Ka 2011 monna mongwe o ne a tshabela kwa Norway a tswa kwa Eritrea. Fa Basupi ba ga Jehofa ba mo etela, o ne a ba bolelela gore o ile a kopana le bangwe ba bone kwa nageng ya gagabo. A re fa e ne e sa ntse e le lesole, o ile a bona bangwe ba Basupi ba ga Jehofa ba tshwarwa le go bogisiwa ka gonne ba gana go tsenela sesole.

Mme go ile ga diragala sengwe se se ileng sa dira gore le ene monna yoo a tshwarwe. O ne a tshwerwe le Basupi bangwe ba bararo, Paulos Eyasu, Negede Teklemariam, le Isaac Mogos ba ba neng ba tshwaretswe se ba se dumelang fa e sa le ka 1994.

O ile a iponela gore Basupi ba ga Jehofa ba dira se ba se rutang. O ne a lemoga gore banna bano ba ne ba ikanyega, e bile ba arogana dijo tsa bone le magolegwa a mangwe. Basupi bano ba ne ba bala Baebele letsatsi le letsatsi e bile ba laletsa ba bangwe go tla go e bala le bone. Mme fa ba ne ba bolelelwa gore ba itatole tumelo ya bone e le gore ba tle ba gololwe, ba ne ba gana.

Seno se ile sa kgatlha monna yono fela thata, mme morago ga gore a fudugele kwa Norway, o ne a batla go tlhaloganya gore goreng Basupi ba ga Jehofa ba na le tumelo e e nonofileng. Fa Basupi ba ga Jehofa ba sena go mo etela, ka yone nako eo o ile a simolola go ithuta Baebele le bone a bo a ya dipokanong.

Ka September 2018, O ile a kolobediwa mme ya nna Mosupi wa ga Jehofa. Gone jaanong o dirisa tshono nngwe le nngwe go bua le batho ba ba tswang kwa Eritrea le Sudan, a ba kgothaletsa gore ba ithute Baebele le gore ba nonotshe tumelo ya bone.