Dingwaga di le masome a mabedi tse di fetileng, puso ya kwa Eritrea e ne ya tshwara banna ba bararo mme ya ba tswalela mo maemong a a makgwakgwa mo kampeng ya kgolegelo kwa Sawa. Ba sa ntse ba le koo le gompieno. Ga ba ise ba bonwe molato e bile ga ba ise ba newe tshono ya go ipuelela mo kgotlatshekelong. Ke ka ntlha yang fa ba diretswe tshiamololo e e kana kana?

Paulos Eyassu, Negede Teklemariam le Isaac Mogos ke Basupi ba ga Jehofa ba ba tsentsweng mo kgolegelong ka gonne ba gana go tsenela tirelo ya sesole ka ntlha ya tumelo ya bone. Fa e le gore ba ne ba bonwe molato wa go gana go tsenela sesole ba ka bo ba ile ba newa katlholo e e tlhomameng. Paulos, Negede le Isaac ba jaanong ba nang le dingwaga di le 41, 38 le 38, ba feditse dingwaga tsa bone tsa bosha ba le mo kgolegelong. Ba amogilwe tshono ya go nyala le go nna le bana, ya go tlhokomela batsadi ba bone kgotsa ya go tshela jaaka ba batla. Gape ba amogilwe tshono ya go obamela Jehofa ba na le badumedi ka bone.

Ka September 24, 1994, Paulos, Negede le Isaac ba ne ba tswalelwa mme ba tshwarwa setlhogo, ba bogisiwa ke badiredipuso ba kwa kampeng ya kgolegelo ya Sawa. Le fa go ntse jalo, ga ba tlhole ba tshwerwe makgwakgwa mme e re ka ba ikemiseditse go nna ba ikanyega mo dilong tse ba di dumelang, seno se dirile gore batlhokomedi ba kgolegelo ba ba tlotle fela thata.

Eritrea ke yone naga e e di gogang kwa pele mo go bogiseng Basupi ba ga Jehofa. Fa pego eno e kwalwa, go ne go na le Basupi ba le 73 mo kgolegelong, go akaretsa basadi, bana le bagodi. Ba le bantsi ba itshoketse go tshwarwa makgwakgwa, go sa newe dijo tse di nang le dikotla le metsi le go itewa ke batlhokomedi ba kgolegelo. Banna ba bangwe ba bararo ba Basupi ba ga Jehofa ba sa ntse ba le mo kgolegelong morago ga dingwaga di feta lesome mo kampeng ya Sawa mme Paulos, Negede le Isaac ba ntse lobaka lo loleele go feta Basupi ba bangwe kwa Eritrea.

Dinaga tse dingwe di a itse gore Eritrea ga e tshware Basupi ba ga Jehofa le madumedi a mangwe sentle.

• Go tloga ka 2004, United States Department of State e tlhalositse Eritrea e le “naga e e dirang selo se se maswe tota ka go nna e gataka tshwanelo ya batho ya go obamela.”

• Lekgotla la Ditshwanelo Tsa Batho la Ditšhaba Tse di Kopaneng le tshwenyegile ka “tsela e puso ya Eritrea e gatakang ditshwanelo tsa baagi ba naga ka yone.” Le kopile gore puso ya Eritrea e “tlotle tshwanelo ya mongwe le mongwe ya kgololesego . . . ya go akanya, ya go dirisa segakolodi le ya go obamela.”

• Khomishene ya U.S. ya International Religious Freedom e ne ya bega jaana mo pegong ya ngwaga le ngwaga ya 2014: “Kgololesego ya bodumedi ya Basupi ba ga Jehofa ke kgang e e masisi tota . . . .”

• Go ya ka Pego ya Lefatshe Lotlhe ya 2013 ya Human Rights Watch, puso ya Eritrea e tsweletse ka go tshwara le go tlhokofatsa maloko a madumedi “a a sa itsegeng thata segolobogolo Basupi ba ga Jehofa.”

• Ka December 2005, Khomishene ya Afrika ya Ditshwanelo Tsa Batho e ne ya re Eritrea “e tlhomamise gore batho ba sekisiwa sentle, ba nna le kgololesego ya go bua le ya go kokoana mmogo ka kagiso.”

Philip Brumley, mmueledimogolo wa lephata la tsa semolao wa Basupi ba ga Jehofa o ne a buelela Basupi botlhe fa a ne a re: “Re solofela gore puso ya Eritrea e tla golola Basupi botlhe, go akaretsa le ba ba sa bolong go nna dingwaga di le 20 mo kgolegelong le gore e tla fedisa pogiso ya badumedi ka rona.”