Bosheng jaana, mokgatlho mongwe wa kwa Boritane o ne wa naya Hugo wa dingwaga tse di lesome sekgele sa go thusa baithuti gore ba lebane le bothata jwa go kgerisiwa kwa sekolong.

Hugo o ne a re: “Bidio ya Fenya Mokgerisi Kwantle ga go Lwa le Ene ke yone e nthusitseng go gapa sekgele seno. Ke nnile moemedi wa letsholo leno ka ntlha ya se ke neng ka se ithuta mo bidiong eo e e mo jw.org.”

Hugo o ne a simolola ka go bontsha barutabana ba sekolo sa gagwe bidio eo. E ne ya ba kgatlha thata jaana mo ba neng ba rulaganya gore baithuti botlhe ba kgone go tsena mo website ya jw.org. Gone jaanong bana ba dingwaga tse di fa gare ga robedi le lesome ba kwa sekolong sa ga Hugo ba dirisa jw.org. Gape ba re e ba thusitse go araba dipotso tse di jaaka, Nka bona kae ditsala tsa mmatota?

Kwa sekolong sengwe kwa Boritane, Elijah wa dingwaga di le robedi o ne a kgerisiwa kwa sekolong. Ene le ba lelapa la gagwe ba ne ba leba bidio ya Fenya Mokgerisi. Ba ne ba ikatisa mmogo go thusa Elijah go itse gore a dire eng fa motho a mo kgerisa. Seo se ne sa thusa Elijah gore a kgone go lebana le bothata jwa go kgerisiwa. Mo bekeng ya letsholo la go fedisa go kgerisiwa, mogokgo o ne a bontsha bana botlhe ba sekolo bidio eno.

Boammaaruri ke gore bothata jwa go kgerisiwa ga bo kwa Boritane fela, bo aname lefatshe lotlhe mme bidio eno e thusa bana fela thata.

Kwa United States, Ivie wa dingwaga tse di lesome o ne a tshaba mosetsana yo o neng a tlhola a mo kgerisa. Fa a sena go leba bidio ya Fenya Mokgerisi, o ne a nna le bopelokgale jwa go lebana le mosetsana yoo. Gape o ne a bona thuso ka go buisana le morutabana wa gagwe. Mosetsana o ne a kopa maitshwarelo mo go Ivie mme gone jaanong ba a utlwana.

Basupi ba ga Jehofa ba amegile ka basha. Ka jalo, re tla tswelela ka go gatisa tshedimosetso e e ba thusang gore ba lebane le mathata a botshelo a a jaaka go kgerisiwa.