Re latela ditaelo tsa Baebele fa go tla mo dikgannyeng tse di amanang le diphitlho, go akaretsa le dilo tse di latelang:

•   Go tlwaelegile go utlwa botlhoko fa o tlhokafaletswe. Barutwa ba ga Jesu ba ne ba utlwile botlhoko fa ba tlhokafaletswe. (Johane 11:33-35, 38; Ditiro 8:2; 9:39) Ka jalo, ga re tseye diphitlho e le nako ya go ijesa monate. (Moreri 3:1, 4; 7:1-4) Go na le moo, re di tsaya e le nako ya go gomotsa ba ba tlhokafaletsweng.—Baroma 12:15.

•   Baswi ga ba itse sepe. Re tila meetlo kgotsa dingwao tse di dirwang ke batho ba ba dumelang gore baswi ba a re bona e bile ba ka kgona go re thusa. (Moreri 9:5, 6, 10) Meetlo eno e akaretsa ditebelelo, diphitlho tse di turang, meletlo ya go gopola baswi, mpho ya badimo, go bua le go kopa thuso mo baswing le meetlo e e dirwang fa motho a tlhokafaletswe ke molekane wa lenyalo. Re tila meetlo le dingwao tseno tsotlhe ka gonne re ikobela taelo ya Baebele e e reng: “Jalo tswang mo gare ga bone, . . . mme lo tlogele go ama selo se se seng phepa.”—2 Bakorintha 6:17.

•   Baswi ba tla tshela gape. Baebele e re ruta gore baswi ba tlile go tshela gape le gore go tla tla nako e loso lo tla bong lo seyo ka yone. (Ditiro 24:15; Tshenolo 21:4) Go itse seno go re thusa gore re tile dingwao le meetlo e e dirwang ke batho ba bangwe le gore re latele sekao sa Bakeresete ba bogologolo.—1 Bathesalonika 4:13.

•   Baebele ya re re nne boingotlo. (Diane 11:2) Ga re dumele gore phitlho e tshwanetse go nna lefelo la go “bontsha ka mabela se motho a nang le sone” mo botshelong. (1 Johane 2:16) Ga re dumele gore phitlho e tshwanetse go tura, go kgatlha batho, gore go rekwe makesi a a turang kgotsa gore batho ba bonwe ba apere diaparo tse di turang.

•   Ga re pateletse batho gore ba dire diphitlho ka tsela e re di dirang ka yone. Re latela molaomotheo ono wa Baebele: “Mongwe le mongwe wa rona o tla ikarabelela mo Modimong.” (Baroma 14:12) Mme fa motho a re naya tshono ya go tlhalosa dilo tse re di dumelang, re dira jalo ka “bonolo le tlotlo e e boteng.”—1 Petere 3:15.

 Lefelo: Lelapa le ka itirela tshwetso ya gore a le tla tshwarela phitlho kwa Holong ya Bogosi, kwa mabitleng, kwa legaeng la bone, kwa mmoshareng kgotsa gore a ba tla fisa setopo.

 Tirelo: Go neelwa puo go gomotsa batho ba ba tlhokafaletsweng le go tlhalosa se Baebele e se rutang ka loso le ka tsogo ya baswi. (Johane 11:25; Baroma 5:12; 2 Petere 3:13) Mo thulaganyong ya phitlho go ka tlotliwa ka botho jo bontle jwa moswi, gongwe go akarediwa le se re ka ithutang sone mo sekaong sa gagwe.—2 Samuele 1:17-27.

 Go ka opelwa pina e e theilweng mo Baebeleng. (Bakolosa 3:16) Phitlho e konela ka thapelo e e gomotsang ba ba tlileng phitlhong.—Bafilipi 4:6, 7.

 Dituelo kgotsa dikoleke: Ga re duedisa batho go tshwara diphitlho e bile ga re tseye koleke kwa diphuthegong tsa rona.—Mathaio 10:8.

 Batho ba ba tlileng phitlhong: Batho ba e seng Basupi ba ka tla phitlhong e e tshwaretsweng kwa Holong ya Bogosi fela jaaka ba ka tla fa e se phitlho.

 Mosupi mongwe le mongwe ke ene a itirelang tshwetso a ikaegile ka segakolodi sa gagwe. (1 Timotheo 1:19) Mme ga re nne le seabe mo meletlong ya bodumedi e re dumelang gore e kgatlhanong le melao ya Baebele.—2 Bakorintha 6:14-17.