Ka Matlhatso, Diphalane 5, 2013, batho ba le 257 294 mo mafatsheng a le 21 ba ne ba nna gone ka sebele kgotsa ba gokagantswe ka Internet kwa pokanong ya bo129 ya ngwaga le ngwaga ya Watch Tower Bible and Tract Society of Pennsylvania. Moragonyana mo mafelobekeng ao, Basupi ba bangwe ba ne ba leba thulaganyo eno e e rekotilweng. Palogotlhe ya ba ba nnileng gone e ne ya nna 1 413 676 mo mafatsheng a le 31. Pokano eno ya ngwaga e ne e feta epe e Basupi ba ga Jehofa ba kileng ba e tshwara, tota le go feta pokano e e kgethegileng e mo go yone go neng go na le batho ba le 1 327 704, e e neng e tshwerwe kwa Mexico le Amerika Bogare ka Moranang 28, 2013.

Fa e sa le ka bo1920, Basupi ba ga Jehofa ba ntse ba gasa dikopano tsa bone mo lefatsheng lotlhe ba dirisa founo le radio. Mo motlheng ono, thekenoloji ya Internet e letla batho, tota le ba ba kwa mafelong a a kgakalakgakala, go utlwa le go bona ditiragalo ka nako e di diragalang ka yone kgotsa moragonyana. William, yo e leng Mosupi wa ga Jehofa kwa United States, o ne a ya kopanong kwa Richmond, Virginia, ka 1942 mme a reetsa thulaganyo ka founo. Fa a bapisa seno le pokano ya monongwaga, a re: “O solegelwa molemo le go feta fa o kgona go bona thulaganyo. Ruri seno se ka se bapisiwe le sepe.”

Maloko a diofisi tsa makala di le mmalwa tsa Basupi ba ga Jehofa a feditse sebaka se se fetang ngwaga a rulaganya kafa go gokaganngwa ka Internet go tla berekang ka gone. Mo mafelobekeng a go neng go tla gasiwa ka Internet, ba setegeniki ba ne ba tlhokometse thulaganyo ba le mo lefelong le go gasiwang go tswa mo go lone (control center) kwa Brooklyn, New York, ka e ne e bontshiwa mo mafelong a a nang le dinako di le 15 tse di farologaneng. Ryan, yo o neng a thusa go rulaganya le go tlhokomela thulaganyo, o ne a re, “Re ne re sa robale, mme fa re akanya ka palo ya batho ba ba neng ba solegelwa molemo ke thulaganyo eno, seo se ne se itumedisa.”