Basupi ba ga Jehofa ba na le makala a go gatisa a le 15 mo lefatsheng lotlhe. Lengwe la one ke lekala le le kwa Bogareng Jwa Yuropa, le le kwa Selters, Jeremane, kwa lefelong le le bidiwang Steinfels e ka Sejeremane e kayang “Leje le Legolo.”

Ka May 23-25, 2014, lekala la kwa Bogare Jwa Yuropa le ne la laletsa baagelani, bagwebi le badiredipuso gore ba tle go bona dikago tsa bone. Tiragalo eo e ne ya bidiwa “Dingwaga di le 30 mo Selters” ka gonne dikago tsa lekala leo di ne tsa bulwa semmuso ka April 21, 1984.

Go ne ga tla batho ba feta 3 000. Ratoropo mongwe yo o nang le dingwaga di ka nna 30 a ntse a bereka mo pusong a re: “Go etela lekala la Basupi ba ga Jehofa ga e bolo go nna tiragalo e e kgethegileng thata. Ke sa ntse ke sa dumele lobelo lo ba ileng ba aga ofisi eno ya lekala ka lone, go simolola ka 1979 go ya go fitlha ka 1984.”

Lefelo lengwe la dipontsho le ne le kwadilwe “Batho ba ga Jehofa mo Bogareng Jwa Yuropa,” mme mo go lone baeng ba ne ba bontshiwa hisitori ya dingwaga di ka nna 120 ya Basupi mo nageng eo. Mme le gone jaanong batho ba sa ntse ba ka etela lekala leo go ithuta ka hisitori ya naga eo.

Go ne go na le lefelo le lengwe le le neng le bontsha Dibaebele tsa kgale tse di sa tlwaelegang. Ka sekai, go na le Baebele ya ntlha ya Sejeremane ya ngwaga wa 1534 le karolo nngwe ya Baebele ya Polyglot ya ga Elias Hutter, e e nang le ditemana tsa Baebele ka dipuo di le 12. Mo godimo ga moo, go ne go na le ditshwantsho, ditšhate le bidio tse di neng di tlhalosa botlhokwa jwa go dirisa kgakololo ya Baebele mo matshelong a rona.

Baeti ba ne ba bontshiwa ditiro tse batho ba feta 1 000 ba ba nang mo ofising eo ya lekala ba di dirang letsatsi le letsatsi. Ba ne ba bontshiwa dikamore tse go nniwang mo go tsone. Ba ne ba ja mmogo le maloko a lekala leo le go tsamayatsamaya mo dikagong tse dintle. Moeti mongwe o ne a re: “Lefelo leno le ntle tota.”

Go tswa foo, baeti ba ne ba bontshiwa lefelo la go gatisa, la go tshwaraganya dikgatiso le la go di romela. Baeti ba ne ba bona kafa dikgatiso tsa Baebele di printiwang, di tshwaraganngwang le go romela ka gone mo dinageng di feta 50. Monna mongwe o ne a re: “Ke ne ke sa akanye gore Basupi ba ga Jehofa ke mokgatlho o mogolo jaana. Dikgatiso tsa bone di mo lefatsheng lotlhe. Go a gakgamatsa gore tiro eno e dirwa ke baithaopi.”

Sengwe se se tlhomologileng thata e ne e le lefelo le le bontshang website ya Basupi ba ga Jehofa ya jw.org. Bagolo le bana ba ne ba ya kwa go lone go ya go leba dibidio le go botsa dipotso.

Fa baeng ba le bantsi ba sena go bona mafelo a a farologaneng mo dikagong tsa lekala, ba ne ba tswa ba tlhaloganya tiro ya lefatshe lotlhe e e dirwang ke Basupi ba ga Jehofa e bile ba itumetse. Monna mongwe o ne a re: “Go na le dilo di le dintsi tse di phoso tse ke neng ke di akanya ka Basupi. Jaanong ke a bona gore ke tlhoka go di akanyetsa sentle gape.” Mosadi mongwe o ne a sa fetse go bua a re: “Gompieno gone, ke tlile simolola go leba dilo sentle.”