Batho ba ba neng ba le kwa kopanong eo ba ne ba dumalana le setlhogo seno sa lokwalodikgang lwa Frankfurter Rundschau se se reng: “E ne E Kete ba mo Moketeng wa Lelapa.”

Karla yo o neng a tswa kwa Puerto Rico a re: “E ne e kete ke kwa gae!”

Sara yo o neng a tswa Australia a re: “E ne e kete ke etetse bamasika ba ba nnang kgakala.”

Ke eng se se dirileng gore ba bue jalo? Ke kopano ya boditšhabatšhaba ya Basupi ba ga Jehofa. E ne e tshwarwe ka July 18-20, 2014, kwa Commerzbank-Arena kwa Frankfurt am Main, Jeremane. Go ne go tlile batho ba ka nna 37 000.

Ba ne ba kopane go tla go ithuta Baebele. Thulaganyo eno e e rutang e ne e akaretsa go bala Baebele, go opela, dithapelo, diterama tse pedi le dithuto tse di loileng tse di theilweng mo Baebeleng.

Go ne go tlile Basupi ba ba nnang mo Jeremane, le ba ba fetang 3 000 go tswa kwa Afrika Borwa, Australia, Boritane, Gerika, Lebanona, Serbia le United States. Gape go ne go na le Basupi ba le 234 go tswa kwa dinageng di le 70, ba ba leng mo ditirelong tse di kgethegileng tse di jaaka tiro ya borongwa.

Bontlhanngwe jwa thulaganyo eno bo ne jwa gasiwa ka Internet kwa mafelong a le 19 mo Jeremane le kwa Austria le Switzerland. Palogotlhe ya batho mo mafelong ao otlhe e ne e le 204 046.

Kwa Frankfurt, thulaganyo ya kopano e ne e reeditswe ka Seesemane, Sejeremane le Segerika. Kwa mafelong a mangwe thulaganyo eno e ne ya ranolelwa mo dipuong di le 17, go akaretsa Se-Arabic, Se-China, Se-Tamil, Se-Turkey le dipuo tse pedi tsa diatla.

Le fa Basupi ba ne ba bua dipuo tse di sa tshwaneng e bile ba tswa mo dinageng le dingwao tse dintsi, seo ga se a ka sa ba kgaoganya—ba ile ba kopanngwa ke lorato. (Johane 13:34, 35) Ba ne ba tshwarana jaaka bana ba motho.

Tobias yo o tswang Boritane o ne a re: “Re iponetse ka matlho gore bakaulengwe ba ba tswang mo dinageng tse di farologaneng ba kgona go nna seoposengwe.”

Davianna wa kwa Puerto Rico o ne a re: “Ke kopane le Basupi ba ba tswang mo dinageng di feta 20. Re seoposengwe ka gore re rata Modimo e bile re a ratana.”

Malcom yo o tswang kwa Australia o ne a bua jaana: “Ke nnile Mosupi wa ga Jehofa fa ke ne ke le kwa toropong e potlana ya Australia. Ke tlhola ke bala le go lebelela dibidio tsa bakaulengwe ba le seoposengwe mo lefatsheng lotlhe. Gone jaanong ke iponela seo ka matlho. Jaanong ke a tlhaloganya gore go nna seoposengwe mo lefatsheng lotlhe go raya eng e bile go nonotshitse tumelo ya me.”

Diphuthego tsa Basupi di le 58 tsa mo Frankfurt le tse di gaufi, di ne tsa abela bakaulengwe ba ba tswang kwa dinageng di sele dimpho mme gape ga rulaganngwa go itlosa bodutu mmogo mo maitseboeng.

Cynthia yo o neng a tswa kwa United States a re: “Re ne re amogetswe ka diatla tsoopedi. Ga nkitla ke lebala lorato loo lwa bakaulengwe, bopelonomi le bopelotshweu jwa bone.”

Simon wa kwa Jeremane a re: “Mongwe le mongwe o ne a bontsha lorato, go tshegiwa gape go utlwanwa. Re ka ithuta go le gontsi mo go ba bangwe.”

Amy wa kwa Australia o tshwaela ka go re: “Thulaganyo ya maitseboa ya go itlosa bodutu e mpontshitse gore rona Basupi ba ga Jehofa re itse go itumela le go ijesa monate o o phepa, monate tota.

Kopano ya kwa Frankfurt e ne e le nngwe ya dikopano tsa boditšhabatšhaba tse di neng di tshwaretswe mo dinageng di le robongwe mo lefatsheng.

Mongwe yo o neng a le kwa kopanong o ne a bodiwa gore go ne go ntse jang, mme o ne a araba jaana: “Akanya fela o bona morwarrago yo o ntseng o sa itse gore o na le ene. Fela fa o kopana le ene, o go amogela mo legaeng la gagwe ka pelo yotlhe. O phophoma ka boitumelo. Jaanong akanya boitumelo joo bo menagane ga 37 000. Ke ne ke ikutlwa fela jalo.”