Ka Ferikgong 2013, makasine wa Tora ya Tebelo o ne o digela dingwaga di le 40 o ntse o gatisiwa ka Se-Greenland. Se-Greenland ke puo ya Ba-Inuit e e buiwang ke batho ba le 57 000.

Kwa Greenland go na le Basupi ba ga Jehofa ba le 150 fela, mme go gatisiwa dimakasine di le 2 300 tsa Tora ya Tebelo ka Se-Greenland. Seno se raya gore bontsi jwa batho ba ba balang Napasuliaq Alapernaarsuiffik, e leng leina la makasine wa Tora ya Tebelo ka Se-Greenland, ga se Basupi.

Fa mookamedi wa ofisi ya thanolo kwa toropong ya Nuuk a botsolodiwa mo thelebisheneng o ne a tlhalosa jaana: “Bontsi jwa batho ba kwa Greenland ba rata Baebele thata, ke lone lebaka la go bo ba bala Napasuliaq Alapernaarsuiffik.”

Fa mongwe wa baranodi ba Se-Greenland a bodiwa gore ke eng se a se ratang ka makasine ono, o ne a araba jaana: “Go bala makasine ono go ntsholegetse molemo. Ka sekai, o mpontshitse gore nka tshela jang botshelo jo bo molemo le jo bo botoka. Ke ne ke goga motsoko thata le fa ke ne ke itse gore go ne go le kotsi. Mme gone, Baebele e re bolelela gore fa re batla go tshela botshelo jo bo botoka, re tshwanetse go nna phepa mo mmeleng.”

Gape mo thulaganyong eo ya thelebishene go ne ga umakiwa gore Basupi ba ga Jehofa ba nnile gone kwa Greenland go tloga mo bogareng jwa bo1950 e bile ba gatisa dibuka le diboroutšhara ka Se-Greenland. Dikgatiso tseo di ranolwa ke baithaopi ba ba buang Se-Denmark le Se-Greenland, mme mokgele wa bone ke gore thanolo ya Se-Greenland e utlwale sentle.

Monna mongwe yo o nang le lobaka lo loleele e le Mosupi kwa Greenland o ne a re: “Ke na le dingwaga di le 25 ke rerela batho ba ba buang Se-Greenland mme ke bone botlhokwa jwa gore re nne le dikgatiso ka puo ya bone. Mo mafelong mangwe a a kwa thoko, a motho a kgonang go ya kwa go one dikgwedi di le mmalwa mo ngwageng a dirisa mokoro fela, go na le batho ba ba ratang go bala dimakasine tsa rona, ka jalo ka nako e re sa kgoneng go ba etela re ba romelela makwalo le dikgatiso.”

Go simologa ka Ferikgong 2013, Tora ya Tebelo ya Se-Greenland e ntse e gatisiwa ka kgatiso e e ithutiwang le ya batho botlhe. Gape motho a ka bala dikgatiso tseno kgotsa a di itseela mo jw.org/tn mo “Dikgatiso” fa a tlhopha puo ya Greenlandic a bo a tobetsa “Senka.”