“Ke batla o ye Columbia Studios kwa New York City o ye go opela nngwe ya difela tsa rona. Se tla rekotiwa. O se ka wa bolelela ope ka se o se dirang.”

Kwa bofelong jwa 1913, William Mockridge o ne a diragatsa kabelo eno e e sa tshwaneng le epe e e tswang kwa go Charles Taze Russell. * Pina eo e e neng e itsiwe e le “The Sweet By-and-By” e ne ya dirwa rekoto ya 78-rpm. Moragonyana, William o ne a utlwa gore pina eno e ne e tla dirisiwa mo matsenong a “Photo-Drama of Creation,” e leng pontsho ya dipuo tsa Baebele tse di rekotilweng le mmino o o dirilweng gore o tsamaisane le difilimi le ditshwantsho tse di pentilweng mo diselaeteng tsa galase. “Photo-Drama” e ne ya bontshiwa la ntlha kwa New York City ka Ferikgong 1914.

Rekoto ya ga William e ne e le nngwe ya tse di fetang 50 tse di neng di dirisiwa ke ba ba tshamekang difonokerafa fa go bontshiwa “Photo-Drama” ka puo ya Seesemane. Le fa bontsi jwa mmino bo ne bo rekotilwe ke batho ba bangwe, go na le direkoto di se kae, go akaretsa le ya ga William, tse Baithuti ba Baebele ba laetseng gore di opelwe go dirisiwa mafoko a a tswang mo kopelong ya bone e e bidiwang Hymns of the Millennial Dawn.

Ka dingwaga di le dintsi, Basupi ba ne ba dirisa dipina tse di kwadilweng ke batho ba bangwe mo kobamelong. Mme fa go tlhokega ba ne ba fetola mafoko gore a tsamaisane le tsela e ba tlhaloganyang Dikwalo ka yone.

Ka sekai, pina nngwe e e dirisitsweng mo “Photo-Drama” e e bidiwang “Our King Is Marching On,” e ne e theilwe mo pineng ya “Battle Hymn of the Republic.” Mola wa ntlha wa “Battle Hymn” o simolola jaana: “Matlho a me a bone kgalalelo ya go tla ga Morena.” Mme Baithuti ba Baebele ba ne ba fetola mafoko ao gore a balege jaana: “Matlho a me a bona kgalalelo ya go nna gone ga Morena.” Phetogo eno e ne e bontsha gore ba dumela gore bobusi jwa ga Jesu Keresete ga bo akaretse fela go tla ga gagwe mme bo akaretsa le go nna gone ga gagwe ka nako e e rileng.—Mathaio 24:3.

Fa go ne go gatisiwa Singing and Accompanying Yourselves With Music in Your Hearts ka 1966, go ne ga dirwa maiteko a go ntsha mmino wa selefatshe kgotsa wa bodumedi bo sele. Mo ngwageng oo, Basupi ba ne ba rulaganya gore okhestra e rekote dipina tsotlhe di le 119. Diphuthego di ne di dirisa direkoto tseo go opela kwa dipokanong tsa bone mme Basupi ba bangwe ba ne ba rata go di reetsa kwa gae.

Ka 2009, Basupi ba ga Jehofa ba ne ba gatisa kopelo e ntšha e e bidiwang Opelelang Jehofa. Go setse go rekotilwe dipina tse di opelwang ka mantswe ka dipuo di le dintsi. Ka 2013, Basupi ba ne ba simolola go rekota bidio ya ntlha ya dipina tsa bana. Nngwe ya tsone e bidiwa Rapela ka Metlha. Kgwedi le kgwedi batho ba ba tsenang mo jw.org ba itseela dipina ka makgetlo a le dimilionemilione.

Ba le bantsi ba bontshitse fa ba anaanela dipina tseno. Mosadi yo o bidiwang Julie o ne a kwala jaana ka Opelelang Jehofa: “Dipina tse disha di monate tota! Fa ke le esi, ke tshameka tse di tsamaisanang le kafa ke ikutlwang ka gone. Seno se dira gore ke utlwe kamano ya me le Jehofa e nonofa e bile ke ikemiseditse go feta le fa e le leng pele go mo direla ka pelo ya me yotlhe.”

Mmè mongwe yo o bidiwang Heather, yo o nang le bana ba dingwaga di le supa le robongwe, o kwadile kafa bidio ya Rapela ka Metlha e amileng bana ba gagwe ka teng, “E ba rutile go bua le Jehofa ka nako nngwe le nngwe fela e ba batlang go bua le ene ka yone, e seng fela fa letsatsi le simolola kgotsa fa re le mmogo.”