“Lambɔlɛmba!” Ɔsɔ ekɔ etelo katonyokaka mbala la mbala etena ka ntshikala ɔnayɛ la ngelo, ko nde hasadi ndooko ɛngɔ. Lo dihole dia wɛ mbotɛ dia nde menda televiziɔ kana dia nde nkɛnya kɛnyɔ yalekande nanga, wɛ koka nsɛdingola awui amɔtshi wayela anɛ.

•   Toho ta tɔkɛnyɔ ndo wenya wetshawɔ lɔkɔ, mbeyaka monga lo kiɔkɔ y’ɔlɛmbɛlɔ. Papa kɛmɔtshi kelɛwɔ Robert mbutaka ate: “Le ana amɔtshi, lɔsɛnɔ la lushi la lushi koka mbalɛndja paka oko watowɔlɛmbaka etena kendawɔ televiziɔ kana tɔkɛnyɔ ta tovidɛo. Elimu wasalawɔ lushi la lushi mbalɛndjaka.”

   Barbara ka wadɛnde suyaka dui sɔ. Nde mbutaka ate: “Lo lɔsɛnɔ, nɔmbaka nkana yimba ndo mbidja welo, ndo mbala efula etombelo hɛnama mbala kakɔ ɔtɔi. Diakɔ diele ana waleka mbetsha wenya lo menda televiziɔ kana nkɛnya tɔkɛnyɔ ta tovidɛo nɛmbaka.”

•   Mbetsha wenya efula lo wa rɛzo sɔsio koka nkonya dia ndjaɛdika l’anto akina lo yoho ya kɔlɔ. Mɛna kɛnɛ kadja angɛnyi ande lo waa rɛzo sɔsio, ɔlɔngɔlɔngɔ koka mɛna di’oko lɔsɛnɔ lande bu l’oyango. Osekaseka ɔmɔtshi welɛwɔ Beth mbutaka ate: “Sho koka mfɔnya ɔnɛ, anto tshɛ wekɔ lo ngɛnangɛna, koko dimi lekɔ lotshikala la ngelo.”

   Ndo nto, l’ɔkɔngɔ wa mbetsha wenya efula lo rɛzo sɔsio, mbala efula kɛsɔ nɛndjaka ndo sho ndjaokaka oko tambokamba olimu w’anyanya. Ɔlɔngɔlɔngɔ ɔmɔtshi welɛwɔ Christ mbutaka ate: “Ayɛnama oko tekɔ lo nkamba olimu ɔmɔtshi, koko l’ɔkɔngɔ diko tayoyɛna dia ndooko kosadiso.

•   Ɔlɛmbɛlɔ koka monga diaaaso dimɔtshi dia dimɛna. Mama kɛmɔtshi kelɛwɔ Katherine mbutaka ɔnɛ: “Monga l’ɔlɛmbɛlɔ mbishaka ana diaaso dia nsala ɛngɔ kɛmɔtshi. Nde mbutaka ate: Ɛnyɛlɔ, ɔna koka mbɔsa kartɔ ko kikonya oko mutuka, waato kana aviyɔ. Ndo mbifɛ dihɔndɔ lo kɔsa kana lo mɛsa koka monga oko luudu le nde.”

   Sherry Turkle, prɔfɛsɛrɛ kɛmɔtshi kendana l’awui wa lo wɔɔngɔ nembetshiyaka ɔlɛmbelɔ oko “diaaso dia nsala dui dikina.” a Koko, ɔlɛmbɛlɔ ekɔ dui diahatakoke mbewɔ tshɛ lo tshɛ. Ɔnkɔnɛ, dibuku dimɔtshi (Disconnected) mbutaka ɔnɛ: “Wonyiyelo wa diangɔ dia wotsho konyaka dia demba nyomoleka monga wolo, woho akɔ wamɛ mbele etena kalɛmbayɛ ndo kakambayɛ la dikoka diayɛ di’ekanelo ka yimba, wɛ ndekaka monga l’akoka wa nsala awui akina efula.”

 Lo tshena pe: Tɔsake ɔlɛmbɛlɔ w’anayɛ oko dikambo dia woke, koko ɔsa dui sɔ oko diaaso dia mbaakimanyiya dia vɔ nkɛnɛmɔla dikoka diawɔ dia nsala awui akina.

•   Naka kokaka, ntshika anayɛ watɔkɛnya l’andja. Barbara lakatatɛkɛtshi la diko, mbutaka ate: “Ekɔ dui dia diambo dia menda woho wele yema ya yanyi ndo hiɛlɛlɛ kombolaka loonge longa l’otsho. Etena katatɛ anaso nkɛnya l’andja, dikoka diawɔ di’ekanelo ka yimba kambaka dimɛna!”

   Tɔndɔ dia lo Bible: “Dikambo tshɛ diekɔ la etena kadiɔ, . . . etena ka mbɔla [ndo] etena ka mfumbɔfumbɔ.”​—Ondaki 3:1, 4, nɔtɛ ka l’ɛse ka dikatshi.

   Ambola wa nkana la wɔ yimba: Waaso akɔna wakokami nyomoleka mbisha anami dia vɔ tɔkɛnyaka l’andja? Naka hawokoke tɔkɛnya l’andja, akambo akɔna akina wakokawɔ salaka etena kewɔ lo luudu?

•   Kimanyiya anayɛ dia vɔ kanɛka anto akina. Mama kɛmɔtshi kelɛwɔ Lillian mbutaka ate: “Sho koka nɔmba ana dia tokimanyiya la tɔmbɛ ndo tɔtɔngɔna akatshi lo lokombo l’opalanga ɔmɔtshi, mbokatɛ yangɔ ya ndɛ kana ntshɔ tsho towosha mɔyɔ. Sho mɛtɛ mongaka l’ɔngɛnɔngɛnɔ etena kakimanyiyaso anto akina.”

   Tɔndɔ dia lo Bible: “Kanga lokaho ayɔngɔna, ndo ɔnɛ lashana ashi wa nnɔ wayowosha ndo nde lawɔ.”​—Tokedi 11:25.

   Ambola wa nkana la wɔ yimba: Ngande wakokayɛ nkimanyiya anayɛ dia vɔ monga l’ɔngɛnɔngɛnɔ waya lo nkimanyiya anto akina?

•   Sha ɛnyɛlɔ. Yoho yatɛkɛtayɛ lo dikambo di’elimu wakambayɛ lushi la lushi koka monga la shɛngiya le anayɛ. Mama kɛmɔtshi kelɛwɔ Sarah mbutaka ɔnɛ: “Naka sho mɛnya ana diele oko lɔsɛnɔ laso bu l’oyango, kete tayowaetsha dia vɔ mongaka l’ɔlɛmbɛlɔ. Koko etena kɛnaso akambo la sso di’ɔlɔlɔ, sho kimanyiyaka anaso dia vɔ nsala wolo akɔ waamɛ.”

   Tɔndɔ dia lo Bible: “Onto lele la otema wele l’ɔlɔ salaka fɛtɛ tena tshɛ.”​—Tokedi 15:15.

   Ambola wa nkana la wɔ yimba: La ntondo k’anami, ngande watɛkɛtami lo dikambo di’elimu ami wa lushi la lushi? Etena kalɛmbami, ngande wɛnawɔ woho watomosalaka akambo?

 Dako: Kimanyiya anayɛ dia vɔ salaka listɛ la tɔkɛnyɔ kana akambo wakokawɔ nsala. Mama kɛmɔtshi kelɛwɔ Allison mbutaka ate: “Sho mongaka la dibaya dimɔtshi diele onto tshɛ la lo nkumbo koka mfunda kanyi yande.”