Madirelo a go gatisa a Basupi ba ga Jehofa kwa Mexico a ne a newa setifikeiti sa Clean Enterprise mo dingwageng di le supa ka go latelana.

Ka Lwetse 26, 2012, puso ya Mexico e ne ya abela Basupi ba ga Jehofa setifikeiti se se kgethegileng sa go ba lebogela “tiro [ya bone] ya bonatla ya go tlhokomela le go sireletsa tikologo.”

Thulaganyo ya Clean Enterprise e thusa madirelo go dira ditiro tsa one ka ditsela tse di ka se kgotleleng tikologo. Ngwaga le ngwaga Basupi ba ga Jehofa ba nna le seabe mo go yone le fa tota mokgatlho wa bone e le o o sa direng poelo. Mmueledi wa kwa madirelong a go gatisa a kwa Mexico o ne a re: “E le gore re bone setifikeiti sa Clean Enterprise, re tshwanetse go bontsha gore tsela e re dirang ditiro tsa rona ka yone le e re latlhang leswe ka yone e dumalana le melao ya tikologo ya lefelo leno mo dikarolong di le supa: moya, metsi, go latlha matlakala, go latlha dikhemikale, tshireletsego, motlakase le go thapisetsa batho go sireletsa tikologo. Madirelo ga a patelesege go tsenela thulaganyo eno. Re e tsenela ka go bo re rata.”

Basupi ba ga Jehofa mo lefatsheng lotlhe ba dira sotlhe se ba ka se kgonang gore ba se ka ba kgotlela tikologo.