Ditlhaka tse dikhibidu tse di boleele jwa dimetara di le 4,6 tse di kwa godimo ga ntlokgolo ya lefatshe lotlhe ya Basupi ba ga Jehofa, e ntse e le selo se baagi ba New York City ba se bonang ka metlha bosigo le motshegare ka dingwaga di feta 40, mme bontsi jwa bone ba leba nako le themperetšha mo go tsone.

Eboni, yo o kgonang go bona letshwao leno a le mo foleteng ya gagwe kwa Brooklyn, o ne a re: “Go monate go leba fela kwa ntle ka fensetere ke bo ke bona nako le themperetšha pele ke ya tirong. Go nthusa gore ke tshware nako le gore ke apare diaparo tse di siametseng maemo a bosa.”

A letshwao leno le tla tswelela le le gone ka dingwaga tse dingwe tse 40? Gongwe. E re ka go rulaganngwa gore ntlokgolo ya lefatshe lotlhe ya Basupi ba ga Jehofa e fudusediwe kwa bokonebophirima jwa New York, batho ba ba tla rekang kago eno ke bone ba ba tla dirang tshwetso eo.

Letshwao leno le ne la tsenngwa ke batho ba ba neng ba dirisa lefelo leno pele ga Basupi, dingwaga di feta 70 tse di fetileng. Fa Basupi ba ga Jehofa ba sena go reka kago eno ka 1969, ba ne ba le fetola gore le nne jaaka le ntse gone jaanong.

Letshwao leno le tlhoka go nna le tlhokomelwa ka metlha. Mo dingwageng di le mmalwa, bakaulengwe bangwe ba basha ba ne ba nna ba le baakanya ka metlha, bosigo le motshegare.

Mokaulengwe mongwe yo o neng a bereka bosigo a re: “Maitseboa mangwe re ne ra amogela mogala go tswa kwa mokaeding wa dikgang tsa thelebishene. O ne a re bolelela gore nako ya letshwao la rona e ne e le kwa morago ka metsotswana e le 15. O ne a kopa gore re e baakanye gore a tle a e bontshe mo thulaganyong ya gagwe mo bosigong joo. Go ise go ye kae, motegeniki yo o otselang o ne a bereka a baakanya bothata joo.”

E le gore letshwao leno le bereke sentle, le ile la nna la fetolwa makgetlho a le mmalwa. Mo bogareng jwa bo1980, go ne ga dirwa gore themperetšha e tlhage le ka di-Celsius e re ka e ne e ntse e tlhaga fela ka di-Fahrenheit mme gape e tla e tlhagisa le nako.

Ka 2009, dipone tsa bogologolo di ne tsa emisediwa ka tsa bosheng tse dikhibidu e bile di boloka madi a go le baakanya a feta diranta di le 39 000 ($4,000 U.S.) ka ngwaga. Gompieno letshwao leno le dirisa motlakase o o kwa tlase ga o le neng le o dirisa.