Gantsi kwa manyalong a Basupi ba ga Jehofa go nna le moletlo o monnye o o tlotlegang mme seo se akaretsa puo e e theilweng mo Baebeleng. Morago ga puo, banyalani ba ka tlhopha go dira mokete wa lenyalo. a Jesu le ene o ile a ya kwa moketeng wa lenyalo kwa Kana.​—Johane 2:1-11.

•  Go diragala eng kwa moletlong wa lenyalo?

•  Manyalo a Basupi ba Jehofa a tshwarelwa kae?

•  Go ka tla mang?

•  A go na le tsela e go aparwang ka yone?

•  A go tla nna le dimpho tsa lenyalo?

•  A go tla bontshiwa boitumelo ka go tsholeletsa digalase tsa dino kwa godimo?

•  A go tla gasiwa raese kgotsa malomo?

•  A go tla nna le dijo le dino?

•  A go tla nna le mmino kgotsa go tla binwa?

•  A Basupi ba ga Jehofa ba keteka di-anniversary tsa manyalo?

 Selo sa botlhokwa thata kwa moletlong ono ke puo ya lenyalo e e tsayang metsotso e ka nna 30 mme puo eno e neelwa ke mongwe wa Basupi ba ga Jehofa. Puo eno e e kgothatsang e thusa banyalani go bona kafa Baebele e ka ba thusang ka gone go nna le lenyalo le le itumetseng.​—Baefeso 5:33.

 Mo dinageng di le dintsi puso e letla bangwe ba Basupi ba ga Jehofa go nna banyadisi, seo se raya gore ba ka nyadisa semolao. Fa puo e ela go fela, banyalani ba dira maikano morago ga moo ba ka tsenyana dipalamonwana mme monyadisi a bo a ba itsise gore ke monna le mosadi ba ba nyalaneng semolao.

 Dinaga tse dingwe di na le molao wa gore batho ba tshwanetse go nyalana kwa ofising ya puso. Fa e le gore maemo a ntse jalo, baratani ba ka dira seo pele ga puo ya lenyalo. Fa e le gore monyadi le monyadiwa ga ba a dira maikano kwa ofising ya puso, ba ka dira jalo fa puo ya lenyalo e ela go fela. Fa e le gore ba setse ba dirile maikano a bone ba ka a boeletsa gape mme ba dire jalo ka tsela e e bontshang gore ba setse ba a dirile pelenyana. Puo ya lenyalo e tla konelo ka thapelo ya gore Modimo a segofatse banyalani bao ba basha.

 Bontsi jwa Basupi ba tlhopha go tshwarela manyalo a bone kwa Holong ya Bogosi, fa e le gore ga e dirisiwe ka letsatsi leo. b Morago ga moo, fa e le gore banyalani ba tlhopha go dira mokete wa lenyalo ba ka o direla kwa lefelong le lengwe.

 Fa lenyalo le tshwaretswe kwa Holong ya Bogosi, seo se ra ya gore mongwe le mongwe a ka tla, e ka tswa e le Mosupi kana e se Mosupi. Fa banyalani ba nna le mokete wa lenyalo, ba tlhopha gore ba ka laletsa mang.

 Le fa go sena tsela e e rileng e go tshwanetseng go aparwa ka yone kwa Holong ya Bogosi, Basupi ba ga Jehofa ba leka go latela melaometheo ya Baebele ka go apara ka tsela e e bontshang tlotlo. Re itumelela go bona ba bangwe ba dira se se tshwanang. (1 Timotheo 2:9) Mo godimo ga moo, fa e le gore go na le mokete wa lenyalo, re dirisa molaomotheo ono.

 Baebele e re kgothaletsa go aba. (Pesalema 37:21) Basupi ba ga Jehofa ba itumelela go aba le go amogela dimpho tsa lenyalo. (Luke 6:38) Le fa go ntse jalo, Basupi ga ba kope dimpho e bile ga ba bue gore di tswa ko go bomang. (Mathaio 6:3, 4; 2 Bakorintha 9:7; 1 Petere 3:8) Go dira jalo go ka dira gore ba bangwe ba ikutlwe ba sa phuthologa, tota e bile seno se kgatlhanong le se Baebele e se buang.

 Nnyaa. Basupi ba ga Jehofa ga ba bontshe boitumelo ka go tsholeletsa digalase tsa dino kwa godimo, ka gonne ke tlwaelo e e tswang mo bodumeding jwa maaka. c Basupi ba ga Jehofa ba eleletsa banyalani dilo tse dintle ka ditsela tse di farologaneng.

 Nnyaa. Mo mafelong a mangwe, batho ba gasa banyalani ka raese, malomo kgotsa dingwe tsa go tshwana le tseo. Ba dumela gore seno se tla tlisetsa banyalani masego, boitumelo le botshelo jo bo leele. Basupi ba ga Jehofa ba gana ditlwaelo tseno ka gonne di tsamaisana le tumelobotlhodi. Seno se akaretsa go eleletsa motho lesego mme go dira jalo ga go dumalane le melaometheo ya Baebele.​—Isaia 65:11.

 Ka nako ya puo ya lenyalo kwa Holong ya Bogosi ga go na dijo le dino. Banyalani bangwe ba ka tlhopha go nna le mokete wa lenyalo ko go tla nnang le dijo le dino gone. (Moreri 9:7) Fa e le gore bojalwa bo tla bo bo le gone, banyalani ba tshwanetse go tlhomamisa gore bo nna gone ka selekanyo se se rileng le gore ga bo nowe ke ba ba ka fa tlase ga dingwaga.​—Luke 21:34; Baroma 13:1, 13.

 Fa go na le mokete wa lenyalo, banyalani ba ka tlhopha gore a go tla nna le mmino kgotsa gore a go tla binwa. (Moreri 3:4) Mmino o ba o tlhophang o tla laolwa ke se ba se ratang mme gape o itumedisa ba ba laleditsweng. Moletlo wa lenyalo o o tshwarwang kwa Holong ya Bogosi gantsi o na le mmino o o theilweng mo Dikwalong.

 Ga go na molaomotheo ope wa Baebele o o buang ka go keteka di-anniversary, ka jalo banyalani ba itirela tshwetso ya gore a ba tla di keteka kana nnyaa. Fa ba tlhopha go dira jalo, ba ka dira jalo ba le babedi fela kana le ba lelapa kgotsa le ditsala.