Ngwaga le ngwaga makau le makgarebe a dirisa maatla le nako ya one ba tlhatswa ditone di ka nna 1 800 tsa dilwana kwa ofising ya lekala ya Basupi ba ga Jehofa kwa United States mo mafelong a botlhatswetso a a kwa dikagong tse tharo, kwa Brooklyn, Patterson le Wallkill, New York. Dilwana tsa teng di a boitshegang. Sengwe se se dirang gore tiro eno e se tshwane le epe ke gore badiri ba tlhatswa dilo tse di farologaneng.

Letsatsi lengwe le lengwe, batho ba ba nnang mo dikagong tsa Bethele ya kwa United States ba isa diaparo di ka nna 11 000 kwa mafelong a botlhatswetso a Bethele​—dihempe di ka nna 2 300 le marokgwe a ka nna 650, mmogo le dikausu, diaparo tsa ka fa teng le dikipa. Gape ba isa le dilwana tse dingwe tse 900 kwa dry-clean ya mo botlhatswetsong.

Gape go tlisiwa le mokoa wa dishiti, ditoulo le dikobo mmogo le diaparo tsa baapei le matsela a go phepafatsa. Tseno tsotlhe di tshwanetse go tlhatswiwa, go omisiwa le go isiwa kwa di tshwanetseng. Matsela a go tlhatswa a tlhatswiwa a le mantsi mme mabolaose le dithae tsa siliki di tlhatswiwa di le nosi.

Ba ba berekang kwa botlhatswetsong ba tlhatlhoba seaparo sengwe le sengwe go bona gore a ga se a gagoga kgotsa ga se a tswa dikonopo. Tse di duleng dikonopo di rokwa ka motšhini kgotsa ka seatla. Fa seaparo se tlhoka go rokwa kgotsa go baakanngwa, se rokwa ke seruki.

Gore diaparo tse dintsintsi tseno di se ka tsa timela, diaparo tsotlhe tsa batho ba ba nnang mono di tsenngwa dinomore tse dinnye go dirisiwa motšhini. Dinomore tseno di dirisiwa go rulaganya diaparo gore fa di sena go tlhatswiwa le go aeniwa di isiwe kwa dikamoreng tsa mongwe le mongwe kwa legaeng la Bethele kwa United States.

Badiri ba basha ba thapisiwa ke badirikabone ba ba nang le maitemogelo. Modiri yo mosha a ka ithuta ditiro di ka nna 20 tse di farologaneng. Tiro e e lebegang e le motlhofo mme go tsaya lobaka gore motho a e itse, ke ya go tlosa dipatso. Modiri yo mosha o tshwanetse go ithuta matsela le gore a nna jang fa a tlhatswiwa ka mekgwa e e farologaneng le fa a tlosiwa dipatso.

Tajh, yo o nang le ngwaga le sephatlo a bereka kwa botlhatswetsong, o bua jaana ka batho ba a berekang le bone, “Go bereka le batho ba ba botsalano le ba ba godisitsweng ka ditsela tse di farologaneng go monate.” Modiri yo mongwe yo o bidiwang Shelly a re, “Ke tshiamelo go nna le seabe mo go direng gore legae la Bethele le lebege sentle.”