Kwa Mexico le Central America go na le baranodi ba ka nna 290, ba ba tswang mo dinageng di le thataro ba ba ranolelang dikgatiso tsa Baebele mo dipuong di feta 60. Ke eng fa ba tsaya matsapa a magolo jaana? Ka gonne fa batho ba bala kgatiso ya Baebele ka puo e ba e tlhaloganyang motlhofo, e kgona go ba ama pelo.—1 Bakorintha 14:9.

Go leka go tokafatsa boleng jwa thanolo, baranodi bangwe ba ba neng ba direla kwa ofising ya lekala ya Basupi ba ga Jehofa e e kwa Mexico City, ba fuduseditswe kwa mafelong a puo ya bone e buiwang teng. A seo se thusitse ka tsela nngwe? Baranodi ba fetsa nako e ntsi le batho ba ba buang puo e ba ranolelang mo go yone, mme seo se ba thusa gore ba dirise puo e batho ba e tlhaloganyang motlhofo.

Baranodi ba ikutlwa jang ka diphetogo tseno? Moranodi wa puo ya Se-Guerrero Nahuatl e bong Federico a re: “Ke ntse dingwaga di ka nna lesome ke le kwa Mexico City, mme mo nakong eo yotlhe ke kopane le lelapa le le lengwe fela le le buang puo ya gaetsho. Gone jaanong bontsi jwa batho ba ba nnang mo ditoropong tse di gaufi le ofisi ya thanolo ba bua puo ya gaetsho.”

Karin yo o ranolelang mo puong ya Se-Low German kwa ofising e e kwa toropong ya Chihuahua kwa Mexico a re: “Go tshela le batho ba puo e ke ranolelang mo go yone go nthusitse go dirisa puo ya bone ya letsatsi le letsatsi. Re nna mo torotswaneng e bile re berekela mo go yone, ka jalo fa ke okomela ka fensetere ke kgona go bona batho ba ba tla thusiwang ke tiro ya go ranola e re e dirang.”

Neyfi yo o nnang kwa ofising ya thanolo e e kwa Mérida, Mexico a re: “Fa re ruta batho Baebele kwa Maya, go re thusa go lemoga mafoko le diele tse batho ba mono ba sa kgoneng go di tlhaloganya motlhofo. Ka jalo, re leka go fetola kafa re ranolang ka teng, re dirisa puo e e buiwang letsatsi le letsatsi.”

Batho ba ba balang dikgatiso tse di ranotsweng ba ikutlwa jang? Akanya ka sekai sa ga Elena yo o buang Se-Tlapanec. O na le dingwaga di ka nna 40 a ntse a ya dipokanong tsa Basupi ba ga Jehofa. Ka ntlha ya gore kwa dipokanong go ne go dirisiwa Se-Spain, o ne a sa kgone go tlhaloganya se go buiwang ka sone. A re: “Ke ne ke itse fela gore ke batla go ya dipokanong.” Morago ga gore Elena a ithute Baebele a dirisa diboroutšhara tse di ranoletsweng mo Se-Tlapanec, o ne a simolola go rata Modimo mo a feleletseng a ineetse mo go ene a ba a kolobediwa ka 2013. Elena a re: “Ke leboga Jehofa go bo a mphile tshono ya go tlhaloganya Baebele.”