kata Bible lo dikambo diendana la lɔsɛnɔ l’ɔna leke l’otema mɛnyaka dia onto hakoke nyanga tɛkɛ nɛndɛ lo ntondja diemi l’ɔtɛ wa waale wakoka nkomɛ mama kana ɔna.

 Ko kayotota naka lo ntena dimɔtshi l’etena kotɔ ɔna dikambo dimɔtshi dia w’anyandja diambotomba ndo wambotɔlɔmba dia sho nsala ɔsɔnwɛlɔ lam’asa nshimbɛ lɔsɛnɔ l’onto ɔmɔtshi, mbuta ate lɔsɛnɔ la mama kana la ɔna? Lo ntena dia ngasɔ wanɛ wambohomana la dikambo diakɔ mbele la lotshungɔ la ndjaɔsɛ yɛdikɔ lo kɛnɛ kendana la lɔsɛnɔ lakokawɔ nkokɛ ntondo.