Laeborari E o Ka e Dirisang Gongwe le Gongwe
Ka Diphalane 7, 2013, Basupi ba ga Jehofa ba ne ba golola app ya sedirisiwa sa ileketeroniki sa go bala le go ithuta Baebele, e e bidiwang JW Library. App eno ya mahala ya Baebele e na le dithanolo di le thataro tsa Baebele ka Seesemane, go akaretsa King James Version le Thanolo ya Lefatshe le Lesha ya Dikwalo Tse di Boitshepo e e tlhabolotsweng ya 2013. *
Goreng e Dirilwe?
Dimilionemilione tsa batho ba dirisa di-smartphone, di-tablet kgotsa didirisiwa tse di tshwanang le tseno go bereka le go tlhaeletsana. E re ka badirisi ba didirisiwa tseno ba ne ba ka bona tshedimosetso fa ba bala le go ithuta Baebele mo jw.org, ke ka ntlha yang fa JW Library e ne ya dirwa?
Sa ntlha, app eno e ka dirisiwa kwantle ga Internet fa e sena go tsenngwa mo sedirisiweng. Sa bobedi, e diretswe go thusa mmadi go bona dikwalo motlhofo le go ithuta Baebele ka tlhoafalo. Jang?
JW Library e Thusa mo go Ithuteng Baebele
Fa JW Library e bulwa, e bontsha maina a dibuka tsa Baebele. Fa o tlhopha buka ya Baebele, sekirini se se latelang se bontsha lenaane la dikgaolo la buka eo. Seno se dira gore temana kgotsa ditemana tse di mo kgaolong e e rileng di bonwe ka bonako. App eno e na le dikarolo tse dingwe tse di ka thusang mo thutong ya Baebele:
Dintlha tse di kwa tlase tse di bontshang ditsela tse dingwe tsa kafa temana e ka ranolwang ka gone le tshedimosetso e nngwe e e thusang go tlhaloganya temana
Ditshupiso tse di amanyang ditemana tsa Baebele
Karolo ya go senka e e bontshang kwa mafoko kgotsa dipolelwana di tlhagang gone
Aotlelaene ya diteng kwa tshimologong ya buka nngwe le nngwe ya Baebele
Lenaane le le bontshang mokwadi wa buka nngwe le nngwe ya Baebele, lefelo le nako e e kwadilweng ka yone le dingwaga tse tiragalo nngwe e diragetseng ka tsone
Karolo e e mebalabala ya dimmapa, ditšhate, lenaane la ditiragalo tsa botlhokwa le di-diagram
Fela jaaka dikgatiso tsotlhe tsa Basupi ba ga Jehofa, JW Library ke mahala. App eno ya mahala ya Baebele, e e tshegediwang ka meneelo e e ntshiwang ka go rata, e setse e tserwe ke batho mo Internet ka makgetlo a a fetang milione. (2 Bakorintha 9:7) Goreng o sa e dirise mme o solegelwe molemo ke laeborari eno e o ka e dirisang gongwe le gongwe?
^ ser. 2 Ka Ferikgong 2014, app eno e ne ya tlhabololwa. Gone jaanong e na le Temana ya letsatsi le kopelo e e dirisiwang ke Basupi ba ga Jehofa.