Ka May 20, 2015, mookamedi wa botsamaisi jwa toropo ya Rostov-on-Don kwa Russia, o ne a kwala lekwalo a leboga Basupi ba ga Jehofa go bo ba ile ba “tsenya letsogo mo go thuseng go dira gore toropo eo e nne ntle.”

Fa batho ba Rostov-on-Don ba ne ba leka go phepafatsa toropo ya bone, Basupi ba ga Jehofa go tswa kwa diphuthegong di le nnè ba ile ba thusa go sela matlakala mo ditseleng tsa toropo le go ntsha bolele mo nokeng. Mo diureng di le mmalwa fela, ba ile ba tlatsa dibeke tsa makala di ka nna 300 tse moragonyana di neng tsa tla go tsewa ke lori ya matlakala.

Goreng Basupi ba ile ba thusa mo porojekeng eo ya motse? Raisa yo o nang le dingwaga tse 67 a re: “Nka se nne fela ke lebile batho ba bereka. Ke batla gore toropo e nne phepa gore batho botlhe ba kgone go tla mo go yone. Le fa batho ba le bantsi ba sa itse ka se re se dirileng, nna ke sa ntse ke itumelela tiro eno. Ke a itse gore Jehofa ene o a bona.” Rre Aleksander a re: “Ga re rerele batho fela, gape re ba thusa ka ditsela tse dingwe. Ke itumela tota fa ke kgonne go thusa baagelani ba me ka sengwe.”

Go na le batho ba ba ileng ba anaanela se Basupi ba ga Jehofa ba se dirileng. Monna mongwe o ne a maketse fa a utlwa gore Basupi ba ne ba sa duelelwe tiro e ba e dirileng. O ne a ya go ba thusa go sela matlakala mme morago o ne a re: “Ke ne ke sa akanye gore go phepafatsa go ka dira gore motho a itumele jaana!” O ne a oketsa ka go re: “Bangwe ba lona ga lo nne mo toropong eno mme lo tlile go re thusa go e phepafatsa!”

Modiredipuso mongwe o ne a lemoga gore setlhotswana sa Basupi se ne se setse matlakala a le mantsi tota. O ne a ba tsaya senepe mo thoko ga matlakala a ba neng ba a setse gore a bontshe “ba bangwe gore tiro eno e dirwa jang.”