Go tloga ka Seetebosigo 6 go ya go 16, 2013, baeng ba le dimilione go tswa mo lefatsheng lotlhe ba ne ba thologela kwa boemakepe jwa Rouen kwa bokone jwa Fora, kwa go nngwe ya dikokoano tse dikgolo le tse di kgatlhang thata mo lefatsheng tse mo go tsone go bontshiwang dikepe, e e bidiwang Armada.

Morago ga gore dikepe tse dintlentle le tse dileele di tsamaye dikilometara di le 120 kwa Seine, e leng noka e e motsopodia ya kwa lefelong le lentle la Normandy, di ne tsa latlhela ditshetledi tsa tsone gaufi le boemakepe jwa dikilometara di le supa jo go neng go tshwaretswe moletlo mo go jone. Mo malatsing a feta lesome, baeng ba ne ba nna le tshono ya go palama mahala le go etela dingwe tsa dikepe tse 45 tse dileele tse di bontshiwang mo moletlong ono.

Ke eng se se tlhotlheleditseng batho ba bantsi jaana ba dingwaga tse di farologaneng go ya kwa moletlong wa Armada? Mosimolodi le morulaganyi wa tiragalo eno a re moletlo wa Armada o naya batho tshono ya go “atamalana le ‘Diganka Tsa Lewatle’ tse di dirang gore re ijese dijo tsa ditoro.” Kana gone, dikepe tseno di dira gore batho ba le bantsi, bannye le bagolo, ba akanye ka kgololesego le go tsaya maeto a maleele.

Gape bajanala ba le diketekete ba ne ba nna le tshono ya go utlwa ka kgololesego e nngwe, e boammaaruri jwa Baebele bo e nayang batho. (Johane 8:31, 32) Fa baeng ba ntse ba tsamaya mo Rouen e e kgatlhang ya metlha ya bogare le mo ditselaneng tsa yone tse ditshesane tse di tlhanaselang, ba ne ba lemoga kolotsana e e beilweng dikgatiso e e dirisiwang ke Basupi ba ga Jehofa ba mo lefelong leno. Fa babogedi kgotsa batsamaisadikepe ba tla mo kolotsaneng, ba ne ba bolelelwa gore ba ka itseela dikgatiso dipe fela tsa Baebele mo go yone, mahala. Bontsi jwa bafeti ka tsela ba ne ba kgatlhegela setlhogo sa makasine wa Tora ya Tebelo se se reng “Lefatshe Le le Se Nang Letlhoo—Leng?” mme ba ne ba lalediwa go tla go reetsa puo ya Baebele e e neng e tla neelwa ka Sefora, Seesemane kgotsa Se-Spain.

Batho ba mo lefelong leno ba ne ba itumelela thulaganyo eno. Monna mongwe yo kwa tshimologong a neng a gakgamaletse go bona Basupi ba eme mo lefelong la botlhe ba bapile le kolotsana e e beilweng dikgatiso, o ne a re: “Ke itumelela go lo bona mo mebileng. Ke tlotla batho ba ba emelang se ba se dumelang tota le fa nna ke sa dumele se lo se dumelang.” Banna ba babedi ba ba godileng ba ba kopaneng le basha ba Basupi ba ba neng ba dira tiro eno ba ne ba ba raya ba re: “Nnang motlotlo ka se lo leng sone!”