Se se seng boammaaruri: Basupi ba ga Jehofa ga ba keteke Ista ka gonne ga se Bakeresete.

 Boammaaruri: Re dumela gore Jesu Keresete ke Mmoloki wa rona e bile re dira sotlhe se re ka se kgonang gore re “latele dikgato tsa gagwe gaufiufi.”—1 Petere 2:21; Luke 2:11.

 Se se seng boammaaruri: Ga lo dumele gore Jesu o tsositswe mo baswing.

 Boammaaruri: Re dumela mo tsogong ya ga Jesu; re lemoga gore e botlhokwa thata mo tumelong ya Mokeresete e bile re bua ka yone fa re rera.—1 Bakorintha 15:3, 4, 12-15.

 Se se seng boammaaruri: Ga lo kgathale gore bana ba lona ba fetwa ke monate wa go keteka Ista.

 Boammaaruri: Re rata bana ba rona—re dira sotlhe se re ka se kgonang go ba thapisa le go ba thusa gore ba itumele.—Tito 2:4.

•   Moletlo wa malatsi a boikhutso wa Ista ga o a theiwa mo Baebeleng.

•   Jesu o ne a laela gore re gopole loso lwa gagwe e seng tsogo ya gagwe. Re tshwara Segopotso seno ngwaga le ngwaga ka letlha le a suleng ka lone go ya ka khalendara ya Baebele e e lejwang ka ngwedi.—Luke 22:19, 20.

•   Re dumela gore Modimo ga a amogele Ista ka gonne meetlo ya yone e simologile kwa dingwaong tsa bogologolo tsa tsalo. Modimo o batla gore re mo neye “boineelo jo bo feletseng” e bile o kgopisiwa ke kobamelo e e nang le meetlo e a sa e amogeleng.—Ekesodo 20:5; 1 Dikgosi 18:21.

 Re dumela gore tshwetso ya rona ya go se keteke Ista e theilwe mo Baebeleng, e e re kgothaletsang go dirisa “botlhale jo bo mosola le bokgoni jwa go akanya,” go na le go latela fela dingwao tsa batho. (Diane 3:21; Mathaio 15:3) Re tlhalosetsa batho ba bangwe se re se dumelang ka Ista fa ba re botsa ka gone, le fa go ntse jalo re tlotla tshwanelo e mongwe le mongwe a nang le yone ya go itlhophela se a tla se dirang.—1 Petere 3:15.