Ka Tlhakole 1, 1943, tlelase ya ntlha ya sekolo seno se se kgethegileng e ne ya simologa kwa bokonebophirima jwa New York. Sekolo seno, se jaanong se bidiwang Sekolo sa Baebele sa Watchtower sa Gileade, se thapisitse banna le basadi ba feta 8 000 ba ba tswang mo lefatsheng lotlhe.

Jonathan, yo o sa tswang go aloga mo sekolong sa Gileade, a re: “Thuto e re e neilweng e e tswang mo Lefokong la Modimo e tla re thusa gore re nne le matswela a a molemo mo tshimong nngwe le nngwe kgotsa mo setsong sengwe le sengwe.” Mosadi wa gagwe e bong Marnie o oketsa jaana: “Ke ikemiseditse go feta le fa e le leng pele go thusa batho go lemoga gore ga go na botshelo jo bo botoka go gaisa jo Mmopi wa rona a batlang re bo tshela. Ke tlhomamisegile gore go thusa ba bangwe go itse Jehofa go tla tokafatsa matshelo a bone.”

Sekolo sa Gileade se naya thapiso ya mahala ya dikgwedi di le tlhano. Se ruta thata ka Baebele le botlhokwa jwa tiro ya go rera. Boikaelelo jwa sekolo seno ke go thusa baalogi gore ba nonotshe batho ba Modimo le go ba kgothatsa le go thusa batho botlhe gore ba nne le dinonofo tsa semoya tse ba di tlhokang gore ba kgone go fenya dikgwetlho tse ba lebanang le tsone. Ka nako ya thapiso eno baithuti ba fetsa nako e ntsi ba tlotla ka melaometheo ya Baebele e e ba thusang gore ba nonotshe kamano ya bone le Modimo wa bone, Jehofa.

Banyalani ba ba yang Gileade ke badiredi ba nako e e tletseng. Fa ba aloga, ba ka boela kwa kabelong ya bone kgotsa ba abelwa go direla kwa nageng e sele. Ba bangwe ba abelwa go direla mo go nngwe ya diofisi tsa makala tse di fetang 90 tsa Basupi ba ga Jehofa. Bontsi jwa bone ba abelwa go ya go direla kwa mafelong a a nang le baagi ba le bantsi gore ba rerele batho ba bantsi kafa go ka kgonegang ka gone.

Kwa tshimologong, Sekolo sa Gileade se ne se le kwa Kingdom Farm, kwa South Lansing, New York. Ka 1961 se ne sa isiwa kwa ntlokgolo ya Basupi ba ga Jehofa kwa Brooklyn, New York. Go tloga ka 1988 go ya go 1995, sekolo seno se ne se tshwarelwa kwa Watchtower Farms, kwa Wallkill, New York. Go tswa foo, ka 1995, se ne sa isiwa kwa lefelong le se leng kwa go lone gone jaanong, kwa Lefelong la Thuto la Watchtower, kwa Patterson, New York. Ka Mopitlwe 2013, setlhopha sa bo134 se ne sa aloga.

Mo dingwageng di le 70 tse di fetileng, baalogi ba Sekolo sa Baebele sa Watchtower sa Gileade ba ntse ba tlhoma sekao se se tlhomologileng thata sa go neela bosupi ka ga Jehofa ka boikanyegi.