Mo masimologong a Phukwi 2013, setlhopha sa Basupi ba ga Jehofa ba le 28 kwa Brazil mo toropong ya São Félix do Xingu se ne sa ya kwa kgaolong ya Baindia ba Cayapo le ba Yuruna. Se ne sa tsamaya ka sekepe sa dimetara di le 15 mo Nokeng ya Xingu e e dikilometara di ka nna 2 092 kwa bokone go ela kwa Nokeng ya Amazon.

Setlhopha seno se ne sa tsaya mosepele go ya go rera ka Bogosi jwa Modimo kwa bathong ba ba nnang mo metsaneng e e iphaphathileng le noka. Mo letsatsing la boraro, setlhopha se ne sa goroga kwa motsaneng wa Kokraimoro. Ba ne ba amogelwa ka lorato ke batho ba ba ratang baeng. Mosadi mongwe yo ba neng ba kopana le ene o ne a ba gwetlha ka diatla. Motho mongwe wa mo lefelong leo yo o neng a tsamaya le bone o ne a tlhalosa se mosadi yono a se kayang: “Fa mosadi yono a lo gwetlha ka diatla, o a bo a re: ‘Tlang kwano. Re batla go lo itse!’”

Basupi ba ne ba bua le mongwe le mongwe—bangwe ba bua le bone ka Sepotokisi ba bangwe ka puo ya diatla. Ditshwantsho tse dintle tse di mo dikgatisong tsa Baebele tse ba neng ba tlile ka tsone di ne di thusa e bile batho ba le bantsi mo motseng ba ne ba amogela dikgatiso, segolobogolo boroutšhara jwa Reetsa Modimo.

Gerson, mmulatsela yo o kgethegileng kwa São Félix do Xingu, o gakologelwa se moagi mongwe a neng a se dira fa a amogela kgatiso ya Buka Ya me Ya Dipolelo Tsa Baebele: “O ne a e leba, a e tlamparela ka diatla tse pedi; o ne a sa batle le fa e le go e baya fa fatshe.”

Basupi ba ga Jehofa ba ne ba tsamaisetsa baagi bao ba ba nang le kanaanelo dibuka, dimakasine le diboroutšhara di ka nna 500. Kwa Kawatire, baagi ba ne ba reetsa ka tlhoafalo fa ba bolelelwa ka tsholofetso ya Baebele ya lefatshe la paradaise. Tonjaikwa, e leng Moindia wa Cayapo yo o nang le moya wa go amogela baeng, o ne a re: “Batho ba kwa Paradaiseng ba tla tshela jaaka re tshela.”

Batho ba le bantsi ba kwa toropong ya São Félix do Xingu ba ne ba itse ka loeto lono. Simone, mongwe wa batho ba ba neng ba tsere loeto loo, o ne a re batho bangwe ba lefelo la gaabo ba ne ba belaela gore ene le batho ba a tsamayang le bone ba tla amogelwa kwa metsaneng eo. Mme go ne go se na le fa e le bothata. Simone a re: “Re ne ra amogelwa ra bo ra rerela batho botlhe.”