“E ne e kete Jehofa o reeditse se se mo dipelong tsa batsadi.” Eno ke tsela e rre mongwe wa kwa Malaysia a tlhalositseng motseletsele wa dibidio tsa dipopae tsa Nna Tsala ya ga Jehofa ka yone.

Fa e sa le bidio ya ntlha e gololwa, Basupi ba ga Jehofa ba dirile motseletsele wa dibidio tse di buang ka Kabo le lelapa la gaabo. Dibidio tseno tse di mo jw.org/tn di ruta bana dithuto tsa botlhokwa tsa boitsholo le tsa semoya, tse di jaaka lebaka la go bo ba sa tshwanela go utswa le gore ba ka rapela Modimo jang.

Bidio ya ntlha mo motseletseleng ono e setse e ranoletswe mo dipuong di le 131 e bile e solegela bana molemo mo lefatsheng lotlhe.

Mmѐ yo o nang le bana ba batlhano o ne a kwala jaana: “Fa e sa le re amogela DVD ya Reetsa, Nna Kutlo, Mme o Segofadiwe mo bekeng e e fetileng, re setse re e lebile ka makgetlo a ka nna 50.”

Millie wa kwa Engelane yo o nang le dingwaga di le 12, o na le kgaitsadie wa dingwaga di le 15 yo o bidiwang Thomas, yo o nang le bolwetse jo bo bakang bogole mo tlhaloganyong le mo mmeleng (Down syndrome). Millie o kwala jaana: “Thomas o bontsha ditsala tsa gagwe kwa sekolong dibidio tsa ga Kabo mo iPad ya gagwe. O rata dipina tsa teng e bile o di opela monate tota mo kgaitsadi mongwe a neng a tsholola dikeledi. Ruri seno se ama pelo.”

Ava yo o reng o na le dingwaga di le 8, dikgwedi di le 9 le malatsi a le 25, o kwala jaana: “Ruri Kabo le kgaitsadie ba itse go ruta bana.”

Mikaylah o kwala jaana: “Ke na le dingwaga di le thataro. Ke lo lebogela DVD ya Reetsa, Nna Kutlo, Mme o Segofadiwe. E nthuta go reetsa batsadi ba me ka gonne seo se itumedisa Jehofa.”

Mosha mongwe yo o dirang dibidio tsa dipopae yo e seng Mosupi wa ga Jehofa, o ne a leba bidio ya Go Utswa go Phoso. E ne ya mo kgatlha tota, segolobogolo fa a utlwa gore e dirilwe ke setlhopha se sennye sa batho. O ne a re: “Ke itse batho ba ba berekang mo mafelong a magolo le a mannye a go dira dibidio tsa dipopae, mme ka dinako tse dingwe ke ne ke tle ke ipotse gore go ntse jang go bereka mo mafelong ao. Ke lemogile gore tiro ya bone le matsapa a bone a dira gore batho ba tshege go se kae ka lobaka lo lo rileng, e bo e nna gone gotlhe. Dibidio tsa lona tsa dipopae tsone di fetola matshelo a bana, di ba ruta se se siameng le se se sa siamang e bile di ba thusa go dira ditshwetso tse di molemo. Lo dira sengwe se se botlhokwa, se se thusang batho.”

Batsadi mo lefatsheng lotlhe ba dumalana le seo. Mmѐ mongwe o ne a kwala jaana: “Morwaake wa dingwaga tse tharo, e bong Quinn, o ne a leba bidio ya Go Nna Tsala ya ga Jehofa. Fa pina eno e le fa gare, o ne a baya seatla sa gagwe se sennye mo sehubeng a bo a re: ‘Mama, bidio eno e dira gore ke itumele.’”