Basupi ba ga Jehofa ba Bakae mo Lefatsheng Lotlhe?

TSHAMEKA

Dipalogotlhe Tsa Ngwaga wa 2023

Palo ya Basupi ba ga Jehofa mo lefatsheng lotlhe	8 816 562
Diphuthego	118 177
Palo ya dinaga tse Basupi ba ga Jehofa ba rerang kwa go tsone	239

2023 Dipalogotlhe

2023 Dipego Tsa Naga le Tshimo

Lo bala jang palo ya lona?

Re bala fela Basupi ba ba rerang dikgang tse di molemo tsa Bogosi Jwa Modimo kgwedi le kgwedi. (Mathaio 24:14) Palo eno e akaretsa Basupi ba ba kolobeditsweng mmogo le ba ba sa kolobediwang mme gone ba tshwanelega go tsamaya ba rera.

A motho o tlhoka go ntsha madi gore e nne leloko la phuthego?

Nnyaa. Meneelo ga e amane gope le gore a motho ke Mosupi kgotsa gore tiro ya gagwe ke eng mo phuthegong. (Ditiro 8:18-20) Tota e bile, bontsi jwa batho ba ba ntshang meneelo ga ba itsewe. Mosupi mongwe le mongwe o ithaopela go dirisa nako, maatla le dithoto tsa gagwe go tshegetsa tiro ya go rera e e dirwang mo lefatsheng lotlhe.—2 Bakorintha 9:7.

Lo itse jang gore ke batho ba le kae ba ba tsamayang ba rera?

Kgwedi le kgwedi, Basupi ba naya phuthego pego ya tiro ya bone ya go rera. Ga go na ope yo o patelesegang go ntsha pego eno.

Phuthego e kokoanya dipego e bo e di romela kwa ofising ya lekala e e okametseng phuthego eo. Diofisi tsa makala di romela dipego tseo kwa ntlokgolong ya lefatshe lotlhe.

Nako le nako fa ngwaga wa tirelo o wela, a go lebelelwa palogotlhe ya Basupi mo nageng nngwe le nngwe. Dipalo tseno di a kokoanngwa go bona palo ya Basupi mo lefatsheng lotlhe. Dipego tsa naga nngwe le nngwe le maitemogelo a ba bangwe ba nnile le one mo tirong ya go rera di kwalwa mo bukeng ya ngwaga ya Basupi ba ga Jehofa. Dipego tseno di re kgothatsa fela jaaka di ne di kgothatsa Bakeresete ba ntlhantlha.—Ditiro 2:41; 4:4; 15:3.

A palo ya lona e akaretsa ba ba kopanelang le lona mme ba sa rere?

Le fa re sa ba akaretse mo palong ya Basupi, re a ba amogela mo diphuthegong tsa rona. Bontsi jwa bone ba nna gone ngwaga le ngwaga kwa Segopotsong sa loso lwa ga Keresete, ka jalo go bona palo ya bone re tsaya palogotlhe ya ba ba nnileng gone kwa Segopotsong re bo re ntsha palo ya Basupi. Ka 2023, palo ya ba ba nnileng gone kwa Segopotsong e ne e le 20 461 767.

Bontsi jwa ba ba sa tleng dikokoanong tsa rona ba solegelwa molemo ke thulaganyo ya rona ya go ithuta Baebele le batho. Ka 2023, re ne ra tshwara dithuto tsa Baebele di ka nna 7 281 212 kgwedi le kgwedi, tse dingwe di tshwarwa le batho ba le mmalwa ka nako e le nngwe.

Goreng palo ya lona e le kwa tlase fa e bapisiwa le ya puso?

Gantsi fa goromente e kokoanya dipalopalo tsa yone e dira jalo ka go botsa batho gore ba tsena kereke efe. Ka sekai, U.S. Census Bureau ya re fa e kokoanya dipalopalo “e leka go batla go itse gore motho ke leloko la kereke efe” ke ka moo ba reng dipalopalo tsa bone “di ikaegile ka se batho ba se buang.” Go farologana le seo, rona re bala Basupi ba ga Jehofa re lebile palo ya ba ba rerang le ba ba begang tiro ya bone, e seng go ya ka se motho a se buang.

a Ngwaga wa tirelo o simologa ka September 1 go fitlha ka August 31 wa ngwaga o o latelang. Ka sekai, ngwaga wa tirelo wa 2015 o simolotse ka September 1, 2014, go fitlha ka August 31, 2015.