Tsehaye Tesfamariam o tlhokafaletse kwa Asmara ka November 30, 2016. O golotswe kwa kgolegelong ka September 10, 2015, ka gonne a ne a gateletswe ke bolwetse e bile a ne a sa tlhokomelwa sentle ka nako ya fa a ne a lwala. O tshotswe ka 1941 kwa Nefasit, Eritrea, mme o tlhokafala jaana a tlogela mosadi wa gagwe e bong Hagosa Kebreab yo a mo nyetseng ka 1973. Ba ne ba nna le bana ba basetsana ba le banê le ba basimane ba le bararo. O kolobeditswe ka 1958.

Rre Tesfamariam o ne a isiwa kwa Kampeng ya Meitir fa a sena go tshwarwa ka ditatofatso tse di sa tlhalosiwang ka January 2009. Ka October 5, 2011, Rre Tesfamariam le banna ba bangwe ba Basupi ba le 24 ba ba neng ba le kwa Kampeng ya Meitir, ba ne ba atlholwa ka go tsenngwa mo mokhukhung go fitlha ka August 2012. Ba ile ba tshwanelwa ke go itshokela mogote o o ntshang tlhapi mo metsing, ba tlhaela dijo le metsi mme seo se ile sa dira gore bangwe ba bone ba lwale thata.

Misghina Gebretinsae le Yohannes Haile ba ile ba tlhokafalela mo kgolegelong ya kwa Meitir mme Kahssay Mekonnen le Goitom Gebrekristos ba ile ba tlhokafala morago ga gore ba ntshiwe mo kgolegelong. Rre Tesfamariam le ene o mo palong ya ba ba ileng ba tlhokafala fa ba sena go ntshiwa mo kgolegelong.