Ka June 20, 2017, Kgotlatshekelo ya Astana e ne ya gana go reetsa boikuelo jwa gore Teymur Akhmedov a se ka a atlholelwa dingwaga di le tlhano mo kgolegelong. Gape babueledi ba gagwe ba ne ba batla go ikuela kgatlhanong le go bo a atlholetswe dingwaga tse dingwe tse tharo tsa gore a se ka a dira sepe se se amanang le bodumedi jwa gagwe. Mmueledi wa boditšhabatšhaba wa ditshwanelo tsa batho yo o neng a le kwa kgotlatshekelong ka lone letsatsi leo o ne a re: “Rre Akhmedov o diretswe tshiamololo ka gonne bosupi jo bo mo emang nokeng bo ne bo le bontsi tota.” Babueledi ba ga Rre Akhmedov ba re ba tla tsenya dikopo tse dingwe tsa boikuelo.

Ka January 2017, mapodise a ile a tshwara Rre Akhmedov ka gonne a ne a dira sengwe se se amanang le bodumedi jwa gagwe. O ne a nna mo kgolegelong go fitlha tsheko ya gagwe e tsena ka May 2, 2017, mme Kgotlatshekelo ya Kgaolo ya Saryarkinskiy e ne ya mo atlhola go ya ka Molawana 174 (2) wa go atlhola dirukutlhi tse di tlhotlheletsang ba bangwe gore ba tlhoe madumedi a mangwe. Rre Akhmedov o ile a re ga a dumalane le katlholo eno ka gonne a ne a bontsha baagelani ba gagwe lorato ka go ba tlotlela ka se a se dumelang. Kgololesego ya bodumedi ke tshwanelo e mongwe le mongwe a nang le yone kwa Kazakhstan, e bile naga ya Kazakhstan e dirile ditumalano le mekgatlho ya dinaga tse dingwe gore e tla tlotla tshwanelo eo.