Bontsi jwa batho ba ba neng ba ile kwa Dipontshong Tsa 2014 Tsa Boditšhabatšhaba tsa Toropo ya Rouen, ba ne ba kgatlhiwa ke lefelo le lennye le le neng le kwadilwe “The Bible—Yesterday, Today, and Tomorrow.”

Baeti ba le bantsi ba ne ba kgatlhiwa ke bidio e khutshwane e e neng e tshamekiwa e e neng e bontsha Mekwalo ya bogologolo ya Baebele. Fa ba tsena mo lefelong leo, ba ne ba ithuta ka tsela e Baebele e thusang ka gone, hisitori ya yone, go nna boammaaruri ga yone fa go tla mo dilong tsa saense le ntlha ya go bo e aname jaana.

Batho ba ne ba kgona go bona kwa Baebele e tswang gone le kafa gone jaanong e anameng ka gone ka mefuta e e farologaneng e ka tswa e gatisitswe kgotsa e le gone ka eleketeroniki. Moeti mongwe le mongwe o ne a newa Baebele ya Thanolo ya Lefatshe le Lesha e e gatisitsweng ke Basupi ba ga Jehofa ka dipuo di feta 120.

Baeti ba le bantsi ba ne ba leboga Basupi thata ka maiteko a ba a dirang a go anamisa Baebele. Motho mongwe yo o berekang ka bana ba bannye ba ba dikobo di magetleng o ne a lebile fa Basupi ba emeng gone a na le setlhotswana sa bana mme a re: “Baebele ke boswa jo rotlhe re nang le jone. Ke buka e e tshelang. Nako le nako fa ke e bala, ke bona tharabololo ya mathata a me.”

Mmè mongwe wa dingwaga tse 60 o ne a gakgametse tota fa a newa Baebele. O ne a re: “Re tshwanetse go e bala gape ka gonne rotlhe re a e tlhoka!”