Lo woho akɔna wele olambo wa Yeso wekɔ “oshinga w’etshungwelo dikambo di’anto efula”?

MPOKAMƐ LO

Okadimwelo washa Bible

Nzambi ekɔ lo nkamba l’olambo wa Yeso dia ntshungola ndo nshimbɛ anto oma lo pɛkato ndo nyɔi. Bible mbutaka dia dikila diaki Yeso diakatshulɔ diekɔ oshinga w’etshungwelo. (Ɛfɛsɔ 1:7; 1 Petero 1:18, 19) Diakɔ diele, Yeso akate dia nde akaye dia “[ndjokimɔ] lɔsɛnɔ lande oko oshinga w’etshungwelo dikambo di’anto efula.”—Mateo 20:28.

Lande na kele aki ohomba dia “oshinga w’etshungwelo [kimɔma] dikambo di’anto efula”?

Adama laki onto la ntondo akatongama kokele, mbut’ate nde komonga la pɛkato. Nde aki la diɛsɛ dia nsɛna pondjo pondjo, koko nde akashisha diɛsɛ sɔ nɛ dia nde akatɔmbɔkwɛ Nzambi. (Etatelo 3:17-19) Lam’akandote ana, nde akawasambiya pɛkato. (Rɔmɔ 5:12) L’ɔkɔkɔ ɔsɔ mbata Bible ɔnɛ Adama ‘akayasondja’ ndamɛ ndo akasondja anande lo lɔhɔmbɔ la pɛkato ndo nyɔi. (Rɔmɔ 7:14) Oko wewɔ bu kokele, ndooko onto la l’atei awɔ lakoka nsomba kɛnɛ kakashisha Adama.—Osambo 49:7, 8.

Nzambi akoke ana waki Adama kɛtshi nɛ dia vɔ komonga nto l’elongamelo. (Joani 3:16) Koko, ɔlɛmbɛ wa Nzami wendana la losembwe mɛnyaka dia nde kokoka dimanyiya pɛkato yawɔ anyanya. (Osambo 89:14; Rɔmɔ 3:23-26) Nzambi nangaka anto, diakɔ diakandakimɔ ɛngɔ kɔtɔnɛ l’ɛlɛmbɛ dia pɛkato yawɔ dimanyiyama ndo dimɔma. (Rɔmɔ 5:6-8) Oshinga w’etshungwelo ekɔ engɔ ketawɔma l’ɛlɛmbɛ.

Naa ohomba w’oshinga w’etshungwelo?

Lo Bible etelo k’ɔnɛ “oshinga w’etshungwelo” nembetshiyaka awui asato wayela anɛ:

Vɔ wekɔ oshinga wafutama.—Walelo 3:46, 47.
Vɔ kimɔmaka dia ntshungola kana nsomba.—Etombelo 21:30.
Vɔ mbɛdimaka la nɛmɔ dia kɛnɛ kafutama kana kikombaka. *

Tolembete woho wɔtɔnɛ awui asɔ l’olambo w’oshinga w’etshungwelo waki Yeso Kristo.

Oshinga wafutama. Bible mbutaka lo dikambo di’Akristo ɔnɛ: “nyakasombama la oshinga ɔmɔtshi.” (1 Kɔrɛtɔ 6:20; 7:23) Oshinga ɔsɔ wekɔ dikila dia Yeso, la dikila sɔ nde “akasombɛ Nzambi anto w’oma lo waoho tshɛ, ɛtɛkɛta tshɛ, weho w’anto tshɛ ndo wedja tshɛ.”—Ɛnyɛlɔ 5:8, 9.
Ntshungola. Olambo wa Yeso wambela “etshungwelo k’oma lo oshinga w’etshungwelo” lo pɛkato yaso.—1 Kɔrɛtɔ 1:30; Kɔlɔsayi 1:14; Hɛbɛru 9:15.
Mbɛdimaka. Olambo wa Yeso mbɛdima mɛtɛ la kɛnɛ kakashisha Adama, onto laki la lɔsɛnɔ la kokele. (1 Kɔrɛtɔ 15:21, 22, 45, 46) Bible mbutaka ɔnɛ: “Nɛ dia oko wele oma lo ohendodi w’onto 1 anto efula wakakome atshi wa pɛkato, woho akɔ waamɛ mbele oma lo okitanyiya w’onto 1 anto efula wayokoma anto w’ɛlɔlɔ.” (Rɔmɔ 5:19) Kɛsɔ mɛnyaka woho wele nyɔi k’onto ɔtɔi koka mfuta oshinga w’etshungwelo wa pɛkato y’anto efula. Lo mɛtɛ, olambo wa Yeso wekɔ “oshinga w’etshungwelo wɛdimi dikambo di’anto tshɛ” watakola wanya w’ohomba dia nkondja wahɔ oma lɔkɔ.—1 Timɔte 2:5, 6.

^ Lo Bible, tɔtɛkɛta t’oma lo Hɛbɛru takakadimɔma ɔnɛ “oshinga w’etshungwelo” mbelaka kanyi ya oshinga, kana ɛngɔ ka nɛmɔ kafutama. Ɛnyɛlɔ, vɛrbɛ ya lo Hɛbɛru ka·pharʹ nembetshiyaka “nkomba.” (Etatelo 6:14) Yɔ mendanaka mbala efula lo nkomba pɛkato. (Osambo 65:3) Tshɛkɛta koʹpher mɛnyaka kɛnɛ kafutama dia nkomba kana nsomba. (Etombelo 21:30) Woho akɔ waamɛ mbele, tshɛkɛta ya lo Grɛkɛ lyʹtron, yakadimɔma mbala efula ɔnɛ “oshinga w’etshungwelo,” koka kadimɔma nto ɔnɛ “oshinga wafutama dia ntshungola.” (Mateo 20:28) Afundji wa Grɛkɛ wakakambe la tshɛkɛta shɔ lo dikambo dia kɛnɛ kafutama dia ntshungola ose lokanu kana dia ntshungola mfumbe.