Yeso akashimbɛ anto wele la mbetawɔ lo nkimɔ lɔsɛnɔ lande oko olambo w’oshinga w’etshungwelo. (Mateo 20:28) Diakɔ diele, Yeso mbelamɛka lo Bible ɔnɛ: “Oshimbedi w’andja.” (1 Joani 4:​14) Tɔ mbutaka nto ɔnɛ: “Ndo nto, panda keema oma le onto okina, nɛ dia ndooko lokombo lokina lakashama le anto l’ɛse olongo lahomba toshimbɛ.”​—Etsha 4:​12.

 Yeso ‘akalɛtɛ nyɔi dikambo di’oseka onto tshɛ’ dia onto tshɛ longa la mbetawɔ le nde. (Hɛbɛru 2:9; Joani 3:​16) Koko l’ɔkɔngɔ diko, “Nzambi akawolola oma lo nyɔi,” ndo Yeso akakalola otsha l’olongo oko etongami ka lo nyuma. (Etsha 3:​15) Lɛkɔ, Yeso ekɔ “la akoka wa nshimbɛ tshɛ lo tshɛ wanɛ wayasukanya la Nzambi lo tshimbo yande nɛ dia nde ekɔ nshi tshɛ la lɔsɛnɔ dia nɔmbaka lo dikambo diawɔ.”​—Hɛbɛru 7:​25.

Lande na keso l’ohomba wa Yeso tɔtɛkɛtɛ?

 Nɛ dia sho tshɛ tekɔ atshi wa pɛkato. (Rɔmɔ 3:​23) Pɛkato tanganyaka la Nzambi ndo tokonyaka lo nyɔi. (Rɔmɔ 6:​23) Koko, Yeso ekɔ oko “ɔtɛkɛtɛdi” le wanɛ wele la mbetawɔ l’oshinga ande w’etshungwelo. (1 Joani 2:1, nɔtɛ ka l’ɛse ka dikatshi) Nde mbatɛkɛtɛka, nɔmbaka Nzambi dia nde mboka alɔmbɛlɔ awɔ, ndo dia mbadimanyiya pɛkato yawɔ lo tshimbo ya nyɔi kande k’olambo. (Mateo 1:​21; Rɔmɔ 8:​34) Nzambi kadimolaka lo alɔmbɛlɔ wa Yeso asɔ nɛ dia vɔ mbɔtɔnɛka la lolango lande. Nzambi akatome Yeso lanɛ la nkɛtɛ dia “andja ndjoshimbamɛ lo tshimbo yande.”​—Joani 3:​17.

Onde naka sho monga tsho la mbetawɔ le Yeso kete tayoshimbamɛ?

 Ndooko. Ekɔ mɛtɛ dia sho pombaka monga la mbetawɔ le Yeso dia sho shimbamɛ, koko ekɔ awui efula walɔmbama. (Etsha 16:30, 31) Bible mbutaka ɔnɛ: “Oko wele demba diaha la lomu diambovɔ, mbele ndo mbetawɔ kaha la etsha kambovɔ.” (Jakɔba 2:​26) Dia sho shimbamɛ, sho pombaka:

•   Mbeka akambo wendana la Yeso, ndo la She lele l’olongo, Jehowa.​—Joani 17:3.

•   Monga la mbetawɔ lew ɔ.​—Joani 12:44; 14:1.

•   Mɛnya mbetawɔ kaso lo nɛnya ɛlɛmbɛ awɔ. (Luka 6:​46; 1 Joani 2:​17) Yeso aketsha diaha onto tshɛ latowelɛka ɔnɛ “Nkumadiɔndjɔ” mbayoshimbamɛ, koko paka wanɛ “[wa]sala lolango la Papa lele l’olongo.”​—Mateo 7:​21.

•   Tetemala mɛnya mbetawɔ kayɛ kaanga la ntondo k’ɛhɛnyɔhɛnyɔ. Lo dikambo sɔ, Yeso akɛnya hwe ɔnɛ: “Onto layokikɛ polo l’ekomelo mbayoshimbamɛ.”​—Mateo 24:13.