Ka February 8, 2017, Kgotlatshekelo ya Makgaolakgang ya kwa Azerbaijan e ne ya tsholola kgetsi kgatlhanong le Irina Zakharchenko le Valida Jabrayilova ba ba ileng ba latofadiwa ka gore ba naya batho dikgatiso tsa bodumedi jwa bone mme gone ba se na laesense ya go dira jalo. Moatlhodi Hafiz Nasibov, yo e leng modulasetulo wa Kgotlatshekelo ya Makgaolakgang o ne a ntsha katlholo ya gore ga a bone basadi bano molato e bile o busetsa morago ditshwetso tse di ileng tsa dirwa ke dikgotlatshekelo tse dingwe.

Ka nako ya tsheko, babueledi ba ga Mmê Zakharchenko le Mmê Jabrayilova ba ile ba tlhalosa gore puso e gatakile ditshwanelo tsa bone fa e ne e ba tshwara setlhogo go sa tlhokege. Kgotlatshekelo e ile ya letla basadi bano gore ba tlhalose dilo tse ba neng ba tshwanelwa ke go di itshokela mo dikgweding di feta 11 tse ba di ntseng kwa kgolegelong ba letetse go seka le kafa seo se ileng sa ba ama ka gone.

Mmueledi wa ditshwanelo tsa batho e bong Jason Wise o ne a re: “Re itumela tota go bo Kgotlatshekelo ya Makgaolakgang e tsholotse dikgetsi tseno. Basupi ba ga Jehofa ba mo Azerbaijan ba ne ba sa lebelela gore kgotlatshekelo e tla dira tshwetso eno. Re solofela gore Kgotlatshekelo ya Kgaolo ya Baku Sabail e tla dumela go duela ditshenyegelo tsa basadi bano ba babedi.”